پەتروپاۆل حالىقارالىق اۋەجايى ءۇشىنشى رەت ساتىلىمعا شىعارىلادى

پەتروپاۆل. قازاقپارات - پەتروپاۆل اۋەجايى ەكى رەت ساتىلىمعا شىعارىلىپ، وتپەدى.

جەرگىلىكتى بيلىك ماڭىزدى نىساندى سەنىمگەرلىك باسقارۋعا بەرىپ، شىعىندى كاسىپورىننىڭ جاعدايىن تۇزەمەك، دەپ حابارلايدى قازاقپارات ءتىلشىسى. سولتۇستىك قازاقستان وبلىسىنىڭ اكىمى قۇمار اقساقالوۆتىڭ ايتۋىنشا، اۋەجاي مۇلكى جاقىن ماڭدا تاعى دا ساۋداعا تۇسەدى.

«ءبىرىنشى ساۋدادا وتپەگەندىكتەن ەكىنشى رەت باعاسىن ەكى ەسە ارزانداتۋعا ءماجبۇر بولدىق. وسى جولى، ءۇشىنشى ساۋدادا العاشقى قۇنىن قايتارامىز، ياعني 5,6 ميلليارد تەڭگەگە ساۋدالانباق. قىزىعۋشىلار تابىلۋى مۇمكىن»، - دەيدى ءوڭىر باسشىسى.

قۇمار اقساقالوۆتىڭ ايتۋىنشا، جىل سايىن اۋەجاي جۇمىس ىستەۋى ءۇشىن بيۋدجەتتەن 200 ملن تەڭگە جۇمسالادى.

«قازىر اۋەجاي جۇمىس ىستەپ تۇر. ءبىراق اۆياتسيالىق قاۋىپسىزدىك قىزمەتى بىزگە ونداعى ولقىلىقتاردىڭ ورنىن تولتىرىڭدار دەپ ۇنەمى ايتادى. ماسەلەن مۇناي قويماسى كەرەك. سوندا ۇلكەن ۇشاقتار ۇشاتىن بولادى، بۇل تاسىمالدى ارتتىرادى. ءبىراق بۇل ماسەلەنى شەشۋ ءۇشىن ۇلكەن ينۆەستيتسيا قاجەت. كوپتەگەن مامانداردى تارتۋ قاجەت. وكىنىشكە وراي، ءبىز ازىرگە بيۋدجەت قاراجاتىنا بۇل شىعىنداردى ەنگىزە المايمىز. ينۆەستورلار كەلىپ، بيزنەستى جۇرگىزۋى كەرەك. ول ءۇشىن حالىقارالىق اۋە كومپانيالارىمەن بايلانىس ورناتىپ، كەلىسسوزدەر جۇرگىزۋ قاجەت. اكىمدىك بۇل شارۋامەن اينالىسا المايدى»، - دەدى س ق و اكىمى.

بۇعان دەيىن پەتروپاۆل اۋەجايىنىڭ ساتىلىمعا شىعارىلعانىن ايتقان ەدىك. ساۋدا 12 - مامىر كۇنى ءوتىپ، اۋەجاي ساتىلمادى.

اۆتور: اقەركە داۋرەنبەك قىزى