ەكى جىلدىق ۇزىلىستەن كەيىن بۇگىن سوڭعى قوڭىراۋ ءداستۇرلى تۇردە وتەدى
25 مامىر 07:26

ەكى جىلدىق ۇزىلىستەن كەيىن بۇگىن سوڭعى قوڭىراۋ ءداستۇرلى تۇردە وتەدى

نۇر- سۇلتان. قازاقپارات - بۇگىن قازاقستاننىڭ بارلىق مەكتەبىندە سوڭعى قوڭىراۋ ءراسىمى ەكى جىلدىق كارانتيننەن كەيىن ءداستۇرلى تۇردە وتەدى، دەپ حابارلايدى قازاقپارات.

ق ر ءبىلىم جانە عىلىم مينيسترلىگىنىڭ حابارلاۋىنشا، بيىل 170 مىڭنان استام تۇلەك مەكتەپپەن قوشتاسادى. ونىڭ 8 مىڭنان استامى «التىن بەلگى» توسبەلگىسىنە ۇمىتكەر.

«سوڭعى قوڭىراۋ - مۇعالىمدەر مەن وقۋشىلار وقۋ جىلىنىڭ قورىتىندىسىن شىعارىپ، ءبىلىم الۋشىلاردىڭ جەتىستىگىن اتاپ وتەتىن كوڭىلدى ءارى ماڭىزدى وقيعا. بيىل ەپيدەميولوگيالىق جاعداي مەكتەپپەن قوشتاسۋ مەرەكەسىن وتكىزۋگە مۇمكىندىك بەرىپ وتىر. الايدا ول مىندەتتى تۇردە مەكتەپ قابىرعاسىندا ۇيىمداستىرىلۋى كەرەك. ءبىلىم بەرۋ ۇيىمدارى بارلىق قاجەتتى ۇسىنىس پەن نۇسقاۋدى الدى. 2022 -جىلى ەلىمىزدە 3,5 ميلليوننان استام وقۋشى ءۇشىن سوڭعى قوڭىراۋ سوعىلادى. بيىل «التىن بەلگى» توسبەلگىسىنە 8139 تۇلەك ۇمىتكەر»، - دەدى مەكتەپكە دەيىنگى جانە ورتا ءبىلىم كوميتەتىنىڭ ءتورايىمى گۇلميرا كارىموۆا.

رەسپۋبليكانىڭ بارلىق جالپى ءبىلىم بەرەتىن مەكتەبىندە سوڭعى قوڭىراۋ مەرەكەسىن ءبىر مەزگىلدە وتكىزۋ جوسپارلانىپ وتىر. مەكتەپ ءبىتىرۋ كەشىن ءبىلىم مەكەمەسى ءوزى ۇيىمداستىرىپ، وتكىزۋى كەرەك. سوڭعى قوڭىراۋدا مىنا ءىس- ارەكەتكە تىيىم سالىنادى:

- انيماتورلاردى، مەرەكە اگەنتتىگىن، ارتىستەردى، مەرەكەلىك شارا وتكىزۋ ءۇشىن اقىلى جەكە ستۋديالاردى تارتۋعا؛

- مەرەكەلىك داستارحان جايۋعا؛

- جالعا بەرىلەتىن اۆتوكولىكتەردى تارتا وتىرىپ، قالا (اۋدان) بويىنشا ەكسكۋرسيا جاساۋعا؛

- مەكتەپ اكىمشىلىگى مەن مۇعالىمدەرگە سىيلىق الۋ ءۇشىن قاراجات جيناۋعا؛

- ويىن- ساۋىق مەكەمەلەرىندە ءبىتىرۋ كەشىن ۇيىمداستىرۋعا رۇقسات جوق.

ايتا كەتەيىك، بيىل اتتەستاتتى سالتاناتتى تاپسىرۋ ءراسىمى 16-17- ماۋسىمدا وتەدى. ال 9 -سىنىپ وقۋشىلارىنا ەمتيحان 28- مامىر مەن 6- ماۋسىم كۇندەرى وتەدى. ولار قازاق جانە ورىس تىلدەرىنەن ەمتيحان تاپسىرادى جانە ەسسە جازادى. 31- مامىر كۇنى الگەبرادان جازباشا ەمتيحان تاپسىرادى. ال 3- ماۋسىم كۇنى ورىس ءتىلى قازاق مەكتەبىندە، قازاق ءتىلى ورىس مەكتەبىندە جازباشا وتەدى.

6- ماۋسىم كۇنگى سوڭعى ەمتيحان تاڭداعان ءپانى بويىنشا جازباشا ەمتيحان ۇيىمداستىرىلادى. 11 -سىنىپ وقۋشىلارى، ياعني مەكتەپ تۇلەكتەرى 27- مامىر مەن 10- ماۋسىم ارالىعىندا ەمتيحان تاپسىرادى. ولاردا ءبىرىنشى ەمتيحان 27- مامىردا الگەبرا جانە اناليز باستامالارى پانىنەن جازباشا، ەكىنشى ەمتيحان 30 -مامىردا وقىتۋ تىلىندە جازباشا وتەدى. 2- ماۋسىم كۇنى قازاقستان تاريحىنان اۋىزشا ەمتيحان تاپسىرادى. 7- ماۋسىمدا ورىس ءتىلى قازاق مەكتەبىندە، قازاق ءتىلى ورىس مەكتەبىندە جازباشا بولادى. سوڭعى ەمتيحان 10- ماۋسىم كۇنى تاڭداعان پانىنەن تاپسىرادى.

سونداي- اق، كەلەسى جىلدان باستاپ «التىن بەلگى» ۇمىتكەرلەرىنە تالاپ كۇشەيەدى. بىرىنشىدەن، جالپى ورتا ءبىلىم بەرەتىن وقۋ باعدارلاماسىنا سايكەس، 10، 11- سىنىپتارداعى وقۋ كەزەڭىندە توقساندىق، جىلدىق جانە قورىتىندى باعالارى 5 بولۋى كەرەك. سوندىقتان كەلەسى جىلى 10، 11- سىنىپتا جىلدىق جانە قورىتىندى باعا عانا ەمەس توقساندىق تا، جىلدىق تا، قورىتىندى دا باعا ەسەپكە الىنادى.

ەكىنشىدەن، جالپى ورتا ءبىلىمدى اياقتاعاننان كەيىن نازاربايەۆ زياتكەرلىك مەكتەپتەرىنىڭ بازاسىندا الگەبرا جانە تالداۋ نەگىزدەرى وقۋ ءپانى بويىنشا قورىتىندى اتەستاتتاۋدان ءوتۋى كەرەك. ءۇشىنشى تالاپ - ۇمىتكەردىڭ نەگىزگى ءبىلىم بەرۋ تۋرالى ۇزدىك اتەستاتى بولۋى ءتيىس. ياعني، ول 9- سىنىپقا دەيىن ۇزدىك وقۋى كەرەك دەگەن ءسوز.

ءبىلىم گرانتتارىنا كەلسەك، 2022-2023 وقۋ جىلىندا مەملەكەتتىك ءبىلىم تاپسىرىسىنىڭ كولەمى 88 مىڭنان اسادى. ونىڭ ىشىندە باكالاۆريات - 73 مىڭ، ماگيستراتۋرا - 33 مىڭنان استام جانە دوكتورانتۋرا - 1890 ورىن. بيىل 42 مىڭنان استام مەملەكەتتىك گرانت نەمەسە 60 پايىزى تەحنيكالىق ماماندىقتارعا بولىنەدى. سونىمەن قاتار 10 مىڭ گرانت اتىراۋ مەن ماڭعىستاۋ وبلىستارىنىڭ تىعىز ورنالاسقان ەلدىمەكەندەرىنىڭ جاستارىنا قاراستىرىلىپ وتىر. سونداي- اق، «سەرپىن» باعدارلاماسى بويىنشا 3653 گرانت ءبولىندى . ودان بولەك، 490 گرانت شەتەل ازاماتتارىنا بەرىلەدى. ونىڭ ىشىندە 150 گرانت ورتالىق ازيا ەلدەرىنىڭ ازاماتتارىنا ارنالادى جانە 100 گرانت يسلام ىنتىماقتاستىعى ۇيىمى ەلدەرىنىڭ تۇلەكتەرىنە قارالعان.

اۆتور: ايجان سەرىكجان قىزى

جاڭالىقتار