پرەزيدەنت تۋرالى كونستيتۋتسيالىق زاڭدا نازاربايەۆقا كەپىلدىك بەرەتىن نورمالار بار - ۆيتسە-مينيستر

نۇر-سۇلتان. قازاقپارات – ق ر ادىلەت ۆيتسە-ءمينيسترى الما مۇقانوۆا ەلباسى تۋرالى كونستيتۋتسيالىق زاڭ كۇشىن جويسا دا، پرەزيدەنت تۋرالى كونستۋتسيالىق زاڭ ەلباسىعا ءتىيىستى كەپىلدىكتەر بەرەتىنىن ايتتى، دەپ حابارلايدى قازاقپارات ءتىلشىسى.

«زاڭ شىعارۋشىلار بۇرىنعى پرەزيدەنتتەردى جاۋاپكەرشىلىكتەن قورعايتىن نورمانى الىپ تاستاۋ تۋرالى شەشىم شىعارسا، نۇرسۇلتان نازاربايەۆتى جاۋاپقا تارتۋعا بولاتىنىن ايتىپسىز. بۇل قاشان ىسكە اسادى» - دەپ سۇرادى ب ا ق وكىلدەرى ورتالىق كوممۋنيكاتسيالار قىزمەتىندە وتكەن بريفينگىدە.

«كەشە ءماجىلىستىڭ كەڭەيتىلگەن وتىرىسىنان كەيىن ب ا ق وكىلى ماعان وسىعان ۇقساس سۇراق قويعان بولاتىن. مەن وعان ەلباسى تۋرالى زاڭدى جويۋ تۋرالى ۇسىنىس ءبىزدىڭ تۇجىرىمدامامىزدا بار ەكەنىن ءتۇسىندىردىم. ەگەر تۇزەتۋلەر قابىلدانسا، تيىسپەۋشىلىك تۋرالى باپ ەلباسى وتباسىنىڭ مۇشەلەرىنە قاراستىرىلمايتىن بولادى. ءبىراق بىزدە پرەزيدەنت تۋرالى كونستيتۋتسيالىق زاڭ جوباسى بار ەكەنىن ەسكەرۋىمىز كەرەك. وندا بۇكىل ەكس-پرەزيدەنتتەرگە قاتىستى نورمالار بار. ال ەلباسى تۋرالى بولەك جازىلماعان. وندا جالپى پرەزيدەنتتەرگە وكىلەتتىكتەرىن اياقتاعاننان كەيىن كەپىلدىكتەر بەرىلەتىنى تۋرالى ايتىلعان»، - دەدى ۆيتسە-مينيستر.

ونىڭ ايتۋىنشا، پرەزيدەنت دەگەنىمىز - ساياسي تۇلعا.

«ول بۇكىل مەملەكەتكە قاتىستى ىشكى جانە سىرتقى ساياساتپەن بايلانىستى تۇبەگەيلى شەشىمدەر قابىلدايدى. سوندىقتان بۇكىل ەكس- پرەزيدەنتتەردى قامتيتىن نورما ءتيىستى كونستيتۋتسيالىق زاڭدا بار. ەلباسى تۋرالى زاڭ جوباسى جويىلسا دا، بىزدە پرەزيدەنت تۋرالى كونستيتۋتسيالىق زاڭ جوباسىندا ءتيىستى كەپىلدىكتەردى قامتيتىن نورمالار بار»، - دەدى الما مۇقانوۆا.

ايتا كەتەيىك، 7-ماۋسىمدا ورتالىق رەفەرەندۋم كوميسسياسى كونستيتۋتسياعا ۇسىنىلعان وزگەرىستەر قابىلدانعانىن مالىمدەگەن ەدى.

اۆتور: ەسىمجان ناقتىباي