باس پروكۋراتۋرا قىز الىپ قاشقاندارعا قانداي جازا بار ەكەنىن ءتۇسىندىردى

نۇر-سۇلتان. قازاقپارات – ق ر باس پروكۋراتۋراسى قىز الىپ قاشقان جاعدايدا قانداي جازا قاراستىرىلعانىن ءتۇسىندىردى، دەپ حابارلايدى قازاقپارات.

«قىز الىپ قاشۋ - سالت-ءداستۇر مە، قىلمىس پا، مۇنى اجىراتۋدىڭ ءبىر جولى بار، ول - قالىڭدىقتىڭ كەلىسىم بەرۋى جانە الىپ قاشقان ادامداردىڭ وسىنداي كەلىسىمنىڭ بارىن ءتۇسىنۋى. باسقاشا ايتقاندا، كەلىسىم بەرمەگەن قىزدى ەركىنەن تىس الىپ قاشسا، كۇشتەپ ۇستاپ، باسقا جەرگە اپارسا، الىپ قاشقاندار وسى ءمان- جايدى بىلسە - بۇل اۋىر قىلمىس سانالادى. قىلمىستىق كودەكستىڭ 125-بابى - ادام ۇرلاۋ بويىنشا 4 جىلدان 7 جىلعا دەيىن باس بوستاندىعىنان ايىرۋ جازاسى قاراستىرىلعان. ال ەگەر كامەلەتكە تولماعان قىزدى ۇرلاسا، بۇل جاعدايدا 7 جىلدان 12 جىلعا دەيىن سوتتالۋى مۇمكىن جانە مۇلكى تاركىلەنەدى» دەپ ءمالىم ەتتى باس پروكۋراتۋرادان. ۆەدومستۆو حابارلاۋىنشا، بۇل قىلمىس ءۇشىن ەڭ قاتال جازا - 15 جىلعا سوتتاۋ. ونىڭ ىشىندە توپ بولىپ الىپ قاشسا، جابىرلەنۋشىنى ابايسىزدا ءولتىرىپ الۋ جانە باسقا اۋىر جاعدايلارعا اكەپ سوقسا، ۇرلانعان ادامدى قاناۋ ماقساتىندا جاسالسا، وسىنداي اۋىر جازا قولدانىلۋى مۇمكىن.

«ەگەر ءسىزدى الىپ قاشسا نەمەسە كوز الدىڭىزدا وسىنداي جاعداي بولسا، دەرەۋ 102 قىزمەتىنە قوڭىراۋ شالىڭىز. پوليتسياعا مۇمكىندىگىنشە كولىكتىڭ ماركاسى، ءتۇسى، ءنومىرى، الىپ قاشقانداردىڭ ءتۇر-الپەتى، كيىمى سەكىلدى ەرەكشە بەلگىلەردى حابارلاڭىز. بۇل جاعدايدا جاي عانا كۋاگەر بولساڭىز دا، ارىز جازىلماسا دا قىلمىستىق ءىس قوزعالىپ، تەرگەۋ باستالادى. ەگەر ۇرلاعان ادام جابىرلەنۋشىنى بوساتسا جانە ونىڭ ارەكەتىندە قىلمىستىق قۇرام بولماسا، ول قىلمىستىق جاۋاپكەرشىلىكتەن بوساتىلادى» دەلىنگەن حابارلامادا.

ايتا كەتۋ كەرەك، قازاقستاندا نەكە جاسى - 18.

اۆتور: جانات قاپالبايەۆا