وقۋ-اعارتۋ ءمينيسترى ءبىلىم بولىمدەرىنىڭ باسشىلارىن سىنعا الدى
بۇل تۋرالى ق ر وقۋ-اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«بالالار جىلى بويىنشا جوسپار بەكىتىلدى. ءبىراق، قازىر ارىپتەستەرىمىز دايىندالماي ءسوز بەرگەن ەدىم. ارينە، نەگىزىنەن ءبىراز جۇمىس جۇرگىزىلىپ جاتىر. ءبىراق، جۇيەلى تۇردە جۇرگىزىلگەنىن كورمەدىم. الدە دايىندالعان جوقسىزدار ما؟ بىلمەيمىن قالاي ەكەنىن. دەسەك تە، بالالار جىلى بويىنشا وڭىرلەردىڭ جوسپارلارىن قايتا قاراۋ كەرەك. ولاردى تولىقتىرۋ كەرەك. ءار اۋداننىڭ الدە قالانىڭ ءبىلىم ءبولىمى بويىنشا وسىنداي جوسپار بولۋى كەرەك. سىزدەرگە ءسوز بەرگەندە ول دايىن تۇرىپ، كادىمگىدەي جۇيەلى ماسەلەلەردى ايتىپ بەرۋلەرىڭىز قاجەت. قازىر كوزىم جەتىپ وتىر، جالپى جۇيەلى ماسەلەلەر مەن كۇندەلىكتى بولىپ جاتقان ماسەلەلەردى ايىرا الماي وتىرسىزدار.
«وسىنشاما مەكتەپ جوندەپ جاتىرمىز» دەيسىزدەر. ول الدىڭعى جىلى دا جوندەلدى، جوندەلۋى كەرەك تە»، - دەدى اسحات ايماعامبەتوۆ ۆەدومستۆوننىڭ اپپارات جينالىسىندا.
وسى رەتتە مينيستر وڭىرلەردىڭ ءبىلىم ءبولىمى باسشىلارىنا بالالار جىلىندا ناقتى جۇيەلى قانداي ءىس-شارالار ورىندالادى، جوسپارعا نە كىردى دەگەن سۇراقتارعا جاۋاپ بەرۋگە دايىن بولۋ كەرەكتىگىن ەسكەرتتى.
«سوندىقتان جوسپارداعى 200 ءىس-شارانى قايتادان قاراڭىزدار. سىزدەرگە 2 اپتا ۋاقىت بەرەمىن. كۇندەلىكتى، بالالار جىلى بولماسا دا وتكىزىلەتىن ءىس-شارالاردى قوسۋدىڭ قاجەتى جوق. بالالارعا بايلانىستى قانداي پروبلەمالار بار بولسا، سونى ىشىنە قوسۋ كەرەك. مۇمكىن از بولار. ءبىراق، بىزگە فورمالدى تۇردەگى ءىس-شارالاردى قوسۋدىڭ قاجەتى جوق»، - دەدى ول.
اۆتور: مارلان جيەمباي