رەفەرەندۋمعا قاتىسۋ كورسەتكىشى بويىنشا الماتى ەڭ سوڭىندا تۇر
بۇل تۋرالى ەۋرازيالىق فرانچايزينگ قاۋىمداستىعىنىڭ پرەزيدەنتى، ەكونوميست، قوعام بەلسەندىسى بەكنۇر قيسىقوۆ بريفينگ بارىسىندا ءمالىم ەتتى، دەپ حابارلايدى قازاقپارات ءتىلشىسى.
سپيكەردىڭ سوزىنشە، الماتى قالاسى بۇعان دەيىنگى سايلاۋلاردا دا جوعارى كورسەتكىش كورسەتپەگەن.
«بۇل - ءىرى قالالارعا ءتان جاعداي. مىسالى، نيۋ- يورك، ىستانبۇلدا دا ساياسي ناۋقانعا قاتىسۋ ستاتيستيكاسى وسىنداي. الماتى دا سونداي فەنومەنگە كىرىپ تۇر دەپ ويلايمىن. دەگەنمەن رەفەرەندۋم كوپشىلىكتىڭ قىزىعۋشىلىعىن وياتتى. ماسەلەن، قالادا جۇمىس ىستەپ جۇرگەن وزگە ايماقتىڭ ادامدارى دا داۋىس بەرۋ مۇمكىندىگى پايدالانا المادى. كوبى تىركەۋ تالونىن الدىن الا الماپپىز دەپ وكىنىپ جاتتى. جالپى، رەفەرەندۋم جاقسى دەڭگەيدە ءوتتى»، - دەيدى بەكنۇر قيسىقوۆ.
الماتىدا ساعات 20.00-دە رەفەرەندۋم ۋچاسكەلەرىنىڭ ەسىگى جابىلىپ، بيۋللەتەندەردى ساناۋ باستالدى.
ايتا كەتەيىك، الماتىدا جالپى حالىقتىق رەفەرەندۋمدا 574 ۋچاسكە جۇمىس ىستەدى.
اۆتور: الما مۇقانوۆا