كاسپي تەڭىزى بويىنشا جوعارى دەڭگەيدەگى جۇمىس توبىنىڭ وتىرىسى ءوتتى
قازاقپارات بۇل تۋرالى ق ر سىرتقى ىستەر مينيسترلىگىنە سىلتەمە جاساپ حابارلايدى.
كەلىسسوزدەرگە قازاقستان رەسپۋبليكاسىنىڭ (باسشىسى - ز. ا. امانجولوۆا)، ازەربايجان رەسپۋبليكاسىنىڭ (باسشىسى - ح. ا. حالافوۆ)، رەسەي فەدەراتسياسىنىڭ (باسشىسى - م. ي. پەتراكوۆ) جانە تۇرىكمەنستاننىڭ (باسشىسى - م. گ. اتادجانوۆ) دەلەگاتسيالارى قاتىستى.
وتىرىستا يران يسلام رەسپۋبليكاسى دەلەگاتسياسىنىڭ باسشىسى م. باريماني ءتوراعالىق ەتتى.
«وتىرىستىڭ كۇن تارتىبىنە سايكەس كاسپي تەڭىزىندە تىكەلەي باستاپقى سىزىقتاردى بەلگىلەۋ ادىستەمەسى تۋرالى كەلىسىم جوباسى تالقىلاندى. بۇل قۇجاتتى كەلىسۋ ودان ءارى جالعاساتىن بولادى.
تاراپتار تۇرىكمەنستاندا ءوتۋى جوسپارلانعان التىنشى كاسپيي سامميتىنە دايىندالۋعا قاتىستى ماسەلەلەردى قاراستىردى، سونداي-اق كاسپيي تەڭىزىندەگى ىنتىماقتاستىقتىڭ ءتۇرلى باعىتتارى بويىنشا پىكىر الماستى.
دەلەگاتسيالار وتكەن كەلىسسوزدەرگە وڭ باعا بەرىپ، وتىرىستى جوعارى دەڭگەيدە ۇيىمداستىرعانى ءۇشىن يران يسلام رەسپۋبليكاسىنا ريزاشىلىقتارىن ءبىلدىردى»، - دەلىنگەن حابارلامادا.
ق ر س ءى م مالىمەتىنشە، كاسپي تەڭىزى ماسەلەلەرى جونىندەگى جوعارى دەڭگەيدەگى جۇمىس توبىنىڭ كەلەسى وتىرىسى تۇرىكمەنستاندا وتەدى. ونىڭ داتاسى ديپلوماتيالىق ارنالار ارقىلى كەلىسىلەتىن بولادى.