ادام سۋدى كوپ ىشسە نە بولادى؟
ادام ساعاتىنا 1 ليتر سۋدى قورىتىپ، سىڭىرە الۋعا شاماسى كەلەدى. سوندىقتان ءبىر ساعاتتىڭ ىشىندە ودان ارتىق سۇيىقتىق ءىشۋدىڭ قاجەتى جوق. ودان اسسا، اعزا سۋدان ۋلانۋى مۇمكىن.
ادام اعزاسىنىڭ سۋدان ۋلاناتىنى 2007 -جىلى بەلگىلى بولدى. امەريكا ازاماتى دجەننيفەر سترەيندج سۋ ءىشۋ بايقاۋىنا قاتىسىپ، ءۇش ساعاتتىڭ ىشىندە 6 ليتر سۋ ىشكەن ەكەن. ارينە، اعزاعا وڭاي ەمەس. بايقاۋ بىتە سالىسىمەن جۇرەگى اينىپ قۇسادى. ال ۇيىنە جەتكەندە باسى اينالىپ قۇلاپ، كوز جۇمادى. مىنە، سودان بەرى عالىمدار ادامنىڭ سۋدان ۋلاناتىنىن ءبىلىپ ءتۇرلى زەرتتەۋلەر جاسادى.
سۋدان زارداپ شەگەتىندەردىڭ كوبى، اسىرەسە، سپورتشىلار. ينتەنسيۆ جاتتىعۋ جاساپ، اعزاسى سۋساعاندا، شولدەپ كەلىپ كوپ سۋ ءىشىپ قويادى. ال تەز ىشكەن سۋ قاندى سۇيىلتىپ جىبەرەدى دە، جۇرەككە قىسىم تۇسەدى. 2005 -جىلى جۇرگىزىلگەن زەرتتەۋدە مارافونعا قاتىسقان 6 ادامنىڭ بىرەۋىندە گيپوناتريەميا پايدا بولاتىنى بەلگىلى بولعان.
گيپوناتريەميا دەگەنىمىز - قاننىڭ سۇيىلۋى. ادام كوپ سۋ ىشكەن كەزدە، ول سۇيىقتىقتى بۇيرەك ءسىڭىرىپ ۇلگەرمەيدى دە، وڭدەلمەگەن بولىگى جاسۋشاعا ءسىڭىپ، ونى ءىسىندىرىپ جىبەرەدى. ادام جاسۋشاسى وتە يىلگىش، جۇمساق كەلەدى. اسىرەسە، بۇلشىق ەت پەن ماي جاسۋشالارى. ءبىراق ميداعى نەيرون جاسۋشاسى «ىسىنگەندى» كوتەرە المايدى.
«باس قاڭقاسى وتە بەرىك، ال ءىشى مي- ارقا سۇيىقتىعى مەن قان تامىرلارىنان تۇرادى. قانعا سۇيىقتىق تولىپ كەتكەندە، باس قاڭقاسىنا ول سىيماي كەتەدى. ءولىم سودان بولادى. ياعني، گيپەرگيدراتاتسيا (سۋدان ۋلانۋ) ميدىڭ ىسىنۋىنەن بولاتىن جاعداي»، - دەپ تۇسىندىرەدى ديۋكا ۋنيۆەرسيتەتىنىڭ مەديتسينالىق ورتالىق نەيروبيولوگى ۆولفگانگ ليدتكە.
ادامنىڭ سۋدان ۋلانعانىن العاشقى بەلگىلەرىنەن- اق بىلۋگە بولادى. ياعني، باسى اينالىپ، جۇرەگى اينىپ قۇسادى. قان قىسىمى كوتىرەلىپ، كوزى قاراۋىتسا، تىنىسى تارىلىپ، ساناسى ساندىرىقتاي باستاسا - مۇنىڭ ءبارى سۋدان ۋلانۋدىڭ بەلگىلەرى.
ساۋ ادامنىڭ بۇيرەگى ءبىر كۇندە 20-28 ليتر سۋدى قورىتىپ شىعا الادى، ءبىراق ءبىر ساعاتتا 1 ليترگە عانا شاماسى جەتەدى. سوندىقتان ءبىر ساعاتتا وسى مولشەردەن اسپاعان ابزال.