شەتەلدىك كومپانيالاردىڭ باسقا جەرگە كوشۋىنە قولايلى جاعداي جاساۋعا ايرىقشا نازار اۋدارۋدى ۇسىنامىن – توقايەۆ
27 مامىر 18:21

شەتەلدىك كومپانيالاردىڭ باسقا جەرگە كوشۋىنە قولايلى جاعداي جاساۋعا ايرىقشا نازار اۋدارۋدى ۇسىنامىن – توقايەۆ

نۇر- سۇلتان. قازاقپارات - قازاقستان پرەزيدەنتى قاسىم- جومارت توقايەۆ ە ا ە و- عا مۇشە ەلدەردىڭ جاڭا ينۆەستيتسيالىق جوبالارىن اشۋدى ۇسىندى، دەپ حابارلايدى قازاقپارات ءتىلشىسى.

پرەزيدەنت قازىرگى گەوساياسي جاعدايدىڭ ۇزاققا سوزىلاتىنىن جانە بۇعان دايىن بولۋ كەرەكتىگىن اتاپ ءوتتى.

«وسىعان بايلانىستى، ءبىزدىڭ ويىمىزشا، ينتەگراتسيالىق بىرلەستىكتىڭ قازىرگى جاي- كۇيى مەن قاجەتتىلىكتەرىنە جاۋاپ بەرەتىن قازاقستاننىڭ ەكى باستاماسىن قاراستىرۋدى ۇسىنامىن. ءبىرىنشى باستاما - 2020 -جىلعى جەلتوقساندا ءبىز وداقتىڭ نەگىزگى قۇجاتى – ە ا ە و دامۋ ستراتەگياسىن قابىلدادىق. ونى ىسكە اسىرۋ ءۇشىن باسىم سالالاردا ءتيىمدى كووپەراتسيا مەن ساۋدا- ەكونوميكالىق بايلانىستاردى قۇرۋ جۇمىستارى باستالدى. ەندى ناقتى جوبالار مەن ناقتى ناتيجەلەر قاجەت»، - دەدى مەملەكەت باسشىسى جوعارعى ەۋرازيالىق ەكونوميكالىق كەڭەستىڭ وتىرىسىندا.

ول ءۇشىن پرەزيدەنت ە ا ە و- عا مۇشە ەلدەردىڭ بىرلەسكەن جوبالارىن اياقتاۋدى جەدەلدەتۋ مەن جاڭا ينۆەستيتسيالىق جوبالارعا باستاماشىلىق جاساۋ كەرەگىن ايتتى. قاسىم- جومارت توقايەۆ كەڭەس قاتىسۋشىلارىنا قازىرگى جاعدايلار مەن ينتەگراتسيالىق بىرىگۋ ۇدەرىسىنە ساي كەلەتىن قازاقستاننىڭ ەكى ماڭىزدى باستاماسىن قاراستىرۋدى ۇسىندى.

«ماڭىزدى جوبالار مەن ناقتى ناتيجەلەر كەرەك. بۇل ءۇشىن ەۋرازيالىق ەكونوميكالىق وداققا مۇشە مەملەكەتتەردىڭ بىرلەسكەن جوبالارىن تەزىرەك اياقتاۋ قاجەت، سونداي- اق جاڭا ينۆەستيتسيالىق جوبالار ۇسىنۋ كەرەك. ايماقتىق جانە جاھاندىق باسەكەگە قابىلەتتىلىكتى قامتاماسىز ەتە وتىرىپ، بيزنەس سالاسىنداعى ىقپالداستىقتى كۇشەيتۋ، ترانسقۇرلىقتىق دالىزدەرىمىزدىڭ جىلدامدىعىن جەتىلدىرۋ قاجەت. سانكتسيالاردى ەسكەرە وتىرىپ، شەتەلدىك كومپانيالاردىڭ باسقا جەرگە كوشۋى ءۇشىن قولايلى جاعداي جاساۋ ماسەلەسىنە ايرىقشا نازار اۋدارۋدى ۇسىنامىن. الەمدىك الپاۋىت ەلدەر دە ەۋرازيالىق ەكونوميكالىق وداققا مۇشە مەملەكەتتەردىڭ گەوەكونوميكالىق ورنالاسۋ جاعىنان باسىمدىققا يە ەكەنىن جاقسى بىلەدى. سوندىقتان 180 ميلليون تۇتىنۋشىسى بار نارىعىمىزدىڭ الەۋەتىن ەلەمەۋ مۇمكىن ەمەس. اتالعان شارالاردى 12 ايدىڭ ىشىندە جۇزەگە اسىرۋدى ۇسىنامىن»، - دەدى قازاقستان پرەزيدەنتى.

بۇعان دەيىن پرەزيدەنت ە ا ە و قىزمەت ەتكەن جىلدارى قازاقستاننىڭ ءوزارا ساۋداسى 33 پايىزعا، ەكسپورتى 55 پايىزعا ارتقانىن مالىمدەگەن ەدى. سونىمەن بىرگە، ق. توقايەۆ وسىناۋ كۇردەلى ۋاقىتتا «ءۇشىنشى» ەلدەرمەن جانە ينتەگراتسيالىق بىرلەستىكتەرمەن سەرىكتەستىكتى كەڭەيتۋ مەن تەرەڭدەتۋدىڭ ماڭىزى ارتقانىن ايتتى.

جاڭالىقتار