مەديتسينالىق ۇيىمدار قوسىمشا شىعىندارعا اقى سۇراماۋى كەرەك

نۇر-سۇلتان. قازاقپارات - پاتسيەنتتەر تەگىن مەديتسينالىق كومەكتىڭ كەپىلدىك بەرىلگەن كولەمى (ت م ك ك ك) نەمەسە مىندەتتى الەۋمەتتىك مەديتسينالىق ساقتاندىرۋ جۇيەسى (م ءا م س) بويىنشا ۇسىنىلاتىن مەديتسينالىق كومەك ءۇشىن قوسىمشا اقى تولەمەۋى ءتيىس، دەپ حابارلايدى قازاقپارات.

ۆەدومستۆونىڭ باسپا ءسوز قىزمەتىنىڭ مالىمەتىنشە، پلەنكا مەن وپتيكالىق جەتكىزگىش ءۇشىن، ياعني رەنتگەن، كومپيۋتەرلىك توموگرافيا نەمەسە ماگنيتتى- رەزونانستىق توموگرافيا ناتيجەلەرىن جازاتىن ديسكىگە قوسىمشا اقى تولەۋدىڭ قاجەتى جوق. بۇل شىعىندار ت م ك ك ك نەمەسە م ءا م س ەسەبىنەن كورسەتىلەتىن قىزمەتتەردىڭ قۇنىن جاساقتاۋ كەزىندە ەسكەرىلگەن.

«سول سياقتى، ەمحانادان نەمەسە پاتسيەنتتىڭ وزىنەن شىعىس ماتەريالدارىنا قوسىمشا شىعىنداردىڭ وتەلۋىن تالاپ ەتۋگە قۇقىعى جوق. سوندىقتان مۇنداي كەز-كەلگەن تالاپ زاڭسىز. ستەرنالدى پۋنكتسياعا ارنالعان ينەگە كەلەتىن بولساق، ول قىزمەت قۇنىنا كىرەدى جانە م ءا م س ەسەبىنەن تولىق ۇسىنىلادى. سىزدەن ءدارى-دارمەكتەردى كۇندىزگى ستاتسيونارعا اكەلۋدى نەمەسە سول جەردە تولەم جاساۋدى سۇراۋى دا مۇمكىن. ءسىز ونى تولەۋگە ءتيىس ەمەسسىز. ستاتسيوناردى الماستىرعان جاعدايدا دا، ياعني كۇندىزگى ستاتسيوناردا ەمدەۋشى دارىگەردىڭ جولداماسى بولسا، نەگىزگى اۋرۋدى ەمدەۋ تولىقتاي ت م ك ك ك نەمەسە م ءا م س قاراجاتى ەسەبىنەن جۇرگىزىلەدى، دارىلىك زاتتار مەن مەديتسينالىق بۇيىمدار تەگىن ۇسىنىلادى»، - دەپ ءتۇسىندىردى مەكەمەدەن.

ەگەر مەديتسينالىق كومەك كورسەتۋدەن باس تارتقان جاعدايدا نەمەسە شىعىن ماتەريالدارى ءۇشىن قوسىمشا اقى تولەۋ سۇرالاتىن بولسا، پاتسيەنتتەردى قولداۋ قىزمەتىنە نەمەسە الەۋمەتتىك مەديتسينالىق ساقتاندىرۋ قورىنا حابارلاسۋعا بولادى.