16:49, 27 - مامىر 2022 | GMT +6
ەرتەڭ استانادا ۆەلوسيپەدشىلەر شەرۋى وتەدى
نۇر- سۇلتان. قازاقپارات - ەرتەڭ ەلوردادا جاڭا ۆەلوماۋسىمنىڭ اشىلۋىنا وراي ۆەلوسيپەدشىلەر شەرۋى وتەدى، دەپ حابارلايدى قازاقپارات قالا اكىمدىگىنە سىلتەمە جاساپ.
شاراعا تىلەك بىلدىرگەن بارلىق ازامات قاتىسا الادى. قاتىسۋشىلارعا ەكى ءتۇرلى ديستانتسيا ۇسىنىلادى:
- كىشى قاشىقتىق - 3 ك م. شەرۋ ۇركەر (يلينكا) ەلدى مەكەنىنىڭ «جاسىل بەلدەۋ» ساياباعىندا باستالىپ، وسى جەردە مارەگە جەتەدى؛
- ۇلكەن قاشىقتىق - 20 ك م. شەرۋ اينالما جولداعى ۆەلوتراسسادان (قوسشى قالاسىنا قاراي جول بويىندا) باستالىپ، ۇركەر (يلينكا) ەلدى مەكەنىنىڭ «جاسىل بەلدەۋ» ساياباعىندا اياقتالادى. قاتىسۋعا نيەت بىلدىرۋشىلەردى تىركەۋ 28-مامىر كۇنى ساعات 09:00 دەن 09:30 عا دەيىن جالعاسادى. باستالۋ ۋاقىتى - ساعات 10:00.
اكىمدىك مالىمەتىنە سايكەس، ۆەلوشەرۋ سپورتتىق جارىس سانالمايدى. باستى ماقسات - سالاۋاتتى ءومىر سالتىن ناسيحاتتاۋ جانە ازاماتتاردى دەنە شىنىقتىرۋمەن، ياعني ۆەلوسپورتپەن بەلسەندى شۇعىلدانۋعا تارتۋ.