پالەوليت ءداۋىرىنىڭ كوپ قاباتتى تۇراعى انىقتالدى
21 ماۋسىم 08:46

پالەوليت ءداۋىرىنىڭ كوپ قاباتتى تۇراعى انىقتالدى

نۇر-سۇلتان. قازاقپارات – ق ر ۇلتتىق مۋزەيى گەرمانيانىڭ تيۋبينگەن ۋنيۆەرسيتەتىمەن بىرلەسىپ الماتى وبلىسى ەڭبەكشىقازاق اۋدانىندا پالەوليت ءداۋىرىنىڭ كوپ قاباتتى تۇراعىن انىقتادى، دەپ حابارلايدى قازاقپارات.

«حالىقارالىق جوبا اياسىندا بيىل مامىر ايىنان باستاپ الماتى وبلىسىنداعى كەربۇلاق جانە ەڭبەكشىقازاق اۋداندارىندا زەرتتەۋ جۇمىستارى ءجۇردى. ناتيجەسىندە، ەڭبەكشىقازاق اۋدانىنداعى «تىكەنەكتى-2» تۇراعىنداعى مادەني قاباتتاردان ورتا تاس ءداۋىرى، كەيىنگى پالەوليت جانە نەوليت داۋىرلەرىنە جاتاتىن ارتەفاكتىلەر انىقتالدى. مۇندا ۇلتتىق مۋزەي قىزمەتكەرلەرىمەن قاتار يسپانيا، گرەكيا، گەرمانيا، امەريكا ەلدەرىنىڭ زەرتتەۋشىلەرى، عىلىم دوكتورلارى بار. سونداي- اق، ءال- فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتەرى دە بەلسەنە اتسالىسىپ جاتىر. ەكى شاكىرتىمىز پالەوليت داۋىرىنە قاتىستى دوكتورلىق ديسسەرتاتسياسىن شەتەلدە قورعايدى»، - دەيدى ارحەولوگيالىق زەرتتەۋ جۇمىستارىنىڭ قوسالقى جەتەكشىسى، مۋزەيدىڭ باس عىلىمي قىزمەتكەرى، تاريح عىلىمدارىنىڭ دوكتورى، اكادەميك جاكەن تايماعامبەتوۆ.


ق ر ۇلتتىق مۋزەيى باسپا ءسوز قىزمەتىنىڭ حابارلاۋىنشا، تاريحي ورىننان كوپتەگەن تاس قۇرالدارى، سونىڭ ىشىندە نۋكلەۋستەر، قىرعىشتار، ۇشكىر تاستار تابىلعان. قازبا جۇمىستارى كەزىندە تابىلعان جانۋارلاردىڭ سۇيەكتەرى مەن كومىر قالدىقتارى زەرتحانالىق ساراپتاماعا جىبەرىلمەك.

بۇعان دەيىن جاكەن قوجاحمەت ۇلى باستاعان قازاق- ورىس، قازاق- نەمىس، قازاق- جاپون حالىقارالىق ەكسپەديتسيالارى قاراتاۋ جوتاسىنان بۇرىن- سوڭدى بەلگىسىز بولىپ كەلگەن پالەوليت داۋىرىنە تيەسىلى 85 ۇڭگىردى انىقتاعان. زاماناۋي تەحنولوگيالار ارقىلى تۇركىستان وبلىسى بايدىبەك اۋدانىنا قاراستى بورالداي تاۋىنداعى تۇتتىبۇلاق ۇڭگىرىنە سكانەرلەۋ جۇمىستارى جۇرگىزىلىپ، ناتيجەسىندە ورتا تاس داۋىرىنە جاتاتىن كۇلدىڭ قالدىعىنان 41 مىڭ جىل بۇرىنعى تىرشىلىك بەلگىلى بولدى.


«تۇتتىبۇلاق ۇڭگىرىندەگى زەرتتەۋ جۇمىسى XX عاسىردىڭ سوڭىنا قاراي باستالعان. ۇڭگىردىڭ قويناۋىنا جاسىرعان تاريحي سىرى بارىن بىلگەن قازاقستانداعى تاس ءداۋىرى ارحەولوگياسىنىڭ نەگىزىن قالاۋشى، العاشقى قازاق ارحەولوگتارىنىڭ ءبىرى، عالىم، مەنىڭ ۇستازىم حاسان الپىسبايەۆ 1959 -جىلى بۇل ورىندى تاپقانىمەن، قازۋعا مۇمكىندىگى بولعان جوق. ارحەولوگيالىق قازبا جۇمىستارىن جۇرگىزۋگە تۇتاستاي توپ اتسالىسۋى ءتيىس. سوندىقتان، بۇل جۇمىس كەيىنگە قالىپ، ۇستازىمىزدىڭ باستاماسىن ءبىز جالعاستىردىق. 2018 -جىلى «Palaesilkroad» جوباسى اياسىندا تۇتتىبۇلاق ۇڭگىرىندە جۇرگىزىلگەن زەرتتەۋ جۇمىستارى ناتيجەسىندە كۇلدىڭ قالدىعى، تاس قۇرالدار جانە ادامنىڭ جاق سۇيەگى تابىلدى. ول العاشقى ادامدىكى بولۋى دا مۇمكىن. قازىرگى تاڭدا جاق سۇيەك گەرمانياداعى زەرتحانادا. ال، كۇلدىڭ قالدىعىنا قاراپ، وشاق پەن وتتى پايدالانعان ادامزات بالاسىنىڭ سول كەزەڭدە وسى جەردە دە تىرشىلىك ەتكەنىن ايتۋعا بولادى. بيىل دا تۇتتىبۇلاق ۇڭگىرىندە جۇمىس جۇرگىزىلەدى. قىزىقتى ناتيجەلەرگە قول جەتكىزەمىز دەگەن سەنىم بار»، - دەيدى جاكەن تايماعامبەتوۆ.

كەلەسى كەزەكتە ق ر ۇلتتىق مۋزەيى مەن تيۋبينگەن ۋنيۆەرسيتەتىنىڭ ارحەولوگ ماماندارىنان جاساقتالعان ەكسپەديتسيا قازاقستان اۋماعىنداعى پالەوليت ەسكەرتكىشتەرىن ىزدەستىرۋ، زەرتتەۋ جۇمىستارىن تۇركىستان، جامبىل وبلىستارى مەن شىعىس قازاقستاندا جالعاستىرادى.


جاڭالىقتار