اراب امىرلىكتەرىندە مايمىل شەشەگىن جۇقتىرۋدىڭ العاشقى دەرەگى تىركەلدى

ءابۋ- دابي. قازاقپارات - بىرىككەن اراب امىرلىكتەرىندە مايمىل شەشەگىنىڭ العاشقى جاعدايى تىركەلدى.

ۆيرۋستى دەنساۋلىق ساقتاۋ ورگاندارى باتىس افريكادان كەلگەن 29 جاستاعى ايەلدەن انىقتادى، دەپ حابارلايدى قازاقپارات WAM اگەنتتىگىنە سىلتەمە جاساپ.

قازىرگى ۋاقىتتا اۋرۋ جۇقتىرعان ايەلگە قاجەتتى مەديتسينالىق كومەك كورسەتىلۋدە. مينيسترلىك ەل حالقىن ب ا ءا دەنساۋلىق ساقتاۋ ورگاندارىنىڭ بارلىق قاجەتتى شارالاردى، سونىڭ ىشىندە تەرگەۋ، ناۋقاسپەن بايلانىستا بولعان ادامداردى ىزدەۋ جانە ايەلدىڭ دەنساۋلىعىن باقىلاۋدى قولعا الىپ جاتقانىنا سەندىردى.

بۇل جاعداي مايمىل شەشەگىن جۇقتىرۋ وقيعالارى الەمنىڭ بىرنەشە ەلىندە تىركەلگەننەن كەيىن ىسكە قوسىلعان ەرتە باقىلاۋ جۇيەسىنىڭ بولىگى رەتىندە انىقتالدى.

«ءبىز تۇراقتى تيىمدىلىكتى قامتاماسىز ەتۋ جانە حالىقتى جۇقپالى اۋرۋلاردان قورعاۋ، ولاردى جىلدام انىقتاۋ ءۇشىن جوعارى الەمدىك تاجىريبەگە سايكەس ەپيدەميولوگيالىق قاداعالاۋ جۇيەسىن ەنگىزۋ ءۇشىن دەنساۋلىق ساقتاۋدىڭ باسقا ورگاندارىمەن بىرلەسىپ جۇمىس ىستەپ جاتىرمىز. سونداي- اق، ەلدە بارلىق اۋرۋلار مەن ۆيرۋستار، سونىڭ ىشىندە مايمىل شەشەگى ۆيرۋسىنىڭ تارالۋىن شەكتەۋ بويىنشا جۇمىس جۇرگىزۋدەمىز»، - دەپ مالىمدەدى ۆەدومستۆودان.

«مينيسترلىك جەرگىلىكتى ەپيدەميولوگيالىق قاداعالاۋدى كۇشەيتىپ، مايمىلدىڭ دۇنيەجۇزىندە تارالۋىن مۇقيات قاداعالاپ وتىر. امىرلىكتەردەگى بارلىق مەديتسينالىق مەكەمەلەرگە ۆيرۋستىڭ جەرگىلىكتى جەردە تارالۋىن بولدىرماۋ ءۇشىن كەز كەلگەن كۇدىكتى جاعدايلار تۋرالى حابارلاۋ تاپسىرىلدى»، دەپ حابارلايدى Khaleej Times.

«ءبىز ينفەكسياعا شالدىقتى دەگەن كۇدىككە ىلىنگەن ناۋقاستاردى دياگنوستيكالاۋدىڭ ناقتى تەتىكتەرىن ەنگىزدىك. وعان قوسا، پاندەمياعا قارسى تەحنيكالىق كونسۋلتاتيۆتىك توپ ەپيدەميالىق قاداعالاۋ، اۋرۋدى ەرتە انىقتاۋ، ۆيرۋس جۇقتىرعان ناۋقاستاردى كلينيكالىق تەكسەرۋ جانە ساقتىق شارالارى بويىنشا كەشەندى نۇسقاۋلىق دايىندالدى»، - دەدى مينيسترلىكتەن.

بۇل مەحانيزم كۇدىكتى جاعدايلاردى انىقتاۋ، ولاردىڭ تارالۋىن بولدىرماۋ جانە ەرتە ەمدەۋدى قامتاماسىز ەتۋ بويىنشا بەلسەندى قادامداردى قامتيدى.

ۆەدومستۆو تۇرعىنداردى وسەك- اياڭ تاراتپاي، اقپاراتتى تەك رەسمي دەرەككوزدەردەن الۋعا شاقىردى.

24-مامىرداعى جاعداي بويىنشا دۇنيەجۇزىلىك دەنساۋلىق ساقتاۋ ۇيىمى مايمىل شەشەگىن جۇقتىرۋدىڭ راستالعان جانە كۇدىكتى 250 دەن استام جاعدايىن تىركەدى.

بۇعان دەيىن ب ا ءا دەنساۋلىق ساقتاۋ ورگاندارى مايمىل شەشەگى ۆيرۋسىنىڭ نەگىزىنەن ورتالىق جانە باتىس افريكانىڭ تروپيكالىق ورماندارىندا كەزدەسەتىنىن، كەيدە باسقا ايماقتارعا تارالاتىنىن مالىمدەگەن.

اۋرۋ ادامعا ناۋقاس اداممەن نەمەسە جانۋارمەن جاقىن بايلانىستا نەمەسە ۆيرۋسپەن لاستانعان ماتەريالدار ارقىلى جۇعادى.

ۆيرۋس ءبىر ادامنان ەكىنشى ادامعا زاقىمدانعان وشاقتار، دەنەدەگى سۇيىقتىق، اۋا تامشىلارى جانە توسەك- ورىن سياقتى لاستانعان ماتەريالدارمەن تىعىز بايلانىس ارقىلى تارالادى. مايمىل شەشەگى سيرەك كەزدەسىپ، ادەتتە جەڭىل تۇردە وتكەنىمەن، سالدارى اۋىر دەرتكە اكەلىپ سوقتىرۋى دا ىقتيمال.

ۆيرۋستىڭ ينكۋباتسيالىق كەزەڭى ادەتتە 7 دەن 14 كۇندى قۇرايدى، ءبىراق كەي جاعدايدا 21 كۇنگە دەيىن سوزىلۋى دا مۇمكىن.