سوت ەلجان ءبىرتانوۆتىڭ ادۆوكاتتارى بىلدىرگەن قارسىلىقتى قابىلداماي تاستادى

نۇر-سۇلتان. قازاقپارات - دەنساۋلىق ساقتاۋ مينيسترلىگىنىڭ بۇرىنعى باسشىسى ەلجان ءبىرتانوۆ پەن ونىڭ كومەكشىسى بولعان ولجاس ابىشەۆ ىسىنە قاتىستى وتكەن نەگىزگى سوت وتىرىسىندا ادۆوكاتتار مەملەكەتتىك ايىپتاۋشىلار مەن دەنساۋلىق ساقتاۋ مينيسترلىگىنىڭ وكىلىنە قارسىلىق ءبىلدىردى، دەپ حابارلايدى قازاقپارات ءتىلشىسى.

قورعاۋشىلار تاراپىنان ءسوز العان ەرجان ءبىرتانوۆ زارداپ شەگۋشى تاراپتىڭ (دەنساۋلىق ساقتاۋ مينيسترلىگى - رەد. ) وكىلى اسقار اقبايەۆقا نارازىلىق تانىتتى.

«ءبىرتانوۆتى قورعاۋشى تاراپتىڭ اقبايەۆ مىرزاعا قاتىستى سۇراقتارى بار. وعان كۋاگەر رەتىندە دەنساۋلىق ساقتاۋ سالاسىن اقپاراتتاندىرۋ پلاتفورماسى تۋرالى ماڭىزدى مالىمەتى بار قۇجاتقا قول قويعان ادام رەتىندە سۇراق قويىلادى. بۇل جەردە پلاتفورمانىڭ 2021 -جىلعى 1-قاراشاداعى تەحنيكالىق جاعدايى تۋرالى اكتىنى ايتىپ وتىرمىن. سوت ءىس باستالعاندا ول قۇجاتتى ورىس تىلىنە اۋدارۋعا جانە زەرتتەۋگە مىندەت العان. اقبايەۆ مىرزا مەن بۇل قۇجاتقا قول قويعان وزگە دە تۇلعالار، ياعني دەنساۋلىق ساقتاۋ مينيسترلىگى مەن رەسپۋبليكالىق ەلەكتروندى دەنساۋلىق ساقتاۋ ورتالىعىنىڭ، «ەريكسون نيكولا تەسلا» كومپانياسىنىڭ وكىلدەرى سوتتا ءبىرتانوۆتى قورعاۋشى تاراپتىڭ سۇراقتارىنا جاۋاپ بەرۋگە ءتيىس. وسىعان بايلانىستى اقبايەۆ مىرزا زارداپ شەگۋشى تاراپتىڭ وكىلى رەتىندە سوتقا قاتىسا المايدى. ويتكەنى ءبىر ادام سوت پروتسەسىنە ەكى بىردەي ستاتۋسپەن قاتىسا المايدى. ءارى كۋاگەر، ءارى زارداپ شەگۋشى بولۋى مۇمكىن ەمەس. بۇل ق ر قىلمىستىق پروتسەسسۋالدىق كودەكسىنە دە، قيسىنعا دا سىيمايدى. مۇنداي قوساقتالعان ستاتۋس مۇددە قايشىلىقتارىن تۋىنداتۋى مۇمكىن»، - دەدى ەرجان ءبىرتانوۆ.

ال ادۆوكات سەرىك ساعاليەۆ پروتسەسسۋالدىق پروكۋرور سانات تالقانبايەۆقا قارسىلىق ءبىلدىردى. ولجاس ابىشەۆتىڭ ادۆوكاتتارى دا بۇل ۇستانىمدى قولدايتىنىن ايتىپ، مەملەكەتتىك ايىپتاۋشىلاردىڭ ەكەۋىنە دە قارسىلىق بەردى. ەلجان ءبىرتانوۆتىڭ ءوزى دە ق ر باس پروكۋرورىنان وزىنە قاتىستى ءىس بويىنشا باسقا مەملەكەتتىك ايىپتاۋشىلار ۇسىنۋدى سۇرادى. ۇزىلىستەن كەيىن سۋديا قورعاۋشى تاراپتىڭ تالاپتارىنا قاتىستى قابىلدانعان شەشىمدى ءمالىم ەتتى.

«ق ر قىلمىستىق- پروتسەسسۋالدىق كودەكسىنىڭ 87، 88، 94-باپتارىنىڭ نەگىزىندە سۋديا قاۋلى قابىلدادى: - سوتتالۋشى ە. ءبىرتانوۆتىڭ قورعاۋشىسى ەرجان ءبىرتانوۆتىڭ زارداپ شەگۋشى تاراپتىڭ وكىلى ا. اقبايەۆتى پووتسەسسۋالدىق ىستەن شەتتەتىپ، ودان كۋاگەر رەتىندە قورعاۋشى تاراپتىڭ جاۋاپ العىزۋى تۋرالى وتىنىشىنەن باس تارتۋ؛ - ادۆوكات س. ساعاليەۆتىڭ پروتسەسسۋالدىق پروكۋرورعا بەرگەن قارسىلىعىنان باس تارتۋ تۋرالى قاۋلى قابىلدادى. قاۋلى شاعىمدانۋعا جاتپايدى. قاۋلىمەن كەلىسپەۋ تۋرالى ۋاجدەردى اپپەلياتسيالىق شاعىمدار مەن پروكۋروردىڭ وتىنىشىنە ەنگىزۋگە بولادى»، - دەدى نۇر-سۇلتان قالاسىنىڭ №2-سارىارقا اۋداندىق سوتىنىڭ سۋدياسى يبراگيم الكەنوۆ.

ايتا كەتەيىك، بۇرىنعى دەنساۋلىق ساقتاۋ ءمينيسترى ەلجان ءبىرتانوۆ 2020 -جىلدىڭ 3-قاراشاسىندا بيۋدجەت قاراجاتىن ىسىراپ ەتتى دەگەن كۇدىكپەن قاماۋعا الىنعان بولاتىن. تەرگەۋ ماتەريالى بويىنشا، ەلجان ءبىرتانوۆ پەن ونىڭ كومەكشىسى بولعان ولجاس ابىشەۆكە «لاۋازىمدىق وكىلەتىن تەرىس پايدالانۋ» ارقىلى مەملەكەتكە 1,5 ميلليارد تەڭگەنىڭ شىعىنى كەلتىرگەنى تۋرالى ايىپ تاعىلىپ وتىر. ال بيىل 12-مامىردا سوت ەلجان ءبىرتانوۆقا قاتىستى قىلمىستىق ءىستى توقتاتۋدان باس تارتقان ەدى.

اۆتور: ەسىمجان ناقتىباي