نۇر-سۇلتاندا ايەل مەن بالانىڭ ۇستىنە باننەر قۇلادى

نۇر-سۇلتان. قازاقپارات - ەلوردادا قاتتى جەلدىڭ سالدارىنان الىپ باننەر قۇلاپ، ەكى ادام زارداپ شەكتى، دەپ حابارلايدى قازاقپارات ءتىلشىسى.

ەلوردا تۇرعىنىنىڭ ۇستىنە باننەر قۇلاعانى تۋرالى اقپارات الەۋمەتتىك جەلىدە تارادى. وقيعا بەيبىتشىلىك پەن كەلىسىم سارايى ماڭىندا بولعان. قاتتى جەل باننەردى شامامەن 15 مەتر جەرگە دەيىن ۇشىرعان. سونىڭ سالدارىنان ەلوردا تۇرعىنى ءتۇرلى دەنە جاراقاتىن العان. نۇر-سۇلتان قالالىق دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنشە، جارالانعاندار سانى ەكەۋ. جەدەل مەديتسينالىق جاردەم بريگاداسى وقيعا ورنىنا 3 مينۋتتا جەتكەن.

«زارداپ شەككەندەر (1 ەرەسەك ادام، 1 جاس ءوسپىرىم) ءتۇرلى جاراقاتپەن كوپبەيىندى قالالىق ستاتسيونارلارعا جەتكىزىلدى. ولارعا قابىلداۋ ءبولىمى دەڭگەيىندە اۋرۋحانالاردىڭ بەيىندى ماماندارى بۇكىل قاجەتتى مەديتسينالىق كومەكتى كورسەتتى»، - دەپ اتاپ وتەدى باسقارمادان.

باسقارما مالىمەتىنشە، زارداپ شەككەن ايەل ءتۇرلى جاراقاتپەن اۋرۋحاناعا جاتقىزىلدى، جاعدايى ءبىرقالىپتى.

«ناۋقاس اۋرۋحانادا تولىق ساۋىققانعا دەيىن ستاتسيونارلىق ەم قابىلدايدى. جاراقات العان جاس ءوسپىرىمدى ماماندار قاراپ شىقتى. مەديتسينالىق تەكسەرۋ كەزىندە ناۋقاستىڭ جاعدايى ورتاشا، اسقىنۋ بولمادى. دارىگەرلەر تولىق تەكسەرۋ جۇرگىزدى. سودان كەيىن سىرقات امبۋلاتوريالىق ەمدەۋگە جىبەرىلدى»، - دەدى ۆەدومستۆودان.

اۆتور: مارلان جيەمباي ءتىلشى