باس ەكولوگ باتىستا كيىك سانى شەكتەن تىس كوبەيىپ كەتكەنىنە پىكىر ءبىلدىردى

None
None
نۇر-سۇلتان. قازاقپارات – ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ باتىس قازاقستان وبلىسى تۇرعىندارىنىڭ كيىك سانى شەكتەن تىس كوبەيىپ كەتكەنى تۋرالى شاعىمىنا پىكىر ءبىلدىردى، دەپ حابارلايدى قازاقپارات ءتىلشىسى.

«باتىس قازاقستان وبلىسىندا جەرگىلىكتى تۇرعىندار كيىك پەن ءۇي جانۋارلارى اراسىندا بەلگىلى ءبىر باسەكە بار ەكەنىن ايتىپ ءجۇر. سوندىقتان بۇگىن كەشكە ورمان شارۋاشىلىعى مەن جانۋارلار الەمىنە جاۋاپتى ۆيتسە-مينيستر، ءتيىستى كوميتەت ءتوراعاسى وسى وڭىرگە اتتانادى. سول جەردە جەرگىلىكتى اكىمدىك وكىلدەرىمەن بىرگە ءوڭىر حالقىنا ءتۇسىندىرۋ جۇمىسىن جۇرگىزەدى. وسى ساپار اياسىندا جۇمىس توبى قۇرىلادى دەپ ويلايمىن»، - دەدى مينيستر ۇكىمەت وتىرىسىنان كەيىن ب ا ق وكىلدەرىنىڭ سۇراعىنا بەرگەن جاۋابىندا.

ونىڭ سوزىنە قاراعاندا بۇل جۇمىس توبى كيىك سانىن رەتتەۋ ىقتيمالدىعى ماسەلەسىن زەردەلەپ كورەدى.

«بارشاعا ايتقىم كەلەتىنى، ەگەر كيىك سانىن رەتتەۋ شاراسى قولعا الىنسا، تەك بيولوگيالىق نەگىزدەمەگە سۇيەنىپ ىسكە اسىرىلادى. ازىرگە ناقتى شەشىم شىققان جوق. جۇمىس توبى قۇرىلادى. ول جۇمىس توبىنا جانۋارلاردى قورعاۋ ۇيىمدارىنىڭ وكىلدەرى دە، حالىقارالىق ساراپشىلار دا تارتىلادى. ياعني، عالىمدارىمىز كيىك سانىن رەتتەۋ قاجەت دەسە، ءتيىستى شەشىم تالقىلاۋعا ەنگىزىلەدى»، - دەدى سەرىكقالي برەكەشەۆ.

سونداي-اق، ول وڭىردەگى ەكى تابيعي قاۋمالدا ءارى كەتسە 350 مىڭ كيىكتىڭ تىرشىلىك ەتۋ مۇمكىندىكگى بار ەكەنىن جەتكىزدى.

«قازىر باتىس قازاقستان وبلىسىنىڭ اۋماعىندا بوكەيوردا رەزەرۆاتى قۇرىلعانىن بىلەتىن شىعارسىز. اشىوزەك رەزەرۆاتى دا بار. ءبىراق بۇل ەكى رەزەرۆاتقا شامامەن 250-300 مىڭ باس كيىك سىيادى. عالىمدارىمىزدىڭ قورىتىندىسىنا قاراعاندا كيىكتەردىڭ جايىق پوپۋلياتسياسىنىڭ شەكتى سانى 350 مىڭ باستىڭ اينالاسىندا بولۋى مۇمكىن. قايتالاپ ايتايىن، ازىرگە كيىك سانىن رەتتەۋ كەرەك دەگەن شەشىم جوق»، - دەدى مينيستر.

بۇعان دەيىن ب ق و اكىمى عالي ەسقاليەۆ جەرگىلىكتى شارۋالاردىڭ مۇددەسىن قورعاۋ ءۇشىن كيىكتىڭ سانىن رەتتەۋ قاجەت دەگەن پايىم ايتقان بولاتىن.

اۆتور: ەسىمجان ناقتىباي

سوڭعى جاڭالىقتار