پاندەميا سانەپيدەم قىزمەتتىڭ ايرىقشا ماڭىزىن ايقىنداپ بەردى - ەرجان بايتانايەۆ
سانيتاريالىق- ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتانايەۆ الەۋمەتتىك جەلىدەگى پاراقشاسىندا سالا قىزمەتكەرلەرىن كاسىبي مەرەكەمەن قۇتتىقتاپ، وي ءبولىستى دەپ حابارلايدى قازاقپارات.
«الەم جۇرتى جاپا شەككەن وبا، حالىققا كەساپات اكەلگەن تىرىسقاق، دۇنيەنى ءدۇر سىلكىندىرگەن ەبولا بار. اتى اتالماعاندارى قانشاما؟ ! قازىر بۇلاردىڭ ءبىرى دە جوق. بۇل - سان- ەپيد قىزمەتىنىڭ بىلىكتى جۇمىسىنىڭ ناتيجەسى. اۋرۋ انىقتالعان بويدا ەپيدبريگادا قورعانىس قۇرالدارىن سايلاپ، اۋرۋ وشاعىنا جەدەل جەتىپ، ەپيدەميولوگيالىق زەرتتەۋ جۇرگىزەدى. ناۋقاسپەن بايلانىستا بولعانداردى شۇعىل انىقتاپ، وقشاۋلايدى. اۋرۋدىڭ تارالۋ تىزبەگىن ءۇزۋ، كارانتين شارالارىن ەنگىزۋ جۇمىستارىن ۇيىمداستىرادى. بۇل ارەكەتتەر ءبىر عانا ناۋقاستى ەمەس، ءبۇتىن ءبىر ەلدى ساقتاپ قالۋ ءۇشىن جۇرگىزىلەدى» ، - دەپ جازادى ول.
الەمدى جايلاعان ىندەتتىڭ اتالعان قىزمەتتىڭ ماڭىزدىلىعىن كورسەتكەنىنە توقتالادى.
«پاندەميا سان- ەپيد قىزمەتتىڭ ايرىقشا ماڭىزىن ايقىنداپ بەردى. كەشەگى لوكداۋن ەسىمىزدە. مەملەكەتتىك ورگانداردىڭ جۇمىسىن رەتتەپ وتىرۋ، ۇيلەستىرۋ، ەلگە كارانتين ەنگىزۋ، مەملەكەتتىك شەكاراداعى قوزعالىس، كاسىپكەرلەردىڭ جۇمىسى، تىيىم سالۋ مەن رۇقسات بەرۋ - بارلىعى باس سانيتار دارىگەردىڭ قاۋلىسىنا تاۋەلدى بولدى. ءسال قاتەلەسۋگە، ءمۇلت كەتۋگە مۇلدەم بولمايدى. سەبەبى، ءاربىر شەشىمنىڭ ارتىندا ادام تاعدىرى، ۇلت ساۋلىعى تۇر. دەر كەزىندە قابىلدانعان شەشىمدەردىڭ ارقاسىندا ەپيداحۋال ءبىرشاما تۇراقتاندى»،-دەيدى.
سانيتاريالىق- ەپيدەميولوگيا قىزمەتى جىل بويى دامىل تاپپايتىنىن ايتادى.
«قىس، كۇز - تۇماۋ مەن ج ر ۆ ي- دىڭ، كوكتەم - كەنە ەنتسەفاليتى مەن كەنە شاعۋدان زاقىمدانۋدىڭ، جاز - جەدەل ىشەك ينفەكتسياسى مەن سەرروزدى مەنينگيتتىڭ ءورشيتىن ۋاقىتى. سوندىقتان، سان- ەپيد قىزمەت 365 كۇن بويى ۇلت ساۋلىعى كۇزەتىندە»،-دەگەن ەرجان بايتانايەۆ سالا قىزمەتكەرلەرىنىڭ جاۋاپتى جۇمىسىنا تابىس تىلەيدى.