بالاڭىزدى مەكتەپكە جىبەرمەسەڭىز اتا-انا قۇقىعىنان ايىرىلۋىڭىز مۇمكىن
11 ماۋسىم 07:55

بالاڭىزدى مەكتەپكە جىبەرمەسەڭىز اتا-انا قۇقىعىنان ايىرىلۋىڭىز مۇمكىن

نۇر-سۇلتان. قازاقپارات – ق ر باس پروكۋراتۋراسى ازاماتتاردىڭ قانداي جاعدايدا اتا-انا قۇقىعىنان ايىرىلاتىنىن ءتۇسىندىردى، دەپ حابارلايدى قازاقپارات.

ۆەدومستۆو مالىمەتىنشە، وعان مىناداي جاعدايلار سەبەپ بولۋى مۇمكىن:

- اتا-انا مىندەتىن ورىنداۋدان جالتارسا، ونىڭ ىشىندە اليمەنت تولەۋدەن قاساقانا جالتارسا؛

- دالەلدى سەبەپسىز ءوز بالاسىن پەرزەنتحانادان، جەتىم جانە اتا-انا قامقورلىعىنسىز قالعان بالالارعا ارنالعان ۇيىمداردان الىپ كەتۋدەن باس تارتسا؛

- وزدەرىنىڭ اتا-انالىق قۇقىعىن تەرىس پايدالانسا (مىسالى، بالانى وقىتۋعا قاساقانا كەدەرگى كەلتىرسە، بالالارىن قايىر سۇراۋعا نەمەسە ۇرلىققا باۋلىسا، بالانى جەزوكشەلىكپەن اينالىسۋعا يتەرمەلەسە، سپيرتتىك ىشىمدىك نەمەسە ەسىرتكى تۇتىنۋعا تارتسا)؛

- بالالارىنا قاتال قاراسا، ولارعا فيزيكالىق نەمەسە پسيحيكالىق زورلىق-زومبىلىق كورسەتسە، ونى جىنىستىق قىلمىسقا يتەرمەلەسە؛

- سپيرتتىك ىشىمدىك نەمەسە ەسىرتكى قۇرالدارىن، پسيحوتروپتىق زاتتاردى جانە سونىڭ انالوگتارىن پايدالانسا.

اتا-انا ءوز بالاسىنىڭ، جۇبايىنىڭ نەمەسە وتباسىنىڭ باسقا مۇشەلەرىنىڭ ومىرىنە نەمەسە دەنساۋلىعىنا قاساقانا قىلمىستىق قۇقىق بۇزۋشىلىق جاساعان كەزدە اتا-انا قۇقىعىنان ايىرىلادى.

«اتا-انا قۇقىعىنان ايىرۋ سوت تارتىبىندە، پروكۋروردىڭ جانە قورعانشىلىق نەمەسە قامقورشىلىق قىزمەتىمەن اينالىساتىن مەكەمەنىڭ قاتىسۋىمەن جۇرگىزىلەدى» دەپ ءمالىم ەتتى باس پروكۋراتۋرادان.

جاڭالىقتار