جەكي چاندى ەڭ ءبىرىنشى جاراقاتتاعان ادام
25 مامىر 10:53

جەكي چاندى ەڭ ءبىرىنشى جاراقاتتاعان ادام

نۇر- سۇلتان. قازاقپارات - بريۋس لي كينو تاريحىنداعى ەڭ ايگىلى اكتەر - جەكي چاننىڭ ءومىرى مەن دەنساۋلىعى ساقتاندىرۋ كومپانيالارىندا ساقتالعان بولسا، بۇگىندە ولار قۇلدىراۋعا ۇشىرايتىن ەدى. سەبەبى اكتەردىڭ ءاربىر كينو كەزىندە الاتىن جاراقات سانى ادام سەنگىسىز.


دجەكي چان ءوزىنىڭ كينو الەمىندەگى جولىندا بارلىعى 3000 ءتۇرلى جاراقات العان. ءتىپتى ونىڭ كەيبىرى اكتەردىڭ ومىرىنە قاۋىپ توندىرگەن. ءسوزىمىز انىق بولۋ ءۇشىن اكتەردىڭ كينوداعى العان جاراقاتتارىنان ءبىر- ەكى مىسال كەلتىرىپ وتسەك.

دجەكچي چان العاشقى جاراقاتتى 19 جاسىندا العان. بۇل 1973 -جىل. ال بۇل جاراقاتتى ەڭ ايگىلى اكتەردىڭ ءبىرى بريۋس ءليدىڭ ءوزى جاساعان. «ايداھاردىڭ شىعۋى» فيلمىنە ءتۇسىرىلىم كەزىندە جاس اكتەردىڭ كوزىنە بريۋس ليدىڭ تاياعى ءتيىپ كەتكەن. قۋانىشقا وراي سول كوزىنىڭ جانىنان سىرىپ وتكەن تاياق كوزگە اسا ۇلكەن قاۋىپ توندىرمەگەن.

1978 -جىلى «جىلان قىراننىڭ كولەڭكەسىندە» فيلمىندە دجەكي چان الماس قىلىشتىڭ سابىن ەمەس، ءوزىن قولىمەن ۇستاپ العان. ال ءتۇسىرىلىم كەزىندە كەلىسىم بويىنشا جالعان قىلىش ويناتىلۋ كەرەك بولعان. ءبىراق ولاي بولماي شىقتى. ەڭ قىزىعى اكتەر بۇل ارەكەتتى رەنىش دەپ قابىلاۋدىڭ ورنىنا «شىنايى بولۋ كەرەك» دەپ قان اعىپ تۇرعان الاقانىمەن ءتۇسىرىلىمدى جالعاستىرا بەرگەن. وسى جىلى «ماس شەبەر» فيلمى ءتۇسىرىلدى. دجەكي چان جەرگە قۇلاۋ كەزىندە كوزىن جاراقاتتاپ العان. ءتىپتى كوزىن امان الىپ قالۋ ءۇشىن وتا دا جاسالعان.

1983 -جىل. «ا جوباسى» فيلمى. سەگىز مەتر بيىكتىكتەن ەشقانداي قورعانىش كيىمسىز قۇلاعان اكتەردىڭ بەس قابىرعاسى سىنعان، مۇرنى مەن جاعى دا جارتىلاي سىنىق العان. ءبىراز ۋاقىتقا دەيىن اكتەر مويىن سۇيەگىن بۇرا الماي كەلگەن.

1985 -جىل. «پوليتسەي اكادەمياسى» فيلمى. بەس قاباتتى ۇيدەن ءتۇسىپ كەلە جاتقان اكتەردىڭ بۇل تۇسىرىلىمدە ومىرىنە قاۋىپ تونگەن: ەكى ومىرتقاسى سىنىپ، كوزى جاراقات العان. وسى فيلمىنەن كەيىن اكتەر ەكى اي بويىنا اۋرۋحانادا جاتقان. دارىگەرلەر اكتەر قالعان ءومىرىن سال بولىپ وتكىزۋى مۇمكىن دەپ تە بولجام جاساعان.

1986 -جىل. «قۇدايدىڭ قۇرىشى» فيلمى. اتالعان فيلمدى ءتۇسىرۋ كەزىندە جەكي چان ومىرىندەگى ەڭ قاۋىپتى جاراقاتتى الدى. ول التى مەتر بيىكتىكتەن جەرگە باسپەن تۇسكەن. باس سۇيەگى سىنىپ، مي تامىرلارىنا زاقىم كەلگەن. وتا جاسالىپ، ميىنىڭ جارتى باس سۇيەگىنە پلاستيكا سالىنعان. ال ونىڭ سول قۇلاعى وسىدان كەيىن دۇرىس ەستىمەي قالعان.

1993 -جىل. «قىلمىس تاريحى» فيلمى. اكتەر ەكى بىردەي كولىكتىڭ ورتاسىندا قالىپ قويعان. وكىنىشكە وراي ساتسىزدىككە ۇشىراعان جەكي چان ەكى بىردەي اياعىنان ايرىلىپ قالا جازداعان. دارىگەرلەردىڭ ارقاسىندا ءۇش ايدان كەيىن جازىلىپ شىققان.

1995 -جىل. «برونكستەگى توبەلەس» فيلمى. اكتەر بۇل كەزدە تىزەسى مەن سول اياعىنىڭ باقايىن سىندىرىپ العان جانە فيلمدى ءتۇسىرۋ توقتاتىلعان. ءبىراق كوپ ۇزاماي قايتا جالعاسقان.

2005 -جىل. «ميف» فيلمى. بۇل فيلمگە ءتۇسۋ كەزىندە اكتەر بىرنەشە جاراقات العان. اتتان قۇلاپ بەل سۇيەگىن زاقىمداعان. ءومىرىن فيلممەن تىكەلەي بايلانىستىرعان اكتەر ءوزىنىڭ ءلاززاتى ءۇشىن قانداي جاعداي بولماسىن باس تارتپاعان. سەبەبى ول كورەرمەن ءبارىن شىنايى كورسە ەكەن دەپ تۇيگەن.

Massaget.kz

جاڭالىقتار