ءمايىتى ۇرلانعان ۇلىلار

نۇر-سۇلتان. قازاقپارات - اتاقتى ادامداردىڭ جانكۇيەرلەرى كوپ، كەيدە ولار قايتىس بولعاننان كەيىن دە «جاقىندارىن» جالعىز قالدىرمايدى.

ايگىلى ادامداردىڭ دەنەسى جەرلەنگەننەن كەيىن ۇرلانعان، كوبى ءىز-ءتۇسسىز جوعالىپ كەتكەن فاكتىلەر جەتكىلىكتى.

1978-جىلى 1- ناۋرىزدا اتاقتى اكتەر چارليدىڭ ءمايىتىن ۇرلاۋ سول كەزدەگى ەڭ تاڭعالارلىق جاڭالىقتىڭ ءبىرى بولدى. بۇگىن ءبىز قايتىس بولعاننان كەيىن ءمايىتى ۇرلانعان ۇلى ادامدار تۋرالى ايتامىز.

دانتە اليگەري

تەڭدەسسىز «قۇدىرەتتى قۇداي كومەدياسىنىڭ» اۆتورى ومىرىندە عانا ەمەس، قايتىس بولعاننان كەيىن دە جولى بولمادى. كوزى تىرىسىندە ول جاڭاشىل دەپ تانىلىپ، فلورەنتسيادان قۋىلدى. سوندىقتان راۆەنناداعى شىركەۋلەردىڭ بىرىنە جەرلەندى. دانتە دە كوپتەگەن دانىشپاندار سياقتى ولگەننەن كەيىن دارىپتەلە باستادى. اقىندى تۋعان جەرىنە سالتاناتتى تۇردە جەرلەۋدى ۇيعارعان كەزدە تابىتتى اشقاندا، ول بوس بولىپ، سالتاناتقا قاتىسۋشىلار ابدىراپ قالدى.

قايتا جەرلەۋ باسقا كۇنگە قالدىرىلدى، سول كەزدە ريم پاپاسى لەو X- عا دانتەنىڭ ءوزى قايتىپ كەلىپ، دەنەسىن الىپ كەتكەنى تۋرالى حابارلانعان.

عاسىرلار ءوتىپ، ⅩⅨ عاسىردا دارىندى اقىننىڭ 600 جىلدىعىن تويلاۋ قارساڭىندا راۆەنناداعى شىركەۋدى قالپىنا كەلتىرۋ تۋرالى شەشىم قابىلداندى. قۇرىلىسشىلار قابىرعالاردىڭ ءبىرىن بۇزىپ جاتقاندا، ويىپ جازىلعان جازۋى بار اعاش جاشىك تاپتى. وندا «دانتەنىڭ سۇيەكتەرىن 1677-جىلى انتونيو سانتي وسىندا قويعان» دەپ جازىلعان.

نيكولاي ۆاسيليەۆيچ گوگول

ورىستىڭ پروزاشىسى، اقىنى، سىنشىسى كوزى تىرىسىندە-اق ءوزىنىڭ «بىرتۇرلىلىگىمەن» تانىلعانىمەن، ومىردەن وزعان سوڭ دا ونىڭ ارتىندا ءبىر جۇمباق قالادى دەپ كىم ويلاعان؟

1931-جىلى گوگولدى قايتا جەرلەۋ تۋرالى شەشىم قابىلداندى. تابىتتى اشقاندا نيكولاي ۆاسيليەۆيچتىڭ باسى جوق بولىپ شىقتى. گوگول دەنەسىنىڭ باسى كىمگە كەرەك بولعانى ءالى كۇنگە دەيىن جۇمباق.

زيگمۋند فرەيد

پسيحواناليزدىڭ نەگىزىن قالاۋشى زيگمۋند فرەيد (1856-1939) دەنەسىنىڭ كۇلى سالىنعان ىدىس تا ۇرلانا جازداعان. 2013-جىلعى جاڭا جىلدى تويلاۋ ءتۇنى بەلگىسىز بىرەۋلەر اۆستريالىق پسيحولوگتىڭ كۇلىن ۇرلاماق بولىپ، ايگىلى تۇلعالاردىڭ كۇلى جاتقان لوندون كرەماتوريىنە باسىپ كىرگەن. شابۋىلشىلار جوسپارىن جۇزەگە اسىرا المادى، سوڭعى مينۋتتاردا ولار بىردەڭەدەن قورقىپ قاشىپ كەتكەن.

چارلز چاپلين

تىرىلەردى عانا ەمەس، ولىلەردى دە ۇرلاپ، اقشا تالاپ ەتەتىندەر بار. 1978-جىلى 1- ناۋرىزدا ەكى ادام چارلي چاپليننىڭ ءمايىتىن ۇرلاپ، جەسىرىنەن 650 مىڭ دوللار تالاپ ەتكەن. قىلمىس اكتەر ءومىرىنىڭ 25 جىلىن وتكىزگەن شۆەيتساريانىڭ تىنىش كورسە-سيۋر-ۆيەۆە اۋىلىندا ورىن العان.

جۇبايى: «چارلي مۇنى كۇلكىلى دەپ ايتاتىن ەدى» دەپ اقشا تولەۋدەن باس تارتقان. پولشا مەن بولگاريادان كەلگەن يمميگرانت - ەكى ۇرى تەز ارادا قولعا ءتۇسىپ، «ءۇنسىز كومەديانىڭ اتاسى» اتانعان اكتەردىڭ سۇيەگى باستاپقى ورنىنان 15 شاقىرىم جەردەن تابىلدى.

مايىتكە قايتا شابۋىل جاساماس ءۇشىن بەيىت بەتوندالدى.

massaget.kz