رەفەرەندۋمدا زاڭ بۇزىلماۋىن قاداعالايتىن بايقاۋشىلارعا قانداي تالاپ قويىلادى

اقتوبە. قازاقپارات - اقتوبە وبلىسىندا بەيپارتيالىق باقىلاۋ ورتالىعى بايقاۋشى بولۋعا ءوتىنىش قابىلداپ جاتىر، دەپ حابارلايدى قازاقپارات.

اقتوبە قالاسىنداعى «ازاماتتىق اليانس» عيماراتىندا رەسپۋبليكالىق بەيپارتيالىق باقىلاۋ ورتالىعى وبلىستىق فيليالى شتابىنىڭ ءتوراعاسى ەرادىل ءۇببىنيازوۆ رەفەرەندۋمعا قاتىستى باسپا ءسوز ءماسليحاتىن وتكىزدى.

- ازاماتتىق قوعام پلاتفورماسىنان رەسپۋبليكالىق بەيپارتيالىق بايقاۋ ورتالىعىنىڭ وبلىستىق فيليالى رەفەرەندۋم كەزىندە بايقاۋ جۇرگىزۋدى جوسپارلاپ وتىر. بۇگىنگى تاڭدا ۇكىمەتتىك ەمەس ۇيىمداردىڭ كۇشىن بىرىكتىرىپ، بارلىق بەيپارتيالىق بايقاۋشىلاردى ىنتىماقتاستىرۋ ماقساتىندا وبلىستىق بايقاۋشىلار شتابى قۇرىلدى. بۇگىندە شتابتا بايقاۋشىلار بويىنشا كوورديناتور بولىپ ايان زادىبەك ۇلى جانە شتابتىڭ قۇقىقتىق سۇراقتارى بويىنشا كوورديناتورى بولىپ ايشا تولەۋوۆا بەكىتىلدى. قازىرگى تاڭدا وبلىس بويىنشا بەلگىلەنگەن 502 سايلاۋ ۋچاسكەسىنە بايقاۋشىلاردى دايارلاپ جاتىرمىز. سونداي- اق تىركەلگەن بايقاۋشىلاردىڭ ءوز مىندەتتەرىن ءبىلۋى، زاڭ تالاپتارىنا سايكەس قىزمەت اتقارۋى ماسەلەلەرىنە دە اسا كوڭىل بولىنەدى، - دەدى ول.

باسپا ءسوز ءماسليحاتىندا جۋرناليستەر شتاب ءتوراعاسىنا وبلىستاعى سايلاۋ ۋچاسكەلەرى بويىنشا قانشا بايقاۋشىدان ءوتىنىش تۇسكەنىن، بايقاۋشىلارعا قانداي تالاپتار قويىلاتىنىن، سونداي-اق ولارعا قانشا قارجى بولىنەتىنىن سۇرادى.

- بۇگىنگە دەيىن ورتالىققا وبلىستاعى 502 سايلاۋ ۋچاسكەسى بويىنشا بايقاۋشى بولۋعا ەكى مىڭنان استام ادامنان ءوتىنىش كەلىپ ءتۇستى.

ولارعا قويىلاتىن باستى تالاپتار - قوعامدىق ۇيىمداردىڭ اتىنان قۇجاتتارى بولۋعا ءتيىس جانە رەفەرەندۋمدى وتكىزۋگە بايلانىستى بارلىق زاڭدىلىقتاردى ءبىلۋى كەرەك. بايقاۋشىلارعا بيۋدجەتتەن قارجى بولىنبەيدى، بۇل باعىتتا ءقازىر دەمەۋشىلەر ىزدەپ جاتىرمىز. سەبەبى قوعام بەلسەندىلەرى ءوز قالاۋىمەن كەلىپ بايقاۋشى بولۋعا نيەت ءبىلدىرىپ جاتىر، - دەدى شتاب ءتوراعاسى.

ونىڭ ايتۋىنشا، ءالى دە قوعامدىق ۇيىمدار اتىنان بايقاۋشى بولۋعا نيەتتەنگەندەر ورتالىققا كەلىپ تىركەلۋىنە بولادى.