«ۇلكەن ەۋرازيا» مەگا-جوباسى زەرتتەۋدى قاجەت ەتەدى - پرەزيدەنت
26 مامىر 19:23

«ۇلكەن ەۋرازيا» مەگا-جوباسى زەرتتەۋدى قاجەت ەتەدى - پرەزيدەنت

بىشكەك. قازاقپارات - «ۇلكەن ەۋرازيا» مەگا-جوباسى جان-جاقتى زەرتتەۋدى قاجەت ەتەدى.

بۇل تۋرالى ەۋرازيالىق ەكونوميكالىق فورۋمىنىڭ جالپى وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«ۆلاديمير ۆلاديميروۆيچ پۋتين (رەسەي فەدەراتسياسىنىڭ پرەزيدەنتى - اۆت.) وتە قىزىق ۇسىنىستى ايتىپ، ونى ءتيىستى تۇردە تۇجىرىمداپ ءوتتى. بۇل تۇرعىدا «ۇلكەن ەۋرازيا» مەگا-جوباسى ەسكەرىلىپ وتىر. شىن مانىندە، بۇل جوبا تىڭعىلىقتى زەرتتەۋ مەن تالقىلاۋعا لايىق بولىپ تۇر»، - دەدى قاسىم-جومارت توقايەۆ.

وسى ورايدا پرەزيدەنت الداعى ۋاقىتتا بۇل ۇسىنىستى جۇزەگە اسىرۋعا قاتىستى تالقىلاۋ بولۋى مۇمكىن ەكەنىن ايتتى.

«سونىمەن قاتار رەسەي پرەزيدەنتى تاراپىنان ينتەگراتسيا پروتسەسىنە باسقا دا مۇددەلى ەلدەردى قوسۋ تۋرالى ورىندى ۇسىنىسى ايتىلدى. بۇل رەتتە قىتايدىڭ «ءبىر بەلدەۋ - ءبىر جول» جوباسى تۋرالى، سونداي-اق ەۋرازيا كەڭىستىگىندەگى ينتەگراتسيا پروتسەستەرىنە قوسىلۋعا قىزىعۋشىلىق تانىتقان باسقا ەلدەردى دە ايتا الامىز»، - دەدى مەملەكەت باسشىسى.

مۇنىمەن قوسا قازاقستان پرەزيدەنتى قارجىلىق ماسەلەلەرگە دە توقتالىپ ءوتتى.

«قارجىلىق ءوزارا قارىم-قاتىناستارعا بايلانىستى كۇردەلى ماسەلەگە قاتىستى توقتالساق، بۇل تاقىرىپ بويىنشا جاقىندا ۆلاديمير ۆلاديميروۆيچ پۋتينمەن تىڭعىلىقتى كەلىسسوزدەر بولدى. وسى ورايدا ءتيىستى ۋاعدالاستىقتارعا كەلىپ، قازاقستان ۇكىمەتى تاراپىنان قاجەت شارالار قابىلداندى. سوندىقتان بۇل باعىتتا پروبلەما جوق دەپ سانايمىن. بۇل جاعدايدا ءبىر-بىرىمەن جاقىن ورنالاسقان رەسەي مەن قازاقستان سياقتى مەملەكەتتەر ءتيىستى شەشىمدەردى تابا الادى جانە الداعى ۋاقىتتا دا لايىقتى شەشىمدى جاساۋى كەرەك»، - دەدى قاسىم-جومارت توقايەۆ.

بۇعان دەيىن حابارلاعانىمىزداي، قاسىم-جومارت توقايەۆ رەسمي ساپارمەن قىرعىزستانعا باردى.

قىرعىزستان پرەزيدەنتى «اق كەمە» ءمارمار شاتىرىندا قاسىم-جومارت توقايەۆتى رەسمي قارسى الدى. قازاقستان پرەزيدەنتىنىڭ قىرعىزستانعا ساپارى بارىسىندا ءبىرقاتار قۇجاتقا قول قويىلدى.

جاڭالىقتار