كاسپي يتبالىعىن ساقتاۋ ءۇشىن ەرەكشە قورعالاتىن تابيعي اۋماق قۇرۋ جوسپارلانۋدا – مينيسترلىك

نۇر-سۇلتان. قازاقپارات - كاسپي تەڭىزىنىڭ قازاقستانعا قاراستى بولىگىندە يتبالىقتاردىڭ ءونىپ- ءوسۋى، ولاردى ساقتاۋ مەن تارالۋىنا قاتىستى عىلىمي-زەرتتەۋ جۇمىستارى ءجۇرىپ جاتىر، دەپ حابارلايدى قازاقپارات ءتىلشىسى ق ر ەكولوگيا، گەولوگيا جانە تابيعي رەسۋرستار مينيسترلىگى ۇسىنعان مالىمەتكە سۇيەنە وتىرىپ.

«عىلىمي دەرەكتەرگە سايكەس كاسپي تەڭىزىندە شامامەن 300 مىڭ يتبالىق بار. سول سياقتى كاسپي يتبالىعىنىڭ جويىلىپ كەتۋ قاۋپىنە قاتىستى ەشقانداي دالەلدى نەگىز جوق. ياعني عالىمداردىڭ پىكىرىنشە يتبالىقتاردىڭ جويىلۋ قاۋپىنىڭ جاقىن بولاشاقتا بولۋى ەكىتالاي. قازىرگى ۋاقىتتا گيدروبيولوگيا جانە ەكولوگيا ينستيتۋتى كاسپي تەڭىزىنىڭ قازاقستانعا قاراستى بولىگىندە يتبالىقتاردىڭ ءونىپ-ءوسۋى، ولاردى ساقتاۋ مەن تارالۋىنا قاتىستى عىلىمي-زەرتتەۋ جۇمىستارى ءجۇرىپ جاتىر. سونىمەن قاتار عىلىمي زەرتتەۋ ناتيجەسىن قورىتىندىلاي كەلە اتالعان ينستيتۋت يتبالىقتار مەكەندەيتىن جەرلەردى ساقتاۋعا قاتىستى ۇسىنىستار جاسايدى»، - دەپ جازىلعان قازاقپاراتتىڭ رەسمي ساۋالىنا بەرىلگەن جاۋاپتا.

مينيسترلىكتىڭ حابارلاۋىنشا، قازاقستان كاسپي يتبالىعىن ساقتاۋ جانە كوبەيتۋگە قاتىستى 2026-جىلعا دەيىنگى رەسەيمەن بىرلەسكەن ءىس-قيمىل جوسپارىنا قول قويدى.

«جوسپارعا سايكەس كاسپي يتبالىعىنىڭ مەكەندەۋ جانە كوبەيۋىن ساقتاۋ ءۇشىن ەرەكشە قورعالاتىن تابيعي اۋماق قۇرۋ جوسپارلانۋدا. ايتا كەتسەك، وسىدان 3 جىل بۇرىن اقتاۋدا كاسپي يتبالىعىن زەرتتەۋ جانە وڭالتۋ بويىنشا قازاقستانداعى العاشقى ورتالىق اشىلدى. بۇگىنگە دەيىن ورتالىقتا 40 تان استام يتبالىقتى ەمدەپ، وڭالتىپ تابيعي ورتاعا قايتا جىبەرىلدى»، - دەلىنگەن حابارلامادا.

ەسكە سالا كەتسەك، بيىلدىققا كاسپي تەڭىزىندەگى يتبالىقتاردىڭ قىرىلۋىنا قاتىستى بىرنەشە جاعداي تىركەلدى. العاش ءساۋىر ايىندا كاسپيي تەڭىزىنىڭ ماڭعىستاۋ بولىگىنەن 94 ءولى يتبالىق تابىلعان ەدى.

ەكولوگيا مينيسترلىگى ۇسىنعان اقپاراتقا سايكەس بيىل 5 ايدىڭ ىشىندە كاسپي تەڭىزى جاعالاۋىنان 219 يتبالىقتىڭ ولەكسەسى تابىلدى. سونداي-اق اتالعان ۆەدومستۆو كاسپي تەڭىزىندە يتبالىقتاردىڭ قىرىلۋ سەبەبىنىڭ ءالى انىقتالماعانىن جەتكىزدى.