الماتىدا جازعى كافەگە كىرىپ كەتكەن كولىك ۇستەل باسىندا وتىرعان ايەلدى بارىپ سوقتى - ۆيدەو
الماتى قالالىق پوليتسيا دەپارتامەنتىنىڭ مالىمەتىنشە، جول اپاتى 24-مامىر كۇنى كەشكى ساعات 19:47 كەزىندە بولعان.
«تولە بي كوشەسى بويىمەن باتىس باعىتتا، اۋەزوۆ كوشەسىنىڭ قيىلىسىندا كەلە جاتقان «Toyota Camry» كولىگىنىڭ جۇرگىزۋشىسى سولعا بۇرىلىپ جاتىپ، تولە بي كوشەسىمەن شىعىس باعىتتا كەلە جاتقان «Volkswagen Polo» كولىگىنە سوعىلعان.
«Volkswagen» جۇرگىزۋشىسى كولىگىن قالدىرىپ، وقيعا ورنىنان كەتىپ قالدى. ال سوقتىعىس سالدارىنان «Toyota Camry» اۆتوكولىگى ينەرتسيامەن تولە بي كوشەسىنىڭ بويىمەن شىعىس باعىتتا ءجۇرىپ كەلىپ، قوعامدىق تاماقتانۋ ورنى ورنالاسقان عيماراتقا كىرىپ كەتكەن. ءبىر ايەل زارداپ شەگىپ، اۋرۋحاناعا جەتكىزىلدى»، - دەپ حابارلادى الماتى پوليتسيا دەپارتامەنتىنىڭ باسپا ءسوز قىزمەتى.
ۆەدومستۆا وكىلدەرى، اتالعان دەرەك المالى اۋداندىق پوليتسيا باسقارماسىندا تىركەلگەنىن ايتتى. ونىڭ ناتيجيەسى بويىنشا پروتسەسسۋالدىق شەشىم قابىلدانادى.