تابەتتىڭ قاشۋى قانداي اۋرۋلارمەن بايلانىستى
30 مامىر 12:03

تابەتتىڭ قاشۋى قانداي اۋرۋلارمەن بايلانىستى

نۇر-سۇلتان. قازاقپارات - ​ ادامنىڭ كەي ساتتە اياق استىنان اسقا تابەتى تارتپاي، تاماق ءىشۋ جۇيەسى بۇزىلادى. مۇنىڭ كەي اۋرۋلارمەن قاتىسى بولۋى مۇمكىن.

1. اياق استىنان تاماق ىشكىسى كەلمەي قالۋ، اۋزىنىڭ ءدامى كەتۋ، مۇرنى بىتەلىپ، سۋ اعۋ، ءتىلىنىڭ اق وڭەزى مولايۋ - سىرەسپە تۇماۋدىڭ بەلگىسى.

2. تابەتى توقتاۋ، استان جەرۋ، مايلى تاماق جەسە ءىشى ءوتۋ - كوكباۋىر، اسقازان قىزمەتىنىڭ بۇزىلعانىنىڭ بەلگىسى.

3. اس ىشكىسى كەلمەۋ جانە اۋزى كەرمەك تاتۋ، مايلى تاماق كورسە جۇرەگى اينۋ - باۋىر، ءوت اۋرۋلارىنىڭ بەلگىسى.

4. تاماق جەگەن سوڭ ءبىر-ەكى ساعاتتان كەيىن قۇرساعىنىڭ جوعارى بولىگى وڭ جاق يىعىنا دەيىن سولقىلداپ اۋرۋ - ءوت جولى اۋرۋىنا شالدىققاننىڭ بەلگىسى.

5. تاماق جەگەن سوڭ ءىشى كەبۋ، جۇرەگى اينۋ، اسقازانى اۋىرۋ، اندا- ساندا ءىشى قاتۋ نەمەسە ءىشى ءوتۋ - اسقازان تومەندەگەندىگىنىڭ بەلگىسى.

6. اسقا تابەتى بولماۋ - اسقازان، ىشەك، باۋىر، ءوت، ۇيقى بەزى اۋرۋلارىنىڭ بەلگىسى بولۋدان سىرت، جۇرەك قۋاتى السىرەۋ، نەسەپتەن ۋلانۋ، وكپە تۋبەركۋلەزى سياقتى اۋرۋلاردىڭ اسەرى بولۋى مۇمكىن.

7. اسقا مۇلدە تابەتى بولماي قالۋ - اسقازان قاتەرلى ىسىگىنىڭ اسەرى.

8. تاماقتى تويىپ ىشكەن سوڭ قۇرساعىنىڭ جوعارى جاعى ەكى جاق جاۋىرىنىنا دەيىن سوزىلىپ، كەنەت اۋرۋ، وعان قوسا جۇرەگى اينۋ، قۇسۋ نەمەسە دەنەسى قىزۋ - ۇيقى بەزى جەدەل قابىنۋىنىڭ بەلگىسى.

9. قارتتار تاماق ىشكەن سوڭ ءىشى كەۋىپ، اسقا تابەتى ازايىپ، بارعان سايىن ارىقتاسا، بىردەن دارىگەرگە كورىنۋ قاجەت. سەبەبى، بۇل اسقازان قاتەرلى ىسىگىنىڭ بەلگىسى بولۋى مۇمكىن، دەپ جازادى مەديتسينا عىلىمدارىنىڭ دوكتورى جاسان زەكەي ۇلى.


جاڭالىقتار