پرەزيدەنت اكىمدەر قابىلداعان اكتىلەردىڭ كۇشىن جويا المايتىن بولادى - مەملەكەتتىك حاتشى

نۇر-سۇلتان. قازاقپارات – ق ر مەملەكەتتىك حاتشىسى ەرلان قارين كونستيتۋتسيالىق رەفورما اياسىندا اكىمدەردى سايلاۋ جانە تاعايىنداۋ ءتارتىبى قالاي وزگەرەتىنىن ءمالىم ەتتى، دەپ حابارلايدى قازاقپارات ءتىلشىسى.

«وبلىس اكىمدەرىن تاعايىنداۋدىڭ جاڭا ءتاسىلى ەنگىزىلەدى. اكىمدەردى وڭىردەگى بۇكىل ءماسليحات دەپۋتاتتارىنىڭ كەلىسىمى بويىنشا بالامالى نەگىزدە تاعايىنداۋ ۇسىنىلىپ وتىر. بۇل قالاي جۇمىس ىستەيدى؟ پرەزيدەنت وبلىس، رەسپۋبليكالىق ماڭىزى بار قالا جانە ەلوردا اكىمىنىڭ لاۋازىمىنا كەم دەگەندە ەكى ۇمىتكەر ۇسىنۋعا مىندەتتى. وبلىستىق، اۋداندىق جانە قالالىق ءماسليحات دەپۋتاتتارىنىڭ ءبارى وسى ۇمىتكەرلەردەن تاڭداۋ جاسايدى. اكىمدىككە لايىقتى كانديدات دەپۋتاتتاردىڭ جالپى داۋىس بەرۋى ناتيجەسىندە تاعايىندالادى. ياعني، اكىمشىلىك سەنىم بىلدىرگەن ازامات اكىم بولادى»، - دەدى مەملەكەتتىك حاتشى Youtube ارناسىندا.

ونىڭ سوزىنە قاراعاندا اتالعان تۇزەتۋلەردىڭ ارقاسىندا اكىمدەردىڭ دەربەستىگى ارتۋى كەرەك.

«قازىر اۋىل اكىمدەرىن تۇرعىندار تىكەلەي سايلايدى. بۇل تۇراقتى ۇردىسكە اينالدى. ەندى اۋدان جانە قالا اكىمدەرىن سايلاۋعا دايىندىق جۇرگىزىلىپ جاتىر. وبلىس اكىمدەرىن دەپۋتاتتار داۋىس بەرۋ ارقىلى بالامالى نەگىزدە سايلايتىنىن بۇعان دەيىن ايتتىق. سونداي-اق، پرەزيدەنتتىڭ اۋدان، قالا، اۋىل اكىمدەرىن لاۋازىمىنان بوساتۋ قۇزىرەتىن كونستيتۋتسيادان الىپ تاستاۋ ۇسىنىلادى. ءتىپتى پرەزيدەنتتىڭ وبلىس، رەسپۋبليكالىق ماڭىزى بار قالا جانە ەلوردا اكىمدەرىنىڭ اكتىلەرىن تولىعىمەن نەمەسە ءىشىنارا جويۋ، توقتاتۋ قۇزىرەتىن دە الىپ تاستاۋ ۇسىنىلىپ وتىر. سونىڭ ناتيجەسىندە اكىمدەر بارىنشا دەربەس جۇمىس ىستەيدى، تۇرعىنداردىڭ مۇددەسىنە باسىمدىق بەرەدى»، - دەدى ەردان قارين.

ونىڭ ايتۋىنشا، كونستيتۋتسيالىق كەڭەستىڭ ورنىنا قۇرىلاتىن كونستيتۋتسيالىق سوت قابىلداعان شەشىمگە ەشكىم شاعىم كەلتىرە المايتىن بولادى.