ەرلان قارين مەملەكەتتىك تۋدى قورلاعان انشىلەرگە قاتىستى پىكىرىن ايتتى
كونسەرت ۋاقىتىندا توپ مۇشەلەرى قازاقستاننىڭ مەلەكەتتىك ءرامىزى - تۋعا قۇرمەت كورسەتپەي، ساحنادا بالاعات سوزدەر ايتقان.
الەۋمەتتىك جەلى قولدانۋشىلارى «يرينا كايراتوۆنا» توبىنىڭ مۇشەسى ازامات ماركلەنوۆ پەن اسحات جولشييەۆتىڭ (Shiza) ساحناداعى ارەكەتىن ايىپتاپ، زاڭ جۇزىندە شارا قولدانۋىن تالاپ ەتىپ وتىر.
بەلگىلى بولعانداي، ءانشى اسحات جولشيەۆ قازاقستاننىڭ تۋىن قولىنا وراپ، كەيىن كورەرمەندەرگە لاقتىرىپ جىبەرگەن. سوسىن تۋعا قاتىستى ەسكەرتۋ جاساعان ورتالىقتىڭ اكىمشىسىنە: «بىزدە ءبارى جاقسى، كەشىرىڭىزدەر، ونداي-ونداي بولىپ تۇرادى. بۇل اكىمشىلىك ايىپپۇل ەكەن عوي»، دەپ جاۋاپ بەرەدى.
وسى وقيعادان كەيىن تانىمال رەپەردىڭ 4 - ماۋسىمدا تۇركىستان قالاسىندا جوسپارلانعان كونسەرتى وتپەيتىن بولدى. تۋعا قۇرمەت كورسەتپەگەن اسحات جولشيەۆتىڭ ارەكەتىنە تۇركىستان قالاسى تۇرعىندارى دا نارازى بولىپ، 28 - مامىردا تۇركىستان قالاسىندا وتەدى دەپ جوسپارلانعان Ninety One توبىنىڭ، 4 - ماۋسىمدا وتەدى دەپ جوسپارلانعان Shiza-نىڭ كونيەرتىن بولدىرماۋ تۋرالى ۇسىنىس جولداپ، «كەرۋەن ساراي» تۋريستىك كەشەنىنىڭ باسشىلىعىنا جۇگىندى. ال، كەشەن اكىمشىلىگى جوعارىدا اتالعان انشىلەرمەن كەلىسىمدى بۇزعانىن حابارلاپ وتىر.
الماتىداعى كونسەرتتە بولعان وقيعادان كەيىن ق ر مەملەكەتتىك حاتشىسى ەرلان قارين دە پىكىرىن ايتىپ، تۋىمىزدى نەمەسە باسقا دا رامىزدەرىمىزدى قورلاعان ارەكەتتەر قۇقىقتىق-نورماتيۆتىك اكتىلەرگە سايكەس جاۋاپكەرشىلىككە تارتىلاتىنىن ەسكەرتتى.
«ءبىزدىڭ بىلۋىمىزشە، كونسەرتتى «NS group» ج ش س ۇيىمداستىرعان. Shiza لاقاپ اتىن يەلەنگەن ازاماتتىڭ مەملەكەتتىك تۋعا قاتىستى ارەكەتى ءجىتى تەكسەرىلىپ، وقيعانىڭ ءمان-جايى انىقتالۋى قاجەت. كونسەرتتە ىشىمدىك ىشىلگەندىكتەن مۇنداي ارەكەتكە جول بەرىلگەن دەپ ويلايمىن. جاستار وسى ءبىر كەلەڭسىز وقيعادان ساباق الىپ، قاراپايىم مادەنيەت پەن ەتيكەتتى مەڭگەرۋى قاجەت. سونىمەن قاتار، مۇنداي اۋقىمدى ءىس-شارالاردى ۇيىمداستىرۋشىلار دا جاۋاپكەرشىلىكتى سەزىنۋى كەرەك. ولار كونسەرت ۇيىمداستىرعان كەزدە ىشىمدىك ىشىلۋىنە جول بەرمەۋگە، باسقا دا وقىس وقيعالاردىڭ الدىن-الۋعا ءتيىس. ءبىز مەملەكەتتىلىگىمىزدىڭ، تاۋەلسىزدىگىمىزدىڭ سيمۆولى سانالاتىن مەملەكەتتىك تۋعا زور قۇرمەتپەن قاراۋىمىز قاجەت. ونى اياقاستى ەتۋگە جول بەرمەۋىمىز كەرەك. تۋىمىزدى نەمەسە باسقا دا رامىزدەرىمىزدى قورلاعان ارەكەتتەر قۇقىقتىق-نورماتيۆتىك اكتىلەرگە سايكەس جاۋاپكەرشىلىككە تارتىلادى. ويتكەنى، زاڭ بارشاعا ورتاق. ەلىمىزدىڭ ءاربىر ازاماتى مەملەكەتتىك تۋدى قۇرمەتتەپ، قاستەر تۇتۋى قاجەت دەپ سانايمىن»، - دەپ جازدى ەرلان قارين.
بۇگىن «يرينا كايراتوۆنا» توبىنىڭ مۇشەسى ازامات ماركلەنوۆ بالۋان شولاق اتىنداعى سپورت سارايىندا بولعان وقيعا ءۇشىن كەشىرىم سۇرادى.
halyq-uni.kz