قازاقستاندا ەلەكتر ساموكاتتارىنىڭ جىلدامدىعىنا قاتىستى شەكتەۋ ەنگىزىلەدى

نۇر-سۇلتان. قازاقپارات - قازاقستاندا ەلەكتر ساموكاتتاردى پايدالانۋدىڭ ۇلتتىق ستاندارتىنىڭ جوباسى ازىرلەندى.

بۇل تۋرالى «اگروماشحولدينگ KZ» اق بازاسىنداعى «دوڭعالاقتى كولىك قۇرالدارى جانە اۋىل شارۋاشىلىعى ماشينالارى» ستاندارتتاۋ جونىندەگى №87 تەحنيكالىق كوميتەتىنىڭ ءتوراعاسى ەربول سەيپيلوۆ ءمالىم ەتتى، دەپ حابارلايدى قازاقپارات ءتىلشىسى.

«بۇل جوبا حالىقارالىق ستاندارت نەگىزىندە جاسالدى. وسى ستاندارتتىڭ اياسىنا جىلدامدىعى ساعاتىنا 25 شاقىرىمنان اسپايتىن ەلەكتر ساموكاتتارى كىرەدى. سوندىقتان وسى سيپاتتاعى ەلەكتر ساموكاتتارى ۆەلوسيپەد جولدارىمەن جانە جاياۋ جۇرگىنشىلەر جولاعىمەن دە جۇرە الادى. سونىمەن قاتار، اۆتوموبيل جولىنىڭ شەتىمەن جۇرگەن كەزدە قوزعالىستاعى باسقا كولىكتەرگە كەدەرگى كەلتىرمەۋى كەرەك. وسى ورايدا ءتيىستى قاۋىپسىزدىك ەرەجەلەرىن ساقتاۋى ءتيىس»، - دەدى ە. سەيپيلوۆ ەلوردادا وتكەن باسپا ءسوز ءماسليحاتىندا.

ونىڭ ايتۋىنشا، جاياۋ جۇرگىنشىلەر جولاعىندا ەلەكتر ساموكاتىمەن كەلە جاتقان ادام الدىن الا دىبىس بەلگىسىن بەرىپ، ەسكەرتۋ جاساۋى كەرەك.

«جالپى، جىلدامدىعى ساعاتىنا 25 شاقىرىمنان اسپايتىن ەلەكتر ساموكاتتارىنىڭ قوزعالىسىنا قاتىستى شەكتەۋلەر قاراستىرىلىپ وتىرعان جوق. بۇل تۇرعىدا ولار ۆەلوسيپەلدتەر سياقتى بارلىق جەردە جۇرە الادى. ەڭ باستىسى، قاۋىپسىزدىك تالاپتارىن ساقتاۋى ءتيىس»، - دەدى ەربول سەيپيلوۆ.

ونىڭ سوزىنە قاراعاندا، قازىرگى كەزدە ماماندارمەن، جاۋاپتى ۆەدومستۆو وكىلدەرىمەن بىرگە جىلدامدىعى ساعاتىنا 25 شاقىرىمنان اساتىن ەلەكتر ساموكاتتارىن قاي ساناتقا جاتقىزۋ ماسەلەسى تالقىلانىپ جاتىر. اتالعان ستاندارت ساموكاتتاردىڭ جىلدامدىعى مەن باسقا دا قاۋىپسىزدىك تالاپتارىنا سايكەستىگىن رەتتەيدى. وسى ورايدا بۇل قۇرىلعىلاردا مىندەتتى تۇردە جارىق شامدارىنىڭ بولۋى سياقتى تالاپتار ەسكەرىلەدى.

«ستاندارت جوباسىنىڭ العاشقى رەداكتسياسىن جاسادىق جانە بۇگىن ءبىرىنشى تەحنيكالىق تالداۋ ءجۇرىپ جاتار. وسى سالاداعى قاۋىمداستىقتارمەن، ىشكى ىستەر مينيسترلىگى وكىلدەرىمەن قاراستىرىپ، بيىل تامىز نەمەسە قىركۇيەك ايىندا قۇجاتتى قابىلدايمىز دەپ ويلايمىن»، - دەدى كوميتەت باسشىسى.