07:56, 24 - مامىر 2022 | GMT +6
الماتى- وسكەمەن تراسساسىنىڭ سۋ شايىپ كەتكەن بولىگىنىڭ تۇسىنان اينالما جول سالىندى
تالدىقورعان. قازاقپارات - جاڭبىر سۋىنىڭ شايىپ كەتۋىنە بايلانىستى الماتى-وسكەمەن تاسجولىنىڭ 382-410 شاقىرىمىندا جابىلعان جول اشىلدى، - دەپ حابارلايدى قازاقپارات.
قازىر جولاۋشىلار 200 شاقىرىمدىق اينالما جول ارقىلى ەمەس، شۋ شايىپ كەتكەن جولدىڭ جانىنان جاسالعان اينالما جول ارقىلى قاتىناۋدا.
«جول قوزعالىسى قالپىنا كەلتىرىلدى. رەسپۋبليكالىق ماڭىزى بار الماتى- وسكەمەن تاس جولىنىڭ 393-395 شاقىرىمىنداعى قۇبىرلى سۋ وتكەلدەرىن سۋ شايىپ كەتۋىنە بايلانىستى اينالما جولدار جاسالىپ، جول قوزعالىسى قالپىنا كەلتىرىلدى»، - دەلىنگەن اقسۋ اۋدانى اكىمىنىڭ باسپا ءسوز قىزمەتىنىڭ جاريالاعان حابارلاماسىندا.
ەسكە سالساق، بۇعان دەيىن الماتى- وسكەمەن رەسپۋبليكالىق تراسسانىڭ جابىلعاندىعى جونىندە حابارلاعان بولاتىنبىز.
سونىمەن قاتار، قازاۆتوجول «الماتى- وسكەمەن» تراسساسىنداعى سۋ شايىپ كەتكەن جولدى ءبىر ايدا جوندەيتىنىن مالىمدەدى.
اۆتور: سامال قابىشەۆا