التايداعى ەرتىستىڭ جاعاسىندا قازاقتىڭ تەرمەسى شىرقالدى - شەتەلدەگى قازاق ءتىلدى ب ا ق- قا شولۋ
19 ماۋسىم 19:38

التايداعى ەرتىستىڭ جاعاسىندا قازاقتىڭ تەرمەسى شىرقالدى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قازاقستاندا «تۇركيا ستيپەنديالارى» بويىنشا تالاپكەرلەردى قابىلداۋ باستالدى - TRT

تۇركيا شەتەلدەگى تۇرىكتەر جانە اعايىن قاۋىمداستىقتار باسقارماسى ۇيىمداستىرعان «تۇركيا ستيپەنديالارى» اياسىندا ونلاين ءوتىنىش بەرگەن ستۋدەنتتەردىڭ سۇحبات ساتىسى قازاقستاندا باستالدى، دەپ حابارلايدى «تۇركيا راديو تەلەديدار» اقپاراتتىق اگەنتتىگى.

اتالعان باسىلىمىنىڭ دەرەگىنشە، قازاقستاندا «تۇركيا ستيپەنديالارى» باعدارلاماسى اياسىندا تالاپكەرلەردى قابىلداۋ پروتسەسى باستالدى. قازاقستاندىق تالاپكەرلەر جىلداعىداي بيىل دا ستيپەنديالىق باعدارلاماعا ۇلكەن قىزىعۋشىلىق تانىتقان.

شەتەلدەگى تۇرىكتەر جانە اعايىن قاۋىمداستىقتار باسقارماسىنىڭ وكىلدەرى نۇر- سۇلتان قالاسىنداعى يۋنۋس ەمرە ينستيتۋتىندا جانە الماتىداعى ەۋرازيا زەرتتەۋ ينستيتۋتىندا سۇحبات جۇرگىزگەن.

«اڭگىمەلەسۋگە باكالاۆريات، ماگيستراتۋرا جانە دوكتورانتۋراعا تۇسۋگە ۇمىتكەر ستۋدەنتتەر قاتىسادى. تۇركيا رەسپۋبليكاسىنىڭ ەلشىلىگى جانىنداعى ءبىلىم بەرۋ مەكەمەسى بيىل ۇلكەن جۇمىس جۇرگىزدى. ناتيجەدە بيىل شامامەن 7600 تالاپكەر ءوتىنىش بەردى. ەندىگى ساتىدا سۇحبات پروتسەسىنەن كەيىن تۇركياعا ءبىلىم الۋعا شاقىرىلاتىن تالاپكەرلەر انىقتالادى»، دەپ جازادى TRT.

ايتا كەتۋ كەرەك، اتالمىش باعدارلاما اياسىندا ستۋدەنتتەرگە وقۋ اقىسى، تۇرۋ، مەديتسينالىق ساقتاندىرۋ، ەكى جاققا ۇشۋ بيلەتتەرى جانە اي سايىن شاكىرتاقى تولەنەدى.

بايان- ولگي ءھام حوۆد: قاي ايماقتىڭ ينۆەستيتسيالىق الەۋەتى جوعارى؟ - Kaznews

موڭعوليالىق Kaznews اقپاراتتىق پورتالىندا وسىنداي تاقىرىپتاعى ماقالا جارىق كوردى.

Kaznews- ءتىڭ دەرەگىنشە، بايان- ولگي مەن حوۆد ايماعى دا موڭعوليانىڭ باتىس ولكەسىندە ورنالاسقان. حالىق سانى 2021 -جىلعى كورسەتكىش بويىنشا بايان- ولگيدە 112,836 ادامعا، حوۆد ايماعىندا 91,127 ادامعا جەتكەن.

ايماق ورتالىعىنداعى حالىق سانى ولگيدە 43077، ال جارگالانتتا 32200 بولعان.

رەسەيمەن شەكارالاساتىن تساگااننۋۋر، ق ح ر مەن شەكارالاساتىن دايان وتكىزۋ بەكەتتەرى بايان- ولگي ايماعىنا تيەسىلى بولسا، ق ح ر- مەن شەكەرالاساتىن بۋلگان، بايتاگ بەكەتتەرى حوۆد ايماعىنا تيەسىلى. موڭعوليا ايماقتارىنداعى حالىقارالىق ستاتۋسى بار ءۇش اۋەجايدىڭ ەكەۋى وسى ايماقتاردا ورنالاسقان ەكەن. بايان- ولگي ايماعىنىڭ ارتىقشىلىعى «ساگااننۋۋر» اتتى ەكونوميكالىق ەركىن زوناسى بار.

موڭعوليالىق ب ا ق- تىڭ كەلتىرگەن دەرەگىنە سۇيەنسەك، بىلتىر مەملەكەتتەن بايان- ولگي ايماعىنىڭ جەرگىلىكتى دامۋ قورىنا 8,7 ميلليارد توگروگ ينۆەستيتسيا تارتىلعان. ال، حوۆد ايماعىنىڭ جەرگىلىكتى دامۋ قورىنا 6,8 ميلليارد توگروگ ينۆەستيتسيا قۇيىلعان.

حالىقارالىق ۇيىمداردىڭ باعدارلاماسىمەن 2022 -جىلى جەرگىلىكتى دامۋ قورىنا كورسەتىلەتىن قولداۋدا بايان- ولگي ايماعىنا 79,8 ميلليون توگروگ ينۆەستيتسيا بولىنگەن.

ال، 2022 -جىلى مەملەكەتتىك بيۋدجەتتەن بايان- ولگي ايماعىنا - 56,9 ميلليارد توگروگ، حوۆد ايماعىنا 90 ميلليارد توگروگ كولەمىندەگى قارجى بولىنگەن.

سونداي- اق، بايان- ولگيدە مەملەكەت قاراجاتىمەن سالىناتىن ءوندىرىس ورىندارى جوق بولسا، ال حوۆد ايماعى ءۇشىن بۇل سالادا ىلگەرلەۋشىلىك بايقالادى. ويتكەنى ولاردا حوبدا وزەنى بويىنا سالىناتىن ەردەنەبۇرەن 90 م ۆ ت- تىق سۋ- ەلەكتر ستانتسياسىنىڭ جوباسىنا ينۆەستيتسيا تارتىلعان.

«بۇگىندە ايماقتاعى جۇمىسسىزدىق دەڭگەيىنىڭ ءوسۋى، ينفراقۇرىلىمنىڭ توزۋى، جەرگىلىكتى دامۋ قورىنىڭ جوسپارلانۋى، شاعىن جانە ورتا ونەركاسىپتىڭ باياۋ دامۋىنا قاتىستى پروبلەمالار بار. ال، مەملەكەت تاراپىنان ۇلەستىرەتىن شاعىن جانە ورتا كاسىپتى دامىتۋعا ارنالعان نەسيەگە ناعىز كاسىپكەرلەر قول جەتكىزىپ وتىر ما؟ ! بۇل سۇراققا كىم جاۋاپ بەرە الادى؟» ، دەپ تۇيىندەلەدى اتالعان جازبا.

قازاقستاندىق ينۆەستورلار جىزاقتا 1,3 ميلليون دوللارلىق 11 كەلىسىم جاساماق - «ءو ز ا»

وزبەكستاننىڭ جىزاق وبلىسىنا كەلگەن قازاقستان رەسپۋبليكاسىنىڭ ينۆەستورلارى 1,3 ميلليون دوللارلىق 11 كەلىسىمگە قول قويۋعا مۇددەلى.

«ءو ز ا» - نىڭ دەرەگىنشە، وسى جىلدىڭ 13-ماۋسىمىندا وزبەكستان رەسپۋبليكاسى پرەزيدەنتى جانىنداعى ستاندارتتاۋ جانە سەرتيفيكاتتاۋ سالاسىنداعى تيىمدىلىكتى ارتتىرۋ ماسەلەلەرىنە ارنالعان جيىنالىس ءوتتى.

وندا وبلىس اكىمدەرى ەكسپورتتاۋشىلار سانىن كوبەيتۋ جانە جاڭا زەرتحانالار اشۋ باعدارلاماسىن قابىلداماق نيەتتە. سونىمەن قاتار، بۇل باسقوسۋدا اۋىل شارۋاشىلىعى مينيسترلىگىمەن بىرلەسىپ، 200 مىڭ گەكتار جەمىس- كوكونىس القاپتارىن حالىقارالىق ستاندارتتارعا سايكەستەندىرىپ، جىل سوڭىنا دەيىن 249 جەمىس- كوكونىس كلاستەرىمەن جۇمىس ىستەۋ جانە حالىقارالىق نارىققا ەكسپورتتايتىن كاسىپورىندار سانىن 400 گە دەيىن ارتتىرۋ مىندەتى قويىلعان ەدى.

وسىعان وراي، قازاقستاندىق ينۆەستورلارمەن كەزدەسۋدە ءوڭىردىڭ ەكسپورتتىق الەۋەتىن ارتتىرۋ، ءوڭىر ەكونوميكاسىندا تۋريزم يندۋسترياسىن قالىپتاستىرۋ، ءوندىرىستى جەرگىلىكتەندىرۋ، يمپورتتى جانە اۋىل شارۋاشىلىعى ونىمدەرىن قايتا وڭدەۋدى دامىتۋ، ولاردىڭ ەكسپورتتىق الەۋەتىن جانە ساپاسىن ارتتىرۋ سىندى ماسەلەلەر تالقىلاندى.

ەكى جاققا دا ءتيىمدى بولعان كەلىسسوزدەر بارىسىندا قازاقستاندىق ينۆەستورلارمەن B2B، B2G، G2G فورماتىندا كەلىسسوزدەر جۇرگىزىلىپ، جاڭا ينۆەستيتسيالىق جوبالاردىڭ تۇساۋكەسەرى ءوتتى.

«ءو ز ا» - نىڭ دەرەگىنشە، قازاقستاندىق BePRO Management holding باسشىسى ەركەلبۇلان ماكەنوۆتى وزبەكستاننىڭ جىزاق وبلىسىندا سالىنعان ءوندىرىس ورىندارى قاتتى تاڭ قالدىرعان. ول اتالعان باسقوسۋدا، ءوزىنىڭ وسىنداي وندىرىستىك كومپانيالارمەن جۇمىس ىستەۋگە قۋانىشتى ەكەنىن جانە بولاشاقتا ىنتىماقتاستىقتى ودان ءارى كەڭەيتۋگە نيەتى بارىن ايتقان.

التايداعى ەرتىستىڭ جاعاسىندا قازاقتىڭ تەرمەسى تىڭدالدى - «حالىق گازەتى»


شولپان شالقىمان قىزى - التايدا تۇراتىن تانىمال تەرمەشى. شولپان بالا جاسىنان دومبىرا تارتىپ، ءان ايتۋمەن اۋەستەنگەن، دەپ حابارلايدى قىتايدىڭ «حالىق گازەتى».

ول 2016 -جىلى كۇيتۇن ونەر ينستيتۋتىنا قابىلدانىپ، ءۇش جىل ۆوكال ماماندىعى بويىنشا ءبىلىم الىپ، ءداستۇرلى تەرمە ونەرىن كاسىبي دەڭگەيدە مەڭگەرىپ شىعادى.


بۇل ۆيدەو اقپاراتتا تەرمەشى شولپان شالقىمان قىزى ءوزىنىڭ شىعارماشىلىق جولىن ايتىپ، سونداي- اق تەرمە ونەرى تۋرالى قىسقاشا تۇسىنىكتەمە بەرەدى. ول قىتاي قازاقتارىنا بەلگىلى بولعان ايگىلى تەرمەشى مارقۇم اسەمحان عيبادات قىزىن وزىنە ۇلگى، ۇستاز تۇتاتىنىن ايتتى.

«تەرمە - ءسوزى مەن اۋەنى كەلىسكەن، عيبراتتىق سيپاتى باسىم ليريكالىق ولەڭ ءتۇرى. شولپان شالقىمان قىزى ەرتىس وزەنىنىڭ بويىندا ونەرپازدىق شەبەرلىگىمەن ءبولىسىپ، بولاشاقتا بالالارىنا ءداستۇرلى تەرمە ونەرىن ۇيرەتسەم دەگەن ارمانىن جەتكىزدى»، دەپ جازادى قىتايلىق باسىلىم.

پرەزيدەنت قازاقستان ەلشىسىنىڭ سەنىم گراموتاسىن قابىلدادى - Kaznews

وسى اپتادا موڭعوليا پرەزيدەنتى قازاقستان ەلشىسىنىڭ سەنىم گراموتاسىن قابىلدادى.

13-ماۋسىم كۇنى موڭعوليا پرەزيدەنتى ۋحنااگيين ءحۇرەلسۇح قازاقستان رەسپۋبليكاسىنىڭ موڭعولياداعى ەلشىسى عابيت قويشىبايەۆتان سەنىم گراموتاسىن قابىلدادى. بۇل تۋرالى موڭعوليا پرەزيدەنتى اكىمشىلىگىنىڭ باسپا ءسوز قىزمەتىنە سىلتەمە جاساپ Kaznews اقپاراتتىق پورتالى حابارلادى.

موڭعوليا پرەزيدەنتى ۋحنااگيين حۇرەلسۇح قازاقستان رەسپۋبليكاسىنىڭ موڭعولياداعى ەلشىسى رەتىندە جاڭا قىزمەتكە تاعايىندالۋىمەن قۇتتىقتاپ، تابىس تىلەدى.

ايتا كەتەيىك، بيىل موڭعوليا مەن قازاقستان اراسىنداعى ديپلوماتيالىق دوستىق قارىم- قاتىناسقا 30 جىل تولۋدا. تاراپتار كەزدەسۋ بارىسىندا ساۋدا، ەكونوميكا، مادەنيەت جانە ءبىلىم سالاسىنداعى ىنتىماقتاستىقتى ارتتىرۋ بارىسىندا پىكىر الماستى.

عابيت بەيبىت ۇلى قويشىبايەۆ 1972 -جىلى 12-ناۋرىزدا الماتى قالاسىندا دۇنيەگە كەلگەن. ءال- فارابي اتىنداعى قازاق مەملەكەتتىك ۇلتتىق ۋنيۆەرسيتەتىن جانە ق ر س ءى م ديپلوماتيالىق اكادەمياسىن بىتىرگەن. ايتا كەتەيىك، ع. قويشىبايەۆ قازاقستاننىڭ موڭعولياداعى ەلشىسى لاۋازىمىنا تاعايىندالعانعا دەيىن قازاقستاننىڭ قىتايداعى ەلشىسى بولعان ەدى.

موڭعولياعا كەلگەن تۋريستەر اراسىندا سانى جاعىنان قازاقستان ءتورتىنشى ورىندا تۇر. بۇل تۋرالى وسى اپتادا kaznews اقپاراتتىق پورتالى حابارلاعان بولاتىن.

اتالعان ب ا ق- تىڭ دەرەگىنشە، 2021 -جىلدىڭ قاڭتار- مامىر ايىندا موڭعولياعا 8554 تۋريست كەلگەن بولسا، 2022 -جىلى قاڭتار- مامىر ايىندا 42060 تۋريست كەلگەن. شەتەلدەن كەلگەن تۋريستەر سانى %391,7 عا ارتقان.

وتكەن جىلعى كورسەتكىشپەن سالىستىرعاندا، تۋريزم سالاسىنىڭ كىرىسى ايتارلىقتاي وسكەن.

«موڭعولياعا العاشقى بەس ايدا كەلگەن تۋريستەر سانى بويىنشا رەسەي (22,292) كوش باستاپ تۇر. سونىمەن قاتار وڭتۇستىك كورەيا (4,048)، قىتاي حالىق رەسپۋبليكاسى (2,989)، قازاقستان رەسپۋبليكاسى (2724)، بەلارۋس (1698) قاتارلى ەلدەر العاشقى بەستىكتى قورىتىندىلاۋدا»، - دەپ جازادى موڭعوليالىق باسىلىم.

قازاقستان- تۇركىمەنستان- يران تەمىر جولى - ايماقتىق ىنتىماقتاستىقتىڭ ءساتتى ۇلگىسى - Parstoday

تۇرىكمەنستاننىڭ قارجى جانە ەكونوميكا ءمينيسترى مۇحاممەتگەلدى سەرداروۆ ەۋرازياداعى ساۋدا ىنتىماقتاستىعىنىڭ ءساتتى ۇلگىسى تۇرىكمەنستان- قازاقستان جانە يرانمەن اراداعى تەمىر جولى ەكەنىن ايتتى، دەپ حابارلادى يراننىڭ Parstoday اقپارات اگەنتتىگى.

مۇحاممەتگەلدى سەرداروۆ بۇل تۋرالى سانكت- پەتەربۋرگ حالىقارالىق كونفەرەنسياسىندا ايتقان بولاتىن.

ونىڭ پىكىرىنشە، بۇل تەمىر جول ەۋرازياداعى كورشىلەس ەلدەردىڭ ساۋدا- ەكونوميكالىق ىنتىماقتاستىعىن كەڭەيتۋ ءۇشىن جاقسى پەرسپەكتيۆا اشادى.

ايتا كەتەيىك، ۇزىندىعى 926 شاقىرىمدى قۇرايتىن قازاقستان- تۇركىمەنستان- يران تەمىر جولى 2014 -جىلدىڭ جەلتوقسان ايىندا قولدانىسقا تاپسىرىلدى. ول اشىلعاننان كەيىن قىتاي دا بۇل جولعا قوسىلىپ، 2016 -جىلدان بەرى وسى ءدالىز ارقىلى كونتەينەرلىك پويىزدار ءجۇرىپ جاتىر.

Parstoday ءدىڭ كەلتىرگەن مالىمەتىنشە، 2021 -جىلدىڭ 26 ​ -قاراشاسىندا ي ي ر، تۇرىكمەنستان جانە قازاقستان (KTI ) ءۇش ەلى اراسىندا قازاقستاننان تۇرىكمەنستانعا جانە ودان يرانعا تەمىرجول جۇك تاسىمالىنىڭ كولەمىن ۇلعايتۋ ماقساتىندا ءۇش جاقتى تەمىرجول مەموراندۋمىنا قول قويىلدى. يران- تۇركىمەنستان- قازاقستان حالىقارالىق تەمىرجولىنىڭ 80 شاقىرىمى يراندا، 700 شاقىرىمى تۇركىمەنستاندا، 146 شاقىرىمى قازاقستاندا.

وزبەكستانعا ءساۋىر ايىندا ەڭ كوپ تۋريست قازاقستاننان كەلگەن - «ءو ز ا»

2022 -جىلدىڭ ءساۋىر ايىندا وزبەكستانعا تۋريستىك ماقساتپەن 269,2 مىڭ شەتەلدىك كەلگەن. ونىڭ باسىم بولىگى كورشى قازاقستاننان كەلگەن ازاماتتار قۇرايدى، دەپ حابارلايدى «ءو ز ا» مەملەكەتتىك اقپاراتتىق اگەنتتىگى.

مەملەكەتتىك ستاتيستيكا كوميتەتىنىڭ حابارلاۋىنشا، بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 181,4 مىڭ ادامعا نەمەسە 3,1 ەسەگە وسكەن.

ايتا كەتەيىك، وزبەكستاندىق ب ا ق 2022 -جىلدىڭ ءساۋىر ايىندا وزبەك ەلىنە تۋريستىك ماقساتپەن كەلگەن شەتەلدىك ازاماتتاردىڭ تىزىمدىگىن جاريالاعان.

«قازاقستان - 81,2 مىڭ ادام، تاجىكستان - 69,9 مىڭ ادام، قىرعىز ەلىنەن - 69,1 مىڭ ادام، رەسەي - 29,3 مىڭ ادام، تۇركيا - 4,5 مىڭ ادام، گەرمانيا - 1,4 مىڭ ادام، فرانسيا - 1,2 مىڭ ادام ساياحاتتاپ كەلگەن»، دەپ جازدى «ءو ز ا».

اۆتور بەيسەن سۇلتان


جاڭالىقتار