جاس تەرمەشىلەر بايقاۋىنىڭ جەڭىمپازدارى انىقتالدى
ب ق و جاستار ساياساتى ماسەلەلەرى باسقارماسىنىڭ قولداۋىمەن «عاسىر» جاستار قوعامدىق بىرلەستىگى ۇيىمداستىرعان سايىسقا قاتىسقان ۇمىتكەرلەر 14-18 جانە 19-29 جاس ەرەكشەلىكتەرى بويىنشا باق سىنادى.
ەرەجەگە سايكەس سايىسكەرلەر باتىس ماقامى ستيلىندە جانە ەركىن تاقىرىپتا ەكى تەرمەدەن ورىندادى. بايقاۋ قورىتىندىسىندا 14-18 جاستاعىلار اراسىندا قۇرمانعازى اتىنداعى مۋزىكا كوللەدجىنىڭ ستۋدەنتى جاسمينا پالات جەڭىمپاز اتاندى. ورال قالاسى №25 ورتا مەكتەپ وقۋشىسى سابينا جۇماگەلدينا ەكىنشى، دينا نۇرپەيىسوۆا اتىنداعى بالالار مۋزىكا مەكتەبىنىڭ شاكىرتى تەمىرلان باتىربەك ءۇشىنشى ورىنعا يە بولدى. وسى مەكتەپتەن لاۋرا مالىكوۆا مەن سىرىم اۋدانىنان كەلگەن ەراسىل ءومىرجان «كورەرمەن كوزايىمى» اتاندى.
ال 19-29 جاستاعىلار اراسىنان م. وتەمىسوۆ اتىنداعى باتىس قازاقستان ۋنيۆەرسيتەتىنىڭ ستۋدەنتتەرى رىستى ەلشىنبەكوۆا، گۇلىم ىزىمعالييەۆا جانە ءادىل احمەتوۆ العاشقى ءۇش ورىندى ءبولىستى. جاڭگىر حان اتىنداعى باتىس قازاقستان اگرارلىق- تەحنيكالىق ۋنيۆەرسيتەتىنىڭ ستۋدەنتى ۇلپان تەمىربەك پەن ءبورلى اۋدانىنىڭ وكىلى بەكتاس جۇماعاليەۆ «كورەرمەن كوزايىمى» بولدى. بايقاۋ جۇلدەگەرلەرىنە ۇيىمداستىرۋشىلار تاراپىنان ارنايى ديپلومدار مەن باعالى سىيلىقتار تابىس ەتىلدى. ال جەڭىمپاز اتانعان ەكى جاس ەلىمىزدىڭ رۋحاني استاناسى - تۇركىستان قالاسىن تاماشالاپ قايتاتىن بولادى.
«اتالمىش بايقاۋ وسىمەن ەكىنشى رەت ۇيىمداستىرىلىپ وتىر. مۇنداعى ماقسات - تەرمەنى تەكتى ونەردىڭ تورەسى رەتىندە جاستار اراسىندا كەڭىنەن ناسيحاتتاۋ. قاتىسۋشىلاردىڭ ورىنداۋشىلىق شەبەرلىگى اركەلكى بولعانىمەن، جالپى بەتالىس جاقسى»، دەدى قازاقپارات تىلشىسىنە قازىلار القاسىنىڭ مۇشەسى، رەسپۋبليكالىق جانە حالىقارالىق جىرشى- تەرمەشىلەر بايقاۋلارىنىڭ جەڭىمپاز- جۇلدەگەرى، «باتىس قازاقستان وبلىسىنىڭ ۇزدىك مادەنيەت قىزمەتكەرى» توسبەلگىسىنىڭ يەگەرى فارحات ورازوۆ.
ەسكە سالا كەتەيىك، بۇدان بۇرىن ورالدا «ۇلتتىڭ ءۇنى - جىر- تەرمە» اتتى جاس تەرمەشىلەر بايقاۋى مارەگە جەتكەنىن ، ەلوردادا العاش رەت كۇي جارمەڭكەسى ۇيىمداستىرىلعانىن جازعان بولاتىنبىز.
اۆتور: ەلجان ەرالى