قازاقستان ە ا ە و ەلدەرىنە ورتاق تەحنيكالىق رەتتەۋ ورتالىعىن قۇرۋدى ۇسىندى
«قازاقستاندا وتكەن جىلدىڭ 1- شىلدەسىنەن باستاپ تەحنيكالىق رەتتەۋ جونىندەگى ۇيلەستىرۋ ورتالىعى جۇمىس ىستەپ جاتىر. اتالعان ورتالىقتىڭ نەگىزگى مىندەتتەرىنە تەحنيكالىق رەگلامەنت جوبالارى مەن ولارعا وزگەرىستەر بويىنشا ۇستانىمدى قالىپتاستىرۋعا قاتىسۋ، كاسىپورىنداردىڭ تەحنيكالىق رەگلامەنتتەردى ەنگىزۋگە ينفراقۇرىلىمدىق ازىرلىگىن تالداۋ جانە تەحنيكالىق رەگلامەنتتەردى قولدانۋ بويىنشا مونيتورينگ جۇرگىزۋ كىرەدى. سونىمەن قوسا تەحنيكالىق رەگلامەنتتەر مەن ستاندارتتاردىڭ عىلىمي-تەحنيكالىق دەڭگەيىن باعالاۋ مىندەتى جاتادى»، - دەدى ق ر ساۋدا جانە ينتەگراتسيا مينيسترلىگى تەحنيكالىق رەتتەۋ جانە مەترولوگيا كوميتەتىنىڭ ءتوراعاسى ارمان ابەنوۆ بىشكەكتە ءوتىپ جاتقان ەۋرازيا ەكونوميكالىق فورۋمىندا.
سونداي-اق، كوميتەت باسشىسى اتالعان ۇيلەستىرۋ ورتالىعىنىڭ جۇمىسىن ەاەو كولەمىندە كەڭەيتۋدى ۇسىندى.
«ءبىز 2010-جىلدان باستاپ تەحنيكالىق رەگلامەنتتەردى ازىرلەۋمەن تىكەلەي اينالىساتىن كاسىبي ماماندار مەن سالانىڭ ۇزدىك ساراپشىلارىن ۇيلەستىرۋ ورتالىعىندا جۇمىس ىستەۋگە شاقىردىق. بۇل ينستيتۋتسيونالدىق جادتى ساقتاۋ ماقساتىندا جاسالىپ وتىر. وسى ورايدا ءبىزدىڭ كوميتەت ە ا ە و- عا مۇشە مەملەكەتتەردە تەحنيكالىق رەتتەۋ جونىندەگى ۇيلەستىرۋ ورتالىقتارىن قۇرۋدىڭ ۇقساس مودەلىن ازىرلەۋدى ۇسىنادى. ەۋرازيالىق ينتەگراتسيانى دامىتۋدىڭ 2025-جىلعا دەيىنگى ستراتەگياسىندا ستاندارتتاۋ جۇمىسىن جوسپارلاۋدى ۇيلەستىرۋگە، ستاندارتتاۋ سالاسىنداعى عىلىمي-زەرتتەۋ جۇمىستارىن جۇيەلى دامىتۋدى قامتاماسىز ەتۋ جانە ە ا ە و- نىڭ ءتيىستى اكتىلەرىن قابىلداۋ ماقساتىندا جۇرگىزۋگە باعىتتالعان ءىس-شارالار كوزدەلگەن»، - دەدى ارمان ابەنوۆ فورۋمدا.
بۇعان دەيىن ساۋدا مينيسترلىگىنىڭ وكىلى قازاقستاننان ە ا ە و ەلدەرىنە قانداي تاۋار تۇرلەرى ەكسپورتتالاتىنىن ايتىپ ءوتتى.