ەلىمىزدىڭ بۇكىل وڭىرىندە رەفەرەندۋم ۋچاسكەلەرىندە داۋىس بەرۋ اياقتالدى

نۇر-سۇلتان. قازاقپارات - استانا ۋاقىتىمەن ساعات 21.00-دە ەلىمىزدىڭ بارلىق وڭىرىندەگى رەفەرەندۋم ۋچاسكەلەرىندە داۋىس بەرۋ اياقتالدى، دەپ حابارلايدى قازاقپارات ءتىلشىسى.

بۇعان دەيىن ەلىمىزدىڭ 12 وڭىرىندەگى 8089 جانە 10 شەت مەملەكەتتەگى قازاقستان ەلشىلىكتەرى جانىنان اشىلعان 12 رەفەرەندۋم ۋچاسكەسىندە جۇمىس اياقتالىپ، كوميسسيا مۇشەلەرى داۋىس ساناۋعا كىرىسكەن بولاتىن.

ال ءدال قازىر ساعات 21.00-دە اقتوبە، اتىراۋ، باتىس قازاقستان، ماڭعىستاۋ جانە قىزىلوردا وبلىستارىنداعى 1858 ۋچاسكەدە ءوڭىر تۇرعىندارى داۋىس بەرىپ بولدى. سونىمەن قاتار شەت ەلدەردەگى 5 ۋچاسكە دە جۇمىسىن توقتاتتى.

ونىڭ بارلىعىندا كوميسسيا مۇشەلەرى داۋىس ساناۋعا كىرىستى. قازىرگى ۋاقىتتا شەت ەلدەردەگى 48 ۋچاسكەدە عانا داۋىس بەرۋ ءجۇرىپ جاتىر.

ەستەرىڭىزگە سالا كەتسەك، ساعات 20.00-دەگى جاعداي بويىنشا 7936655 ادام داۋىس بەردى. بۇل - داۋىس بەرۋ تىزىمىنە ەنگىزىلگەن ازاماتتاردىڭ 67,65 پايىزىن قۇرايدى.

اۆتور: مارلان جيەمباي