الماتىلىقتاردىڭ باسىم بولىگى دۇرىس تاماقتانبايدى - ساۋالناما
15 ماۋسىم 08:27

الماتىلىقتاردىڭ باسىم بولىگى دۇرىس تاماقتانبايدى - ساۋالناما

الماتى. قازاقپارات - «دەنساۋلىق» ۇلتتىق قاۋىمداستىعى الماتىلىقتار اراسىندا تاماقتانۋ بويىنشا ساۋالناما جۇرگىزدى. ماقسات- جۇقپالى ەمەس اۋرۋلاردىڭ الدىن الۋ، دەپ حابارلايدى قازاقپارات ءتىلشىسى.

«دەنساۋلىق» ۇلتتىق قاۋىمداستىعىنىڭ پرەزيدەنتى باقىت تۇمەنوۆانىڭ ايتۋىنشا، زەرتتەۋ المالى، جەتىسۋ جانە تۇركسىب اۋدانىنىڭ تۇرعىندارى اراسىندا جۇرگىزىلدى. ساۋالناما 57 مىڭنان استام ادام تىركەلگەن №5 قالالىق ەمحانا بازاسىندا ءوتتى.

قاتىسۋشىلار بەس جاس توبىنا ءبولىندى: 18-25، 26-39، 40-49، 50-63، 63 جانە ودان جوعارى. ساۋالاناماعا قاتىسقان بارلىق رەسپوندەنتتەردىڭ جارتىسىنان كوبى ماكارون، كۇرىش جانە كارتوپتى ءجيى تۇتىنادى. فاستفۋدتى 18 بەن 25 جاس ارالىعىنداعى جاستاردىڭ % 70- عا جۋىعى تۇتىنادى. 63 جاستان اسقان ادامداردىڭ % 6- ى تەز دايىندالاتىن تاعامعا اۋەس ەكەنى بەلگىلى بولدى. قۇرامىندا قانت مولشەرى جوعارى ونىمدەردى، ياعني ءتاتتى كونديتەرلىك تاعامدار، ءتاتتى گازدالعان سۋسىندار مەن ءتۇرلى شىرىنعا جاستار جاعىنان سۇرانىس جوعارى. بارلىق جاس توپتارىندا ءتاتتى شاي مەن كوفەنى جوعارى تۇتىنۋ بايقالدى - ءار توپتاعى رەسپوندەنتتەردىڭ 90 پايىزى وسى سۋسىنداردى ىشەدى.

ورتاشا العاندا، بارلىق رەسپوندەنتتەر كۇنىنە 2,5 كەسە شاي/كوفە ىشەدى. ولار وعان 1,6 اس قاسىق قانت قوسادى. كۇنىنە ءبىر ادام 20 گراممعا جۋىق قانت جەيدى. قازاق تاعامتانۋ اكادەمياسىنىڭ باس عىلىمي قىزمەتكەرى، مەديتسينا عىلىمدارىنىڭ دوكتورى، پروفەسسور ءشامىل تاجىبايەۆتىڭ سوزىنشە، تەڭگەرىمسىز تاماقتانۋ مەن ماكارون ونىمدەرى، كۇرىش، كارتوپتى سياقتى تاعامداردى شامادان تىس تۇتىنۋ سەمىزدىككە اكەلەدى. بۇل جۇقپالى ەمەس اۋرۋلاردىڭ دامۋىنا ىقپال ەتەدى.

ونىڭ ايتۋىنشا، قازاقستاندا تىركەلگەن ءولىمنىڭ 80-85 پايىزى جۇقپالى ەمەس اۋرۋلارمەن بايلانىستى. وعان جۇرەك اۋرۋى، وكپەنىڭ قابىنۋى، قاتەرلى ىسىك، قانت ديابەتى جانە تاعى باسقالار كىرەدى.

«زەرتتەۋگە سايكەس، 50 جاستان اسقان ادامداردا جۇقپالى ەمەس اۋرۋلاردىڭ ءوسۋى بايقالادى. كوبىنەسە بۇل ارتەريالىق گيپەرتەنزيا، 50-دەن 63 جاسقا دەيىنگى توپتاعى رەسپوندەنتتەردىڭ % 25 - ىن قۇرايدى. سونىمەن قاتار 50 جاستان اسقان ادامدار اراسىندا سوزىلمالى جۇرەك جەتكىلىكسىزدىگىنىڭ پايىزى جوعارى. 26-39 جاستاعىلاردىڭ 2 پايىزى قانت ديابەتىنە شالدىققان»، - دەيدى ول.

«دەنساۋلىق» ۇلتتىق قاۋىمداستىعىنىڭ باسشىسى باقىت تۇمەنوۆا حالىق اراسىندا تاماقتانۋ، دەنساۋلىقتى كۇتۋ مادەنيەتىن قالىپتاستىرۋ كەرەكتىگىن ايتتى.

«زەرتتەۋ ناتيجەلەرى قازاقستاندا ءداستۇرلى شاي ءىشۋ مادەنيەتىنە بايلانىستى الاڭداتارلىق جاعداي قالىپتاساتىنىن كورسەتەدى، سەبەبى قالىپتاسقان ءداستۇر بويىنشا قازاقستاندا شاي قانتپەن، نە دەسەرت تاعامدارمەن ىشىلەدى. بۇل الماتى قالاسىنىڭ ءارتۇرلى جاستاعى تۇرعىندارىنىڭ % 90 - دان استامىنا ءتان. زەرتتەۋ كورسەتكەندەي الماتىلىقتاردىڭ باسىم بولىگى دۇرىس تاماقتانبايدى»، - دەيدى «دەنساۋلىق» ۇلتتىق قاۋىمداستىعىنىڭ باسشىسى باقىت تۇمەنوۆا.

اۆتور: الما مۇقانوۆا

جاڭالىقتار