رەفەرەندۋمنىڭ تولىق قورىتىندىسى شىعارىلدى
«رەفەرەندۋمعا قاتىسۋ قۇقىعى بار قازاقستان رەسپۋبليكاسى ازاماتتارىنىڭ جالپى سانى 11734642 ادامدى قۇرادى. 2022 -جىلعى 5-ماۋسىمدا ق ر كونستيتۋتسياسىنا وزگەرتۋلەر مەن تولىقتىرۋلار ەنگىزۋ بويىنشا بۇكىلحالىقتىق داۋىس بەرۋگە 7985769 نەمەسە رەفەرەندۋمعا قاتىسۋ قۇقىعى بار ادامدار سانىنىڭ 68,05 پايىزىن قۇرادى.
وسىلايشا «رەسپۋبليكالىق رەفەرەندۋم تۋرالى» كونستيتۋتسيالىق زاڭنىڭ 31-بابىنا سايكەس رەفەرەندۋم وتكىزىلدى دەپ ەسەپتەلەدى. رەسپۋبيلكالىق رەفەرەندۋمعا شىعارىلعان كونستيتۋتسياعا وزگەرتۋلەر مەن تولىقتىرۋلار ەگەر ولار ءۇشىن وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ كەمىندە ۇشتەن ەكىسىندە داۋىس بەرۋگە قاتىسقان ازاماتتاردىڭ جارتىسىنان استامى جاقتاپ داۋىس بەرسە، قابىلداندى دەپ ەسەپتەلەدى»، - دەدى ق ر ورتالىق رەفەرەندۋم كوميسسياسىنىڭ ءتوراعاسى نۇرلان ءابدىروۆ.
ونىڭ ايتۋىنشا، ەلدىڭ بارلىق وڭىرىندە داۋىس بەرۋگە قاتىسقان ازاماتتاردىڭ 77,18 پايىزى نەمەسە 6163516 ادام كونستيتۋتسيالىق تۇزەتۋلەردى جاقتاپ داۋىس بەردى. بۇل 17-ايماقتىڭ ءارقايسىسىندا ابسوليۋتتىك كوپشىلىكتى قۇرايدى.
«كونستيتۋتسيالىق تۇزەتۋلەرگە قارسى داۋىس بەرگەن ازاماتتاردىڭ سانى داۋىس بەرۋگە قاتىسقانداردىڭ 18,66 پايىزىن قۇرادى نەمەسە 1490477 ادام. وسىلايشا، «رەسپۋبليكالىق رەفەرەندۋم تۋرالى» زاڭنىڭ 31، 34-باپتارى نەگىزىندە ەلىمىزدىڭ نەگىزگى زاڭىنا ۇسىنىلعان وزگەرتىستەر قابىلداندى دەپ ەسەپتەلىنەدى»، - دەدى ول.
اۆتور: مارلان جيەمباي