مەملەكەتتىك حاتشى سولتۇستىك قازاقستان وبلىسىنىڭ جۇرتشىلىعىمەن كەزدەستى
27 مامىر 21:23

مەملەكەتتىك حاتشى سولتۇستىك قازاقستان وبلىسىنىڭ جۇرتشىلىعىمەن كەزدەستى

پەتروپاۆل. قازاقپارات - ق ر مەملەكەتتىك حاتشىسى ەرلان قارين ۇلتتىق قوعامدىق سەنىم كەڭەسىنىڭ مۇشەلەرىمەن بىرگە سولتۇستىك قازاقستان وبلىسىنىڭ جۇرتشىلىعىمەن ءبىرقاتار كەزدەسۋ وتكىزدى، دەپ حابارلايدى قازاقپارات اقورداعا سىلتەمە جاساپ.

ەرلان قارين الدىمەن وبلىس اكتيۆىمەن كەزدەستى.

وبلىس اكىمى قۇمار اقساقالوۆ ءوڭىردىڭ الەۋمەتتىك-ەكونوميكالىق دامۋى مەن ينفراقۇرىلىمدىق جوبالاردىڭ ورىندالۋى جايىندا باياندادى. ءوز كەزەگىندە مەملەكەتتىك حاتشى الداعى كونستيتۋتسيالىق رەفورمانىڭ نەگىزگى باعىتتارى تۋرالى ايتتى.

سونداي-اق جۇزەگە اسىرىلاتىن رەفورما حالىقتىڭ ەلدى باسقارۋ ىسىنە ارالاسۋىن ارتتىرۋعا جانە ساياسي پروتسەستەردى دەموكراتيالاندىرۋ ءىسىن ودان ءارى جالعاستىرۋعا مۇمكىندىك بەرەتىنىنە نازار اۋداردى.

ەرلان قارين اتاپ وتكەندەي، وسى سەبەپتى كونستيتۋتسيالىق رەفورما جالپى قوعامنىڭ قولداۋىنا يە. ونى سوڭعى جۇرگىزىلگەن الەۋمەتتىك زەرتتەۋلەردىڭ ناتيجەسى كورسەتىپ وتىر.

مەملەكەتتىك حاتشى مۇنان كەيىن وڭىردەگى قوعامدىق كەڭەستەردىڭ مۇشەلەرىمەن كەزدەستى.

كەزدەسۋگە قاتىسۋشىلار قوعام مەن بيلىك ينستيتۋتتارى اراسىنداعى اشىق ءارى سىندارلى ديالوگتى دامىتۋ تۇرعىسىندا وي ءبولىستى.

ەرلان قارين كونستيتۋتسياعا تۇزەتۋلەر ەنگىزۋدى ازىرلەۋ جۇمىسىنا ەلىمىزگە بەلگىلى ساراپشىلار مەن قوعام وكىلدەرى تارتىلعانىنان حاباردار ەتتى.

سوندىقتان الداعى كونستيتۋتسيالىق رەفورمانى قوعامنىڭ ۇسىنىسىنا نەگىزدەلىپ جاسالدى دەۋگە بولادى.

جۇمىس ساپارىنىڭ بارىسىندا قر مەملەكەتتىك حاتشىسى وڭىردەگى جاستار ۇيىمدارىنىڭ بەلسەندىلەرىمەن دە جۇزدەستى. وندا جاس ۇرپاقتىڭ قوعامدىق جۇمىستارعا بەلسەندى ارالاسۋىن ارتتىرۋ جانە جاستارعا قاتىستى جوبالاردى قولداۋ ماسەلەلەرى قوزعالدى.

كەزدەسۋ قورىتىندىسى بويىنشا ە. قارين جاستاردىڭ رەفەرەندۋم مەن ساياسي رەفورمالارعا ۇلكەن قىزىعۋشىلىق تانىتىپ وتىرعانىن اتاپ ءوتتى.

وبلىس جۇرتشىلىعى ەلىمىزدە اتقارىلىپ جاتقان ساياسي جاڭعىرۋ ۇدەرىستەرىن ءجىتى باقىلاپ وتىرعانىن ايتىپ، قولعا الىنعان رەفورمالاردى جۇزەگە اسىرۋعا دايىن ەكەندەرىن جەتكىزدى.

جاڭالىقتار