سىرتقى ىستەر مينيسترلىگى زاڭسىز ۇستالعان قازاقستاندىق تۋريستەرگە قاتىستى وزبەكستانعا ۇندەۋ جولدادى
بۇعان دەيىن سامارقان قالاسىنىڭ پوليتسەيلەرى قازاقستاندىق تۋريستەردى زاڭسىز ۇستاپ، ارنايى تەحنيكالىق قۇرالدار قولدانعانى حابارلانعان ەدى.
«قازاقستاننىڭ سىرتقى ىستەر مينيسترلىگى وقيعانىڭ ءمان- جايىن انىقتاۋ ءۇشىن حات جولدادى. ءبىز ءوز ازاماتتارىمىزدىڭ قۇقىعىن قورعايمىز»، - دەدى ايبەك سمادياروۆ ۇكىمەتتە تىلشىلەرگە بەرگەن سۇحباتىندا.
ونىڭ ايتۋىنشا، سىرتقى ىستەر مينيسترلىگى دە ۆيدەونى ارنايى قاراپ شىققان.
«الەۋمەتتىك جەلىلەردە تاراعان وزبەكستان پوليتسەيلەرى ءبىزدىڭ ازاماتتارعا ەلەكتروشوكەر قولدانعان ۆيدەونى كورسەڭىزدەر، كوممەنتاريدە وزبەك حالقىنىڭ ءوزى قۇقىق قورعاۋ ورگاندارىنىڭ ارەكەتىن ايىپتاپ جاتىر. دەگەنمەن، ءبىز جاعدايدى باقىلاۋدا ۇستاپ وتىرمىز. ول جاقتا ىشكى تەرگەۋ باستالدى، پوليتسەيلەر قىزمەتىنەن شەتتەتىلدى. ءبىز بۇعان ارالاسپاۋعا تىرىسامىز جانە ازاماتتارىمىزدى قورعاۋ ماسەلەسىنە قاتىستى تۇسىن عانا قاداعالايمىز»، - دەپ تۇيىندەدى ايبەك سمادياروۆ.
اۆتور: ايجان سەرىكجان قىزى