باس ءمۇفتي ناۋرىزباي قاجى تاعان ۇلى رەفەرەندۋمدا داۋىس بەردى
«بۇگىن وسى ەلدىڭ ازاماتى رەتىندە ادىلەتتى، جاڭا قازاقستان قۇرۋ جولىندا جاسالىپ جاتقان يگى باستامالاردى قولداپ، رەفەرەندۋمعا قاتىسىپ، ءوز تاڭداۋىمدى جاسادىم. ءبىز ەل بولاشاعىن جارقىن ەتۋ جولىنداعى تاريحي قادامداردى قولدايمىز جانە حالىقتى بىرلىك پەن ىنتىماققا ۇندەيمىز. بۇگىنگى رەفەرەندۋم جورالى جۇرتىمىزدىڭ بىرلىگى مەن بەرەكەسى ءۇشىن وڭ سەرپىن بەرەدى دەگەن سەنىمدەمىن. اللا تاعالا ەلىمىزگە اماندىق، جۇرتىمىزعا تىنىشتىق ءناسىپ ەتىپ، تاۋەلسىزدىگىمىزدى باياندى ەتكەي. ءامين»، - دەدى باس ءمۇفتي ناۋرىزباي قاجى تاعان ۇلى بۇقارالىق اقپارات قۇرالدارىنا بەرگەن سۇحباتىندا.
ەستەرىڭىزگە سالا كەتەيىك، ساعات 14.00 دەگى جاعداي بويىنشا 6262973 ادام داۋىس بەردى.
بۇل - تىزىمگە ەنگىزىلگەن ازاماتتاردىڭ 53,43 پايىزى. زاڭعا سايكەس، ەگەر رەفەرەندۋمعا قاتىسۋعا قۇقىعى بار ازاماتتاردىڭ جارتىسىنان كوبى داۋىس بەرۋگە قاتىسقان بولسا رەفەرەندۋم وتكىزىلگەن دەپ سانالادى.
وسىلايشا، اۋماقتىق رەفەرەندۋم كوميسسيالارىنىڭ دەرەكتەرىنە سايكەس، زاڭمەن بەلگىلەنگەن كەلۋشىگە قول جەتكىزىلىپ وتىر.