قارا بۇرىش پايدالى ما، جوق پا؟
23 مامىر 20:22

قارا بۇرىش پايدالى ما، جوق پا؟

نۇر-سۇلتان. قازاقپارات - قارا بۇرىش ەلىمىزدە كوپ تاراعان، ءاربىر ۇيدە بار دامدەۋىش ەكەنى بەلگىلى. اسقا سەۋىپ جەگەندى دە ۇناتاتىن حالىقپىز.

ەندەشە قارا بۇرىشتىڭ قانداي پايداسى مەن زيانى بار ەكەن، سونى قاراستىرىپ كورەيىك.

قازىرگى مەديتسينانىڭ مالىمەتىنشە، قارا بۇرىشتىڭ قۇرامىندا پيپەرين سىندى پايدالى الكالويد بار، مۇنىڭ انتيوكسيدانتتىق قاسيەتى بار كورىنەدى. ياعني، قاتەرلى ىسىكتىڭ پايدا بولۋىن ەرتە توقتاتىن قاسيەت. قارا بۇرىشقا اشى ءدام بەرەتىن دە وسى - پيپەرين.

اعزاداعى راديكال زاتتاردى جويادى. دۇرىس تاماقتانباۋ، كۇن استىندا كوپ ءجۇرۋ، ىشىمدىك ءىشىپ، تەمەكى شەگۋ سىندى زياندى ارەكەتتەردىڭ سەبەبىنەن ادام اعزاسىندا راديكال زاتتار كوبەيىپ كەتەدى. ال راديكال شەكتەن تىس كوبەيىپ كەتسە، اعزانىڭ اۋرۋ مەن قابىنۋعا قارسى تۇرارلىق قابىلەتى ناشارلايدى. قاتەرلى ىسىك، ارتريت، استما، ديابەت سىندى اۋرۋلار پايدا بولۋى مۇمكىن. سونداي- اق اعزادا قارتايۋ ەرتە باستالۋى ىقتيمال.

ال قارا بۇرىشتىڭ قۇرامىنداعى پيپەرين اعزادا كوبەيىپ كەتكەن راديكال زاتتاردىڭ كوزىن جويىپ، سىرتقا شىعارىپ تاستاۋعا كومەكتەسەدى. پيپەريننىڭ مۇنداي قاسيەتىن عالىمدار زەرتحانادا جانۋار مەن جاسۋشاعا جاساعان زەرتتەۋلەردەن بايقاعان. ەگەۋقۇيرىقتاردى ەكىگە ءبولىپ، بىرىنە قارا بۇرىش قوسىلعان مايلى تاعام بەرسە، ەكىنشىسىنە جاي مايلى تاعام بەرگەن. سوندا جاي مايلى تاعام جەگەن ەگەۋقۇيرىقتاردىڭ اعزاسىندا ءبىرىنشى توپتاعى كەمىرگىشتەرگە قاراعاندا راديكالدار كوپ بولىپ شىققان.

قابىنۋدى باسادى. پيپەريننىڭ تاعى ءبىر قاسيەتى - قابىنۋدى باساتىن كورىنەدى. اسىرەسە، ارتريت اۋرۋىن باسۋعا كومەكتەسەدى. مۇنى دا عالىمدار ەگەۋقۇيرىققا تاجىريبە جاساپ انىقتاعان.

پايدالى زاتتاردىڭ سىڭۋىنە كومەكتەسەدى. قارا بۇرىش اعزاعا كەيبىر زاتتاردىڭ جاقسى سىڭۋىنە كومەكتەسەدى. ماسەلەن، رەسۆەراترول انتيوكيدانتىن سىڭىرۋگە، كۋركۋمانىڭ قۇرامىنداعى كۋركۋميننىڭ سىڭۋىنە، جەمىس- جيدەكتەگى بەتا- كاروتين مەن ا دارۋمەنىنىڭ ادام اعزاسىنا سىڭۋىنە جاقسى اسەر ەتەدى.

سوزىلمالى اۋرۋلاردىڭ الدىن الادى. جوعارىدا ايتقان رەسۆەراترول انتيوكيدانتى جۇرەك اۋرۋلارى، التسگەيمەر مەن ديابەت اۋرۋلارىنىڭ الدىن الۋعا كومەكتەسەدى ەكەن.

قاتەرلى ىسىكتى باسادى. قارا بۇرىشتىڭ قاتەرلى ىسىككە قارسى تۇرارلىق قاسيەتى بار. زەرتتەۋلەر كورسەتكەندەي، پيپەرين ومىراۋ مەن توق ىشەك، قۋىقاستى بەزى ىسىگىن توقتاتۋعا اسەر ەتەدى، ارى قاراي تاراماۋىنا كومەكتەسەدى ەكەن. سونداي- اق حيميوتەراپيا مەن پرەپاراتتاردىڭ اعزاعا تيگىزەر زيانىن ازايتۋعا كومەگى بار كورىنەدى.

قارا بۇرىشتى ورنىمەن جەگەن ءجون. عالىمداردىڭ ايتۋىنشا، قارا بۇرىشتىڭ پايداسى كوپ بولعانىمەن، ونىڭ كوبى جانۋارلارعا جاسالعان تاجىريبەنىڭ نەگىزىندە دالەلدەنگەن. سوندىقتان ءبىرشاما سىنمەن قاراۋعا نەگىز بار. سول سەبەپتى قارا بۇرىشتى پايدالى ەكەن دەپ كوپ جەۋدىڭ قاجەتى جوق، ورنىمەن، از- ازداپ جەگەن ءجون. ونىڭ ەش زيانى جوق.

massaget.kz

جاڭالىقتار