تاكسي وپەراتورلارىنا جۇرگىزۋشىلەر ءۇشىن الەۋمەتتىك تولەم جاساۋ مىندەتتەلۋى مۇمكىن
26 مامىر 14:25

تاكسي وپەراتورلارىنا جۇرگىزۋشىلەر ءۇشىن الەۋمەتتىك تولەم جاساۋ مىندەتتەلۋى مۇمكىن

نۇر-سۇلتان. قازاقپارات - قازاقستاندا ءتۇرلى ينتەرنەت پلاتفورمالاردا جۇمىس ىستەيتىن تاكسي جۇرگىزۋشىلەرىن الەۋمەتتىك قورعاۋ ماسەلەسى قاراستىرىلىپ جاتىر.

بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتىپ بەردى، دەپ حابارلايدى قازاقپارات ءتىلشىسى.

«ءبىز مۇنى پلاتفورما وپەراتورلارىمەن بىرگە تالقىلاپ جاتىرمىز. رەسەي قازىردىڭ وزىندە تاكسي جۇرگىزۋشىلەرى ءۇشىن الەۋمەتتىك اۋدارىم جاسايتىن پيلوتتىق جوبانى باستادى، وندا پلاتفورما وپەراتورلارى جۇمىس ىستەپ جاتىر، مۇمكىن «ياندەكس» تە بار شىعار. بۇل تولەمدەر قىزمەتكەرلەردىڭ باعدارلاما وپەراتورىنا تولەيتىن قاراجاتى ەسەبىنەن جۇرگىزىلەدى»، - دەدى تامارا دۇيسەنوۆا سەناتتا تىلشىلەرگە بەرگەن سۇحباتىندا.

ەڭبەك ءمينيسترى ءدال وسىنداي باعدارلاما كورەيادا جانە قىتايدا جۇزەگە اسىرىلىپ جاتقانىن ايتتى. «ەۋروپا دا بۇل جۇمىستى باستادى، سوندىقتان قازىر ولارمەن كەزدەسىپ، وسى ماسەلەنى تالقىلاۋدى باستادىق جانە ورتاق شەشىمگە كەلگەندە سىزدەرگە حابارلايمىز. جالپى العاندا، بۇل جۇمىس جۇرگىزىلۋى كەرەك، ايتالىق، تاكسي جۇرگىزۋشىسى كەز كەلگەن ۋاقىتتا جۇمىسسىز قالۋى مۇمكىن، ال ولارعا كىم جاردەماقى تولەيدى؟ تەحنيكانىڭ اتى تەحنيكا، ۇنەمى جول ۇستىندە جۇرەدى، جول- كولىك اپاتىنا ۇشىراسا مۇگەدەك بوپ قالۋى مۇمكىن، ولار ءۇشىن الەۋمەتتىك ساقتاندىرۋ قورىنا ەش اۋدارىم جاسالمايدى. سوندىقتان وپەراتورلارمەن الەۋمەتتىك قورعاۋ ماسەلەلەرىن تالقىلاۋىمىز كەرەك»، - دەپ ءتۇسىندىردى تامارا دۇيسەنوۆا.

اۆتور: ايجان سەرىكجان قىزى

جاڭالىقتار