«باسقالارى ءتۇرىمدى كورىپ، قورقىپ قاشاتىن»: ومىرگە استىڭعى جاق سۇيەكسىز كەلگەن ازامات كورگەن قيىندىقتارى جايلى ايتتى
سيرەك دەرتكە شالدىقسا دا، ول تاعدىرىنا مويىماعانىن ايتادى. بۇگىندە امەريكالىق ازامات ۇيلەنىپ، بوس ۋاقىتىن ايەلىمەن بىرگە ساياحاتتاۋعا ارنايدى ەكەن.
دجوزەف ۋيليامنىڭ سوزىنشە، بالا كەزىندە ونىڭ ءتۇرىن كورگەندەر قورقىپ، ءتىپتى قاشىپ كەتەتىن بولعان. تۋا بىتكەن اۋرۋعا شالدىققان ول سويلەي المايدى، ءبىراق ءوز ويىن ىم- يشارالاپ، قاعازعا نە تەلەفونعا جازىپ جەتكىزەتىن كورىنەدى. ال تاماقتى ارنايى تۇتىكشە ارقىلى قابىلدايدى ەكەن.
«تۋعان انام مەنى بوسانعان كەزدە ەسەڭگىرەپ قالىپتى. نەگىزى مەن ەگىزدىڭ سىڭارىمىن، الايدا باۋىرىم قۇرساقتا شەتىنىپ كەتكەن. ءومىر ەسىگىن اشقانىما بىرنەشە كۇن وتپەي جاتىپ، وتاعا ءتۇستىم. دارىگەرلەر جاساندى تۇردە استىڭعى جاق ورناتپاق بولىپتى. الايدا ەسەيە كەلە مەنىڭ اعزام بوگدە زاتتى قابىلداماي المادى. مۇنداي قيىندىققا شىداماعان تۋعان اتا- انام مەنەن باس تارتقان. سوندىقتان وزگە وتباسىنىڭ تاربيەسىن كورىپ ءوستىم.
وسىلاي تۋعانىم ءۇشىن قاتتى قينالدىم. دەگەنمەن ەر جەتە كەلە بۇل دەرتىمە مويىنسۇنباۋدى ۇيرەندىم. مەن دۇرىس تىنىس الىپ، تاماقتانىپ، سويلەي دە المايمىن. اس ءىشۋ ءۇشىن اسقازانىما، دەمالۋ ءۇشىن موينىما تۇتىكشە ورناتىلعان. باسقالارىمەن قارىم- قاتىناسقا ءتۇسۋ ءۇشىن ەكى جاسىمنان باستاپ، ىم- يشارا ءتىلىن ۇيرەندىم. ەسەيگەن سوڭ جازۋدى مەڭگەردىم»، - دەيدى دجوزەف.
امەريكالىق ازامات بالا كۇنىندە كەمسىتۋشىلىككە ءجيى ۇشىراعانىن ءسوز ەتتى. تۇرىنەن سەسكەنگەندىكتەن ادامدار ونى اينالىپ وتەتىن بولعان. سول كەزدە دجوزەف قاراڭعى بولمەگە كىرىپ جىلاپ، ءتىپتى وزىنەن قول سالۋدى ويلاعانىن جاسىرمادى. ءبىراق كەيىننەن ەر ادام بۇل جاعدايدى وزگەرتە المايتىنىن، ادامدارعا ءوزىنىڭ شىن مانىندە قانداي ەكەنىن كورسەتۋ كەرەكتىگىن تۇسىنگەن.
ء«وزىمنىڭ باسقالاردان وزگەشە، ءتۇرىمنىڭ ۇسقىنسىز ەكەنىن بىلەمىن. ءبىراق مەن دە جۇرەگىم، جانىم، سەزىم مەن ەسىم بار اداممىن عوي. باسقالاردىڭ ماعان دا ادام رەتىندە قۇرمەتپەن قاراعانىن قالايمىن. مەنى اينالىپ قاشىپ، ساۋساقپەن كورسەتىپ، ارتىمنان ءسوز ايتقانشا، وزىمە كەلىپ، سۇراق قويىپ، اڭگىمەلەسسە ەكەن دەيمىن»، - دەيدى ول.
ءوزىمدى قابىلداۋعا ۇزاق ۋاقىت كەتتى دەگەن ول كەيىننەن ماحابباتىن تاپقانىن جەتكىزدى.
«بالا كەزىمدە اينالامداعىلار مەنى قاتتى قورعاشتاعاندىقتان، كوپ نارسەدەن قۇر قالاتىنمىن. بىرەۋ مەنى شەكتەگەندى ۇناتپايتىنمىن. قىزدارمەن دە تۇرىمنەن ۇيالعاندىقتان كەزدەسە الماي ءوستىم. ءبىراق ءوزىمدى قابىلداپ، باقىتتى بولۋعا لايىق جان ەكەنىمدى ءتۇسىندىم. مىنە، سونىڭ ارقاسىندا ومىرلىك جارىمدى تاپتىم.
ۆانيا ەكەۋمىز 2019 -جىلى تانىستىق، العاشىندا ول مەنى بۇزاقى بولعاندىقتان جاعىمنان ايىرىلعان دەپ ويلاپتى. تانىستىعىمىز دوستىققا، دوستىعىمىز سۇيىسپەنشىلىككە ۇلاسىپ، 2020 -جىلى وتاۋ قۇردىق. باسقالارى مەن ۇيلەنەدى دەپ ويلاماعانىنا سەنىمدىمىن. شىنى كەرەك، ءوزىمنىڭ دە مۇنداي ءۇمىتىم بولماپتى»، - دەيدى چيكاگو تۇرعىنى.
دجوزەفتىڭ مۋزىكاعا دەگەن ىقىلاسى ەرەكشە. سوندىقتان ول ديدجەيلىكپەن اينالىسىپ، باراباندا وينايدى ەكەن.
«مەنىڭ قازىرگى ارمانىم - كاسىبي ديدجەي اتانۋ. مۋزىكا - مەنىڭ ىشكى دۇنيەمنىڭ كورىسى ىسپەتتى. كەيدە بارلىعىنا قولىمدى ءبىر سىلتەپ، ومىردەن تەرىس اينالعىم كەلگەن كەزدەرى وسى ءبىر ارمانىمدى ەسكە الامىن. قۇدايدىڭ مەنى وسىلاي جاراتۋىنىڭ ءبىر سەبەبى بار عوي دەپ ويلايمىن.
ومىرگە استىڭعى جاقسىز كەلۋىم، مەنىڭ ومىرگە باسقا قىرىنان قاراي الاتىن تۇلعا رەتىندە قالىپتاسۋىما سەپ بولدى. كەيدە ادامدار مەنىڭ تۇرىمە تاڭعالىسىپ، جولدارىنان كەرى قايتىپ، تەسىلە قارايدى. ءبىراق بۇعان دا ۇيرەنىسەدى ەكەنسىڭ»، - دەيدى ەر ازامات.
ايتا كەتسەك، بۇل تۋا بىتكەن دەرت - وتوفاتسيالدى سيندروم دەپ اتالادى. مۇنداي سيرەك كەزدەسەتىن اۋرۋعا شالدىققان ءسابيدىڭ ومىرگە كەلگەندە تومەنگى جاعى جانە يەگى بولمايدى. دارىگەرلەر اتالمىش سيندرومعا شالدىققان نارەستەلەر كوپ جاعدايدا ۇزاق ءومىر سۇرمەيتىنىن ايتادى.
stan.kz