قازاقستان پرەزيدەنتى دۇنيەجۇزىلىك ەكونوميكالىق فورۋم قاتىسۋشىلارىنا بەينەۇندەۋ جاسادى
24 مامىر 22:20

قازاقستان پرەزيدەنتى دۇنيەجۇزىلىك ەكونوميكالىق فورۋم قاتىسۋشىلارىنا بەينەۇندەۋ جاسادى

نۇر- سۇلتان. قازاقپارات - قازاقستان پرەزيدەنتى قاسىم- جومارت توقايەۆ دۇنيەجۇزىلىك ەكونوميكالىق فورۋمنىڭ قاتىسۋشىلارىنا بەينەۇندەۋ جاسادى.

قازاقپارات بۇل تۋرالى اقورداعا سىلتەمە جاساپ حابارلايدى.

وسى كۇندەرى داۆوستا ءوتىپ جاتقان دۇنيەجۇزىلىك ەكونوميكالىق فورۋم اياسىندا مەملەكەت باسشىسى قاسىم- جومارت توقايەۆ «استانا» حالىقارالىق قارجى ورتالىعى ۇيىمداستىرعان دوڭگەلەك ۇستەل وتىرىسىنا قاتىسۋشىلارعا بەينەۇندەۋ جولدادى. مەملەكەت باسشىسى ءوز ۇندەۋىندە الەمدىك كۇن تارتىبىندەگى وزەكتى ماسەلەلەرگە نازار اۋداردى.

قاسىم- جومارت توقايەۆتىڭ پىكىرىنشە، COVID-19 پاندەمياسىنا قاتىستى جاعداي مەن ۋكرايناداعى وقيعالار الەمدىك ەكونوميكانىڭ بولشەكتەنۋىنە تۇرتكى بولدى. بۇل ەۋرازيا قۇرلىعىندا جاڭا گەوساياسي سىناققا الىپ كەلدى. پرەزيدەنت پاندەمياعا قارسى كۇرەس اياسىندا دەنساۋلىق ساقتاۋ جۇيەسىن جەتىلدىرۋگە، شاعىن جانە ورتا بيزنەستى، ينفراقۇرىلىمدىق جوبالاردى قولداۋعا قاتىستى مەملەكەت قابىلداپ جاتقان شارالار تۋرالى ايتتى.

سونىمەن قاتار قاسىم- جومارت توقايەۆ فورۋمنىڭ قاتىسۋشىلارىنا ەلىمىزدە جۇرگىزىلىپ جاتقان اۋقىمدى ساياسي- ەكونوميكالىق رەفورمالار جونىندە، كونستيتۋتسياعا وزگەرىستەر مەن تولىقتىرۋلار ەنگىزۋدى كوزدەيتىن الداعى رەسپۋبليكالىق رەفەرەندۋمعا دايىندىق بارىسى تۋرالى جان- جاقتى مالىمەت بەردى.

مەملەكەت باسشىسى قورشاعان ورتانى قورعاۋ، الەۋمەتتىك جانە كورپوراتيۆتىك باسقارۋ (ESG) سالالارىنداعى ماقساتتاردى جۇزەگە اسىرۋعا قازاقستاننىڭ بەيىلدى ەكەنىن اتاپ ءوتتى.

پرەزيدەنت ەلىمىزدىڭ الەمدىك نارىقتارعا تاۋارلاردى، شيكىزاتتى جانە اۋىل شارۋاشىلىعى ونىمدەرىن ۇزدىكسىز جەتكىزۋ ءىسىن قامتاماسىز ەتۋدە سەنىمدى سەرىكتەس بولىپ قالا بەرەتىنىن مالىمدەدى.

«جاسىل» ەكونوميكانى دامىتۋ، ەنەرگەتيكانىڭ تيىمدىلىگىن ارتتىرۋ جانە جاڭارتىلاتىن ەنەرگيا سەكتورىن وركەندەتۋ ءبىزدىڭ كومىرتەگىن تومەندەتۋ جونىندەگى ستراتەگيامىزدىڭ باسىمدىقتارى سانالادى. بۇل 2060 -جىلعا قاراي قالدىقتاردى مۇلدە جويۋعا وڭتايلى جول اشادى»، - دەدى قازاقستان پرەزيدەنتى.

قاسىم- جومارت توقايەۆ ءسوزىنىڭ سوڭىندا قازاقستاننىڭ ادام قۇقىقتارى مەن زاڭ ۇستەمدىگى سالاسىنداعى حالىقارالىق مىندەتتەمەلەر مەن قاعيداتتارعا ادال ەكەنىن اتاپ ءوتتى. دوڭگەلەك ۇستەلگە ءىرى جاھاندىق ينۆەستيتسيالىق كومپانيالاردىڭ، كوممەرتسيالىق ەمەس سەكتوردىڭ جانە حالىقارالىق ب ا ق وكىلدەرى قاتىستى.

جاڭالىقتار