ءبىرتانوۆتىڭ ادۆوكاتى سۋدياعا قارسى شاعىم جاسادى
«سوت القاسى زاڭ بۇزۋ فاكتىسىن راستاپ، پروكۋراتۋراعا قۇجاتتاردى اعىلشىن تىلىنە اۋدارۋ، ولاردى ماتەريالدارعا قوسۋ، باعالاۋ ارقىلى بۇزۋشىلىقتاردى جويۋدى، سودان كەيىن عانا سوتقا دەيىنگى ءىس جۇرگىزۋ ساتىسىندا شەشىم قابىلداۋدى مىندەتتەگەن. ءۇش ءتۇرلى شەشىم بولۋى مۇمكىن - قىلمىستىق ءىستى توقتاتۋ، قىلمىستىق قۋدالاۋدى جالعاستىرۋ نەمەسە وسى ءىس جونىندەگى ءوندىرىستى ۋاقىتشا توقتاتا تۇرۋ. سوت القاسى باس پروكۋراتۋرانى وسى نۇسقاۋلاردى ورىنداۋعا مىندەتتەگەن. كونستيتۋتسيانىڭ 76-بابى 3-بولىگى بويىنشا سوت قاۋلىلارى قازاقستان اۋماعىندا ورىندالۋعا مىندەتتى. وكىنىشكە قاراي، سۋديا الكەنوۆ كونستيتۋتسيانىڭ وسى تالابىن ورىنداۋدان باس تارتتى. قىسقارتىپ ايتساق، بۇل - قىلمىستىق سوت ءوندىرىسىنىڭ پروتسەدۋراسىن بۇزۋ»، - دەپ ءتۇسىندىردى ول بۇل تالابىن ب ا ق وكىلدەرىنە.
سۋديا ءابينۇر قارابايەۆ ۇزىلىستەن كەيىن قورعاۋشى تاراپتىڭ تالابى ورىندالمايتىنىن ءمالىم ەتتى.
«ادۆوكات بەيسەكەيەۆتىڭ سۋديا الكەنوۆتىڭ وسى ىسكە ءتوراعالىق ەتۋىنە بىلدىرگەن قارسىلىعى تۋرالى ءوتىنىشى كەرى قايتارىلسىن. قاۋلى شاعىمدانۋعا جاتپايدى. قاۋلىمەن كەلىسپەيتىنى تۋرالى ۋاجدەردى اپەللياتسيالىق شاعىم مەن پروكۋراتۋرا وتىنىشىنە ەنگىزۋگە بولادى»، - دەدى نارازىلىق ءبىلدىرۋ تۋرالى شاعىمدى قاراعان سۋديا ءابينۇر قارابايەۆ.
ونىڭ ايتۋىنشا، سوت سۋديا يبراگيم الكەنوۆتىڭ وسى قىلمىستىق ىسكە مۇددەلىلىگى تۋرالى دالەلدەردى تىڭداپ، وعان قارسىلىق بىلدىرەتىندەي نەگىز تاپپاعان.
«سۋديا الكەنوۆتىڭ نەگىزگى سوت ءىسىن جۇرگىزۋى تاعايىندالۋى ونىڭ بۇل ىسكە تىكەلەي نەمەسە جاناما تۇردە قىزىعۋشىلىق تانىتۋىنا نەمەسە مەملەكەتتىك ايىپتاۋدىڭ، پروتسەستىڭ باسقا قاتىسۋشىلارىنىڭ قىسىمىنا ۇشىراۋىنا نەگىز ەمەس. بۇل جاعدايدا قورعاۋشى تاراپ تالاپ ەتىپ وتىرعان اۋدارمانى سوت قابىرعاسىندا ورىنداۋعا بولادى. سۋديا الكەنوۆ اۋدارماشى تاعايىنداپ، بۇكىل ماتەريالدى اۋدارماعا ۇسىنادى»، - دەدى سۋديا.
ايتا كەتەيىك، بۇگىن سۋديا يبراگيم الكەنوۆ ەلجان ءبىرتانوۆتىڭ ادۆوكاتتارى نەگىزگى سوت وتىرىسىنا تارتىلعان مەملەكەتتىك ايىپتاۋشىلار مەن دەنساۋلىق ساقتاۋ مينيسترلىگى وكىلىنە بىلدىرگەن قارسىلىقتى قابىلداماي تاستاعان ەدى.
بۇرىنعى دەنساۋلىق ساقتاۋ ءمينيسترى ەلجان ءبىرتانوۆ 2020-جىلدىڭ 3- قاراشاسىندا بيۋجەت قاراجاتىن ىسىراپ ەتتى دەگەن كۇدىكپەن قاماۋعا الىنعان بولاتىن.
تەرگەۋ ماتەريالى بويىنشا، ەلجان ءبىرتانوۆ پەن ونىڭ كومەكشىسى بولعان ولجاس ابىشيەۆكە «لاۋازىمدىق وكىلەتىن تەرىس پايدالانۋ» ارقىلى مەملەكەتكە 1,5 ميلليارد تەڭگەنىڭ شىعىنى كەلتىرگەنى تۋرالى ايىپ تاعىلىپ وتىر.
ال بيىل 12- مامىردا سوت ەلجان ءبىرتانوۆقا قاتىستى قىلمىستىق ءىستى توقتاتۋدان باس تارتقان ەدى.