حالىقتىڭ ءال- اۋقاتىن ارتتىرۋ جوباسى
بۇل تۋرالى پرەمەر- ءمينيستردىڭ ورىنباسارى ەرالى توعجانوۆ مالىمدەدى. بۇگىن سەناتتا ۇكىمەتتىڭ حالىقتىڭ ءال- اۋقاتىن ارتتىرۋعا ارنالعان كەشەندى جوسپارى تالقىعا ءتۇستى. جۇرتتىڭ جاعدايى كۇرت جاقسارىپ كەتۋ ءۇشىن بيلىك قانداي شارالاردى قولعا الىپ جاتىر؟
پرەمەر- ءمينيستردىڭ ورىنباسارى ەرالى توعجانوۆ 2025 -جىلعا دەيىن ەلىمىزدە جۇمىسسىزدىق ماسەلەسى شەشىلىپ، جالاقىنىڭ كوتەرىلەتىنىن اۋىز تولتىرا ايتتى. ءتىپتى اۋقىمدى باعدارلامانىڭ جۇزەگە اسىرىلۋىن ەلگە بەلگىلى ساراپشىلار باقىلاپ، قۇجاتتىڭ جەكەلەگەن باعىتتارىنا جەتەكشىلىك ەتەدى. سونداي- اق جاڭا داعدىلار مەن كاسىپكە باۋليتىن شارالار قابىلدانادى.
ەرالى توعجانوۆ، ق ر پرەمەر- ءمينيسترىنىڭ ورىنباسارى:
- ءبىز حالىقارالىق پراكتيكاعا ەگجەي- تەگجەيلى زەرتتەۋ جۇرگىزىپ، تالداۋ جاسادىق. قىتايدا اۋىلدىق جەرلەردە تابىستى، اۋىل شارۋاشىلىعى تاۋارلارىنىڭ ونىمدىلىگىن ارتتىرۋ ءۇشىن يرريگاتسيالىق ينفراقۇرىلىمدى جاقسارتۋ سياقتى شارالار قابىلدانعان. كەدەيلىكپەن كۇرەستىڭ ەۋروپالىق مودەلى نەگىزىنەن ساقتاندىرۋ جۇيەسىن دامىتۋعا باعىتتالعان. سوندىقتان ءبىز دە باعدارلاماعا جالاقى مولشەرىن ارتتىرۋعا باعىتتالعان تىكەلەي شارالاردى عانا قوسۋمەن شەكتەلگەن جوقپىز.
باعدارلامانىڭ ماڭىزدى بولىگى بۇل جاڭا ەكونوميكالىق وسۋگە ارنالعان. ەرالى توعجانوۆ باعدارلامانىڭ كەشەندى جوسپارىندا، 1 ميلليوننان استام ازاماتتىڭ ەڭبەكاقىسىن ارتتىرۋ كوزدەلگەنىن ايتتى. 850 مىڭنان اسا بيۋدجەتتىك سالا قىزمەتكەرلەرىنىڭ لاۋازىمدىق جالاقىسى كوتەرىلمەك.
ەرالى توعجانوۆ، ق ر پرەمەر- ءمينيسترىنىڭ ورىنباسارى:
- دارىگەرلەردىڭ جالاقىسى 320 مىڭنان 531 مىڭ تەڭگەگە دەيىن، ورتا مەديتسينالىق قىزمەتكەرلەردىڭ جالاقىسى 173,5 مىڭنان 250 مىڭ تەڭگەگە دەيىن وسەدى. بۇدان بولەك مەملەكەتتەن قولداۋ شارالار الاتىن ءىرى بيزنەستەرگە قاتىستى مىندەتتەمەلەردى بەلگىلەۋ ەسەبىنەن وندا ىستەيتىن 2,8 ادامنىڭ ورتاشا جالاقىسى وسەدى.
سەنات ءتوراعاسى ماۋلەن اشىمبايەۆ «بولىنگەن قاراجاتتى يگەرسەك بولدى» دەگەن بۇرىنعى ءتاسىلدى «كەلمەسكە» كەتىرۋ قاجەتتىگىن ايتتى. ول ءۇشىن، قۇر ءسوز ەمەس، ناقتى ءىس- شارالار جوسپارىنا كوشۋ ماڭىزدى. جالاقى وسەدى دەگەننەن- اق، ەلدەگى باعانىڭ شارىقتاپ كەتەتىنىن تىلگە تيەك ەتتى. ءتىپتى تابىس وسكەنىمەن ينفلياتسياعا ىلەسە المايتىندار بار. سوندىقتان نارىقتاعى باعانى دا باقىلاۋ ماڭىزدى، دەدى.
ماۋلەن اشىمبايەۆ، ق ر پارلامەنتى سەناتىنىڭ ءتوراعاسى:
- حالىقتىڭ تابىسىن ارتتىرۋ - ستراتەگيالىق مىندەت. مەملەكەتكە دەگەن سەنىم مەن بارلىق جاڭعىرۋ رەفورمالارىنىڭ تابىستى بولۋى دا وسى مىندەتكە تىكەلەي بايلانىستى. ازاماتتار جاعدايىنىڭ جاقسارعانىن ناقتى سەزىنۋى كەرەك. ەندىگى جەردە «بولىنگەن قاراجاتتى يگەرسەك بولدى» دەگەن بۇرىنعى تاسىلدەرمەن جۇمىس بىتپەيدى. سوندىقتان جوبالىق ءتاسىل قاعيداتىن ەنگىزگەن ابزال. ونىڭ ىشىندە جوسپارلانعان ناتيجەگە قول جەتكىزۋ ءۇشىن ناقتى باسشىلاردىڭ جەكە جاۋاپكەرشىلىگىن قاراستىرعان ءجون.
باعدارلامالاردىڭ ىسكە اسىرىلۋىن باقىلاۋ تەتىكتەرىن دە جەتىلدىرۋ كەرەك. سونداي- اق كوپ بالالى جانە مۇگەدەكتىگى بار بالالاردى تاربيەلەپ وتىرعان انالاردىڭ ۇيدە وتىرىپ، تابىس تابۋىنا جاعداي جاسالماق. جوبا اياسىندا ايەلدەر قازىر سۇرانىسقا يە ماماندىقتار بويىنشا كۋرستان ءوتىپ، ءوز ءىسىن اشۋعا مۇمكىندىك الا الادى. ال 2025 -جىلعا دەيىن مۇگەدەكتىگى بار جۇمىسقا جارامدى ادامداردىڭ كەمىندە %30 جۇمىسپەن قامتۋ كوزدەلىپ وتىر.
www.24.kz