استانادا سوڭعى قوڭىراۋدان كەيىن ءبىر توپ وقۋشى ءۇي جالداپ، مەكتەپ بىتىرگەنىن اتاپ وتكەن
ەكى كۇن بۇرىن ەلوردا اۋماعىندا سوڭعى قوڭىراۋ ءىس- شاراسى ءوتتى. كامەلەتكە تولماعاندار اراسىنداعى قۇقىق بۇزۋشىلىقتىڭ الدىن الۋ، ولاردىڭ زاڭدى وكىلىنسىز تۇنگى ۋاقىتتا ويىن- ساۋىق مەكەمەلەرىندە جانە ۇيدەن تىس جەرلەردە جۇرۋىنە جول بەرمەۋ ماقساتىندا جەرگىلىكتى رەيد ءجۇردى. ءتارتىپ ساقشىلارى اۋلالاردى، ساياباقتاردى، سكۆەرلەردى جانە باسقا دا جاستار شوعىرلانعان جەرلەردى تەكسەردى. تەكسەرۋ بارىسىندا ساعات 00.56 شاماسىندا سارىارقا اۋدانىنىڭ يۋۆەنالدى پوليتسيا قىزمەتكەرلەرى باباتاي ۇلى كوشەسىندەگى جەكە تۇرعىن ءۇيدى انىقتادى.
وندا شامامەن 10 ادام بولعان، ونىڭ ىشىندە جەتەۋى كامەلەتكە تولماعان مەكتەپ ءبىتىرۋشى تۇلەك ەكەنى بەلگىلى بولدى. ءمان-جايدى انىقتاۋ ءۇشىن بۇكىل كوڭىل كوتەرۋشىلەر پوليتسيا باسقارماسىنا جەتكىزىلدى. ولار - 16-17 جاس ارالىعىنداعى جاسوسپىرىمدەر بولىپ شىقتى. جاستار ءۇيدى ءبىر تاۋلىككە جالعا الىپ، مەكتەپ بىتىرگەنىن اتاپ وتكەن.
پوليتسيا باسقارماسىنا كامەلەتكە تولماعانداردىڭ زاڭدى وكىلدەرى دە شاقىرىلدى. ولارمەن پروفيلاكتيكالىق اڭگىمە جۇرگىزىلدى. بالالاردىڭ تۇنگى ۋاقىتتا جالعىز جۇرۋىنە جول بەرگەنى ءۇشىن ولار اكىمشىلىك جاۋاپكەرشىلىككە تارتىلدى. نۇر-سۇلتان قالاسىنىڭ پوليتسيا دەپارتامەنتى اتا-انالارعا بالا تاربيەسى بويىنشا ءوز مىندەتتەرىن ورىنداماعانى ءۇشىن جاۋاپكەرشىلىك قاراستىرىلعانىن ەسكەرتەدى.
ايتا كەتەيىك، كامەلەت جاسىنا تولماعاندارعا تۇنگى ۋاقىتتا ويىن- ساۋىق مەكەمەلەرىندە ساعات 22:00-دەن ساعات 6:00-گە دەيىن، ال زاڭدى وكىلىنسىز ۇيدەن تىس جەردە ساعات 23:00-دەن ساعات 6:00-گە دەيىن بولۋعا تىيىم سالىنعان.