ۋكرايناداعى جاعداي ۇلى بريتانياداعى باعانىڭ وسۋىنە اسەر ەتۋدە
«قارا تەڭىز پورتتارىنداعى جاعداي ۋكراينادا 25 ميلليون توننا استىقتىڭ شىعارىلماي قالۋىنا اسەر ەتۋدە. بۇل ەڭ كەدەي ەلدەردەگى اشتىق قاۋپىن توندىرەدى، ءبىراق ازىق - تۇلىك يمپورتىنا تاۋەلدى ۇلى بريتانيا ءۇشىن دە اۋىر زارداپتار اكەلۋى مۇمكىن»، - دەپ جازادى بريتاندىق گازەت.
اتاپ ايتساق تاعامدىق وسىمدىك مايى قازىردىڭ وزىندە شەكتەۋلى تۇردە جەتكىزىلەدى. تىڭايتقىشتار مەن مال ازىعى باعاسىنىڭ قىمباتتاۋى وتاندىق وندىرىسكە كەرى اسەرىن تيگىزۋدە. بريتاندىق قايىرىمدىلىق ۇيىمدارى مەن مەملەكەتتىك قارجىلاندىرۋى جوق قوعامدىق توپتار جيناعان ازىق- تۇلىك قورى تاۋسىلىپ قالادى دەگەن قورقىنىش بار. بۇل داعدارىس سەيسەنبىدە ۇلىبريتانيانىڭ ازىق- تۇلىك جانە سۋسىندار كەڭەسى (FDSC) شۇعىل وتىرىسىندا تالقىلانادى. وندا سالا وكىلدەرى ازىق- تۇلىك باعاسىنىڭ وسۋىنە بايلانىستى قالىپتاسقان قيىن جاعدايلاردى جەڭۋ شارالارىن قاراستىرادى.
«مەنىڭ ويىمشا، ۇكىمەت مۇنىڭ بارلىعىنىڭ سالدارىن تولىق تۇسىنگەن جوق. باعانىڭ ايتارلىقتاي وسۋىنە جانە ازىق- تۇلىك تاپشىلىعىنا بايلانىستى جاعداي وتە قورقىنىشتى بولۋى مۇمكىن»، - دەدى ۇلى بريتانيا ۇكىمەتى جانىنداعى كونسۋلتاتيۆتىك ورگاننىڭ باسشىسى يان رايت.