ەۋرازيالىق ەكونوميكالىق كوميسسيا ىسكەرلىك باعىتتا جۇمىس ىستەۋ كەرەك - توقايەۆ
ق ر پرەزيدەنتى قاسىم-جومارت توقايەۆ ەۋرازيالىق ەكونوميكالىق فورۋمىنىڭ جالپى وتىرىسىندا وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«قازىرگى تاڭدا ەۋرازيالىق ەكونوميكالىق كوميسسيانىڭ اياسىندا ءوتىپ جاتقان كەڭەستەردىڭ قورىتىندىسى بويىنشا كەدەرگىلەردىڭ 80 پايىزى الىنىپ تاستالدى. بۇل جۇمىس جالعاسادى دەپ ۇمىتتەنەمىز. جالپى ينتەگراتسيا دەگەن ۇلكەن ەڭبەكتى قاجەت ەتەتىن ۇدەرىس. بۇل - مۇشە مەملەكەتتەردىڭ بۇكىل قاتىسۋشىلاردىڭ كوڭىلىنە جاعاتىنداي نەگىزدە ىمىرادا بولۋى. قول جەتكىزىلگەن كەلىسىمدەرگە ءاردايىم كوڭىلىمىز تولا بەرمەيدى. ينتەگراتسيانىڭ ءبىر ءمانى وسىندا»، - دەدى پرەزيدەنت.
سونداي-اق مەملەكەت باسشىسى قازاقستاننىڭ ەۋرازيالىق ينتەگراتسيا ماسەلەسىندەگى ۇستانىمىنا ايرىقشا توقتالدى.
«ورتاق ءىس ءۇشىن كەيدە ءوز مۇددەڭدى تۇسىرە تۇرۋعا بولادى. قازاقستان ەۋرازيالىق ەكونوميكالىق كوميسسيا ىسكەرلىك جولمەن، ناقتى ناتيجەنى كوزدەپ جۇمىس ىستەگەنىن قولدايدى. كەز كەلگەن ماسەلەگە وتە ىسكەرلىك باعىتپەن كەلۋ كەرەك. ويتكەنى حالقىمىز ماسەلەنىڭ ۇزىن ارقاۋمەن شەشىلگەنىن كۇتىپ وتىرمايدى. ولار ماسەلەلەردىڭ ءدال قازىر جانە كەلەشەكتە وزدەرى كورگىسى كەلەتىندەي ەتىپ شەشىلگەنىن قالايدى»، - دەدى قاسىم-جومارت توقايەۆ.
ايتا كەتەيىك، پرەزيدەنت قاسىم-جومارت توقايەۆ قىرعىزستاندا رەسمي ساپارمەن ءجۇر.