مۇمكىن ەمەس ەشتەڭە جوق - رومان سكليار ۋتيل الىمىنان باس تارتۋ تۋرالى
24 مامىر 13:25

مۇمكىن ەمەس ەشتەڭە جوق - رومان سكليار ۋتيل الىمىنان باس تارتۋ تۋرالى

نۇر-سۇلتان. قازاقپارات – ق ر پرەمەر-ءمينيسترىنىڭ ءبىرىنشى ورىنباسارى رومان سكليار ۋتيل الىمىنان باس تارتۋ مۇمكىندىگىنە پىكىر ءبىلدىردى، دەپ حابارلايدى قازاقپارات ءتىلشىسى.

«مۇمكىن ەمەس ەشتەڭە جوق، ەكەۋىن دە جوققا شىعارۋعا بولمايدى. ءبىزدىڭ ءبىرتۇتاس ەكونوميكالىق كەڭىستىكتە ەكەنىمىزدى ۇمىتپاۋ كەرەك، كورشىلەرىمىزدە بۇل ۋتيل الىمى بار. بىزدە وندىرۋشىلەرىمىزدى، ماشينا جاساۋشىلارىمىزدى جانە باسقالاردى قورعاۋ ءۇشىن باسقا تەتىكتەر جوق»، - دەدى رومان سكليار ۇكىمەت وتىرىسىنان كەيىن تىلشىلەرگە بەرگەن سۇحباتىندا. سونىمەن بىرگە، رومان سكليار جۋرناليستەردى پوپۋليستەردىڭ جەتەگىنە ەرمەۋگە شاقىردى.

«مەن بۇل تاقىرىپپەن بىرنەشە رەت شىقتىم جانە جۋرناليستەرگە ونى تەرەڭىرەك زەرتتەۋگە كەڭەس بەردىم. ءتۇرلى پوپۋليستەردى تىڭداۋدىڭ قاجەتى جوق، ماشينا جاساۋ سالاسىندا بەلگىلى ءبىر شارا قولدانۋ كەرەگىن ايتۋ - ابسوليۋتتى پوپۋليزم. اڭگىمە ەلىمىزدىڭ دامۋى مەن ماشينا جاساۋ سالاسىنىڭ بولاشاعى تۋرالى بولىپ وتىر. كەيبىر پوپۋليستەر «ءبىز اۆتوكولىك شىعارا المايمىز، وعان قۇزىرەتىمىز جەتپەيدى» دەيدى، مەن مۇنىمەن ءۇزىلدى-كەسىلدى كەلىسپەيمىن»، - دەدى ر. سكليار.

اۆتور: ايجان سەرىكجان قىزى

جاڭالىقتار