بۇكىل ەلمەن پراگماتيكالىق نەگىزدە جۇمىس ىستەي بەرەمىز - مەملەكەت باسشىسى
26 مامىر 17:37

بۇكىل ەلمەن پراگماتيكالىق نەگىزدە جۇمىس ىستەي بەرەمىز - مەملەكەت باسشىسى

نۇر-سۇلتان. قازاقپارات - قازاقستان ەۋرازيالىق ينتەگراتسيانىڭ ىسكەرلىك نەگىزدە بولۋىن قولدايدى.

ق ر پرەزيدەنتى قاسىم-جومارت توقايەۆ ەۋرازيالىق ەكونوميكالىق كوميسسيا فورۋمىنىڭ جالپى وتىرىسىندا وسىنداي ۇستانىم ءبىلدىردى، دەپ حابارلايدى قازاقپارات ءتىلشىسى.

«ەۋرازيالىق ەكونوميكالىق كوميسسيا، مەنىڭشە، ايتارلىقتاي ءتيىمدى جۇمىس ىستەپ تۇر. ءبىراق ماسەلە باسقادا جانە ول پىكىرتالاسقا تۇرارلىق. ەۋرازيالىق ەكونوميكالىق كوميسسياعا قوسىمشا وكىلەتتەر ارتۋدىڭ قاجەتى بار ما؟ ءبىز قازاقستاندا بۇل ماسەلە بويىنشا العا جۇگىرمەي، بىرتىندەپ جۇمىس ىستەۋ كەرەك دەگەن ۇستانىمدى قولدايمىز. ءتۇپتىڭ تۇبىندە ەۋرازيالىق ەكونوميكالىق كوميسسيا ۇكىمەت ەمەس. بۇل - 2015-جىلى قول قويىلعان ءتيىستى جارعىمەن وكىلەتتەرى بەلگىلەنگەن اتقارۋشى ورگان»، - دەدى پرەزيدەنت ەۋرازيالىق ەكونوميكالىق كوميسسيا فورۋمىنىڭ جالپى وتىرىسىندا.

مەملەكەت باسشىسى ينتەگراتسيا كەزىندە تۋىندايتىن كەيبىر ماسەلەلەردى جراماعا اينالدىرۋدىڭ قاجەتى جوق ەكەنىنە دە توقتالدى.

«مەنىڭشە، ينتەگراتسيا ۇدەرىسى كەزىندە تۋىندايتىن قانداي دا ءبىر قيىندىقتاردى دراماعا اينالدىرۋدىڭ قاجەتى جوق. بۇل قالىپتى پروتسەسس. قازاقستانعا كەلسەك، ىسكەرلىك نەگىزدەگى ەۋرازيالىق ينتەگراتسيانى قولدايمىز. ارينە، وداقتاعى بۇكىل ەلمەن پراگماتيكالىق نەگىزدە جۇمىس ىستەي بەرەمىز»، - دەدى قاسىم-جومارت توقايەۆ.

ايتا كەتەيىك، پرەزيدەنت قاسىم-جومارت توقايەۆ قىرعىزستاندا رەسمي ساپارمەن ءجۇر.

جاڭالىقتار