قاسىم- جومارت توقايەۆ رەسەي پرەزيدەنتى ۆلاديمير پۋتينمەن كەزدەستى

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ رەسەي پرەزيدەنتى ۆلاديمير پۋتينمەن كەزدەستى، دەپ حابارلايدى قازاقپارات.

اڭگىمە بارىسىندا كوشباسشىلار قازاقستان مەن رەسەيدىڭ ساۋدا- ەكونوميكالىق سالاداعى ىنتىماقتاستىعىنىڭ قازىرگى جاعدايى مەن دامۋ پەرسپەكتيۆالارىن جان- جاقتى تالقىلادى.

قاسىم- جومارت توقايەۆ كۇردەلى گەوساياسي احۋالعا قاراماستان قازاقستاننىڭ ماڭىزدى ستراتەگيالىق سەرىكتەسى - رەسەيمەن اراداعى ىقپالداستىقتىڭ قارقىندى دامىپ كەلە جاتقانىن اتاپ ءوتتى.

- قۇرمەتتى ۆلاديمير ۆلاديميروۆيچ، مەن ءسىزدىڭ وسى بەدەلدى فورۋمعا قاتىسۋعا شاقىرۋىڭىزدى ىقىلاسپەن قابىلدادىم. ءسىزدىڭ بايانداماڭىزدى مۇقيات تىڭدادىم. مازمۇنى مەن كولەمى جاعىنان بۇل بايانداماڭىز حالىققا ارنالعان تۇتاس جولداۋعا تەڭ كەلەدى. اۋديتوريا مۇنى وتە جىلى قابىلدادى. بۇعان پىكىر بىلدىرۋشىلەر دە از بولمايدى دەپ ويلايمىن. ەكىجاقتى ىنتىماقتاستىققا كەلەر بولساق، الاڭداۋشىلىققا نەگىز جوق. ءبارى قالىپتى جاعدايدا. ونەركاسىپ، اۋىل شارۋاشىلىعى سالالارى بويىنشا ناقتى جوبالار جۇزەگە اسىرىلىپ جاتىر. ينۆەستيتسيالىق ىنتىماقتاستىق قارقىندى دامىپ كەلەدى. بيىل ەرەكشە جىل - ديپلوماتيالىق قاتىناستارىمىزعا 30 -جىل. ەكىجاقتى ىنتىماقتاستىقتى دامىتۋ تۇرعىسىنان ەلەۋلى جەتىستىكتەرگە قول جەتكىزدىك. بۇل باعىتتاعى قارىم- قاتىناستارىمىز ودان ءارى قارقىندى دامي بەرەدى دەپ ويلايمىن، - دەدى مەملەكەت باسشىسى.

ءوز كەزەگىندە رەسەي پرەزيدەنتى ەكى ەل اراسىنداعى ساۋدا- ەكونوميكالىق بايلانىستار ودان ءارى نىعايا بەرەتىنىن ايتتى.

- پەتەربۋرگ ەكونوميكالىق فورۋمىنا كەلگەنىڭىز ءۇشىن كوپ راحمەت. ءبىز ءۇشىن ەلدەرىمىز اراسىنداعى ەرەكشە قاتىناستاردى اتاپ ءوتۋ جانە وزىڭىزبەن نەگىزگى باعىتتار جونىندە، اسىرەسە ەكونوميكا سالاسى بويىنشا پىكىر الماسۋ ماڭىزدى. جاڭا عانا فورۋم اياسىندا وسىنى ايتتىق. ايتپاقشى، وسى فورۋمدا 7 ميلليارد دەپ قاتە ايتىپپىن. قازاقستان ەكونوميكاسىنا سالىنعان ينۆەستيتسيا 17 ميلليارد دوللار. تاۋار اينالىمى ارتىپ كەلەدى. ءسىز جاڭا عانا بۇل تۋرالى ايتىپ ءوتتىڭىز. بىلتىر وسى كورسەتكىش 25 ميلليارد دوللار بولسا، بيىل العاشقى ءۇش ايدا 12 ميللياردتان اسقان. ەگەر وسىنداي قارقىنمەن دامي بەرسە، رەكوردتىق كورسەتكىشكە قول جەتكىزەمىز. بيىل ەلدەرىمىز اراسىنداعى ديپلوماتيالىق قاتىناستاردىڭ ورناعانىنا 30 جىل. الدىمىزدا وڭىرلىك فورۋم بار. جالپى ۇكىمەتتەرىمىز بەلسەندى جۇمىس جۇرگىزىپ جاتىر، - دەدى ۆلاديمير پۋتين.